Marcos 3
3
Ja Jesusi, ya tojb'uk jun winik ja sk'ak'u'il jijleli
(Mt 12:9-14; Lc 6:6-11)
1Ja Jesusi, cho och pilan majke ja b'a snajtsil ja stsomjele'i. Ja tiwi, tey jun winik tsats ay june ja sk'ab'i.
2Jaxa fariseo jumasa ti wa'ne sk'eljel ja Jesús ta oj ya tojb'uk ja winik jaw ja sk'ak'u'il jijleli, b'a jach' oj sta'e yi smul wa'n a'tel ja sk'ak'u'il jijleli.
3Jaxa Jesusi, ti yal yab' ja ma' mi lekuk ayi: —K'e'an ti la och tek'an b'a snalane—.
4Tsa'an ti sjob'o yi ja ma' tey tiwi: —¿Jasunk'a ja lek oj k'u'laxuk ja sk'ak'u'il jijleli: Ja ma b'a leki, ma ja b'a mi lekuki? ¿Oj ma koltatik sok ja sak'anil ja jmojtiki, ma yuj oj ch'aytik sna'jel?—
Mini jun ma jas yala yujile'a. 5Jaxa Jesusi, sok skoraja sk'ela ja ma' ti' joyan sb'aji, yajni waj yil jel ch'u'uy ja sk'ujol'ei, mini jas syajal sk'ujole' aya, jel cham ja sk'ujole'i. Ja'yuj ti yal yab' ja ma' mi lek ayi: —Xija wa k'ab'i—.
Jaxa winik jawi, sxijani ja sk'ab'a, ti'xa tojb'i kana.
6Tsa'an ti'xa elye ja fariseo jumasa b'a snajtsil stsomjele'i, waj stsom sb'aje sok ja herodiano jumasa ja mandaranum Herodesi; lajan yi'aj yab'al sb'aje jastal oj smil'e ja Jesusi.
Ja Jesusi, sje'a ja yab'al ja Dyosi, sok jel jitsan ja ma' ya tojb'uki
7-8Ja Jesús sok ja sneb'uman jumasa ti wajye b'a sti' ja'. Jel jitsan nochji yuj ja kristyano jumasa ma'tik yab'ta ja jas wa'n sk'u'lajeli. Ja kristyano jumasa iti, ti sb'aje b'a lugar jumasa b'a Galilea sok b'a Judea, b'a chonab' Jerusalen sok b'a chonab' Idumea. Ay chab' oxe ti jakele b'a sk'axil ja niwan ja' Jordani. B'a Tiro sok b'a Sidon.
9Jel jitsan ja kristyano jumasa, ja'yuj ti yal yab' ja sneb'uman jumasa ja Jesús a schap'e jun barco b'a mi ti' oj sb'atala'uk sb'aj ja kristyano jumasa. 10A'nima jelxa jitsan ja kristyano jumasa ma' ya'ta tojb'uk ja Jesusi, cho jeltoni jitsan ja ma' ti joyan sb'aji, wa sk'ana oj yamxuke b'a oj tojb'uke'i.
11Jaxa ma'tik ixta wa'n iljel yuj ja tantik pukuji, yajni wax yilawe ja Jesusi, man lu'um wax mok'ye wa'ne awanel, ti wax yalawe'a: —We'n ja Yunina ja Dyosi, xchiye.
12Jaxa Jesusi, tsats lek komwani, mok ma' yalwe yab' machunk'a ja Ye'n.
Ja Jesusi, stsa'a ja lajchawe sneb'umani
(Mt 10:1-4; Lc 6:12-16)
13Tsa'an ja Jesusi, ti sloko chab' oxe ja sneb'uman jumasa b'a oj mojtajuk oj k'e'uke b'a jun wits. Yajni nakaxa lajan aye spetsanile' 14ja janek' aye'i, ti stsa'a lajchawe ja ma' oj mojtajuk yuj spetsanil k'ak'u sok ja ma' oj sjek b'a oj wa yal'e ek' ja tsamal yab'al ja Dyosi. Ja lajchawe jawi, ya sb'i'iluk jekab'anum jumasa 15ch'ak ya' yi yipe b'a oj snutse' ja tantik pukuj jumasa b'a tey sok ja kristyano jumasa.
16Ja lajchawe jaw stsa'a, ja it jumasa: Simon ja ma' ya sb'i'iluk Pedro; 17Santiago, Juan ja' yuntikil ja Zebedeo, ja ma' ya sb'i'iluk Boanergesi, ja iti, wa sk'ana yale, —Yuntikil chawuk—; 18Andres, Felipe, Bartolome, Mateo, Tomas, Santiago yunin ja Alfeo, Tadeo, Simon Cananeo. 19Judas Iscariote, ja ma' yi'a spatik ja Jesusi.
Ja Jesús sok ja ma' jel niwak ja ya'tel yuj ja tantik pukuj jumasa
(Mt 12:22-32; Lc 11:14-23; 12:10)
20Tsa'an ja Jesusi, ti kumxi b'a jun na'itsa. Cho jel jitsan stsomo sb'aj ja kristyano jumasa, mini xb'ob' wa'uke ja Jesús sok ja sneb'uman jumasa. 21Yajni, ch'ak yabye ja smoj alijel jumasa ja Jesús ja jas swa'n ek'eli, ti wajye b'a oj ek' yi'e, ti wax yala sb'aje'a, ja jawi, jomel xa s'olom.
22Jaxa ma'tik was je'awe ja mandar it a'ji yi ja Moises it k'otye b'a Jerusaleni, ti wax yalawe'a: —Ja winik iti, ja smoj ja tan pukuj Beelzebuj ma' jel niwan ja ya'tel yuj ja tantik pukuj jumasa, kechan yuj ja wax a'ji yip yuj ja tan Beelzebuji, jach' wax b'ob' snuts ja tantik pukuj jumasa—.
23Ja'yuj ja Jesusi, ti spaya ja ma jach' wa'ne yaljeli, ti yal yabye ja senya lo'il iti:
—¿Oj a ma b'ob' snuts sb'aj ye'n ita ja tan pukuj b'a? 24Ja swinkil jumasa b'a jun niwan chonab', ta yuj k'a ye'n ita oj och k'e'uke ab'al k'umal, ja niwan chonab' jawi, ojni ch'ay sna'jela. 25Ja swinkil jumasa b'a jun yoj na'its ta yuj k'a ye'nle ita k'a oj och k'e'uke ab'al k'umal, ja swinkil ja na'its jawi, ojni ch'ay sna'jela. 26Jach'ni jastal jaw ja tan pukuji, ta yuj k'a ye'n ita oj och k'e'uke ab'al k'umal ojni ch'akuk ja b'a kulani.
27—Ta yuj k'a ay ma' wa sk'ana oj yelk'an yi spetsanil ja jas b'aj ja winik ma' tsats ayi, jel t'ilan oj mochxuk b'ajtan ja winik jawi.
28—Ja smeranili, wax kala wabyex chikan machunk'a, ja Dyosi ojni ch'ayjuk yi ja smul wa sk'u'lani, sok spetsanil ja jas mi lek wax yala; 29ja b'a mi oj a ta a koltajeli, ja ta yuj k'a ja oj a ta' ti' b'a mi sb'ejuk ja Espiritu Santo. —Ta yuj k'a jach' jastal jawi, mini oj ch'ayjuk ja wa mula—.
30Jach' yala jastal it ja Jesusi, ja'yuj ja lom was ek' k'ujole ja ma'tik wa sje'awe ja mandar it a'ji yi ja Moises ay yi'oj pukuj b'a mi lekuk.
Ja snan sok ja smoj alijel jumasa ja Jesusi
(Mt 12:46-50; Lc 8:19-21)
31-32Yajni k'otye b'a na'its b'ay ja Jesús ja snan sok ja smoj alijel jumasa, sjekawe spayjel ja Jesusi, ti smajlaye'a sb'a sti na'its. Ja kristyano jumasa ma' ti joyan sb'aj ja Jesusi, ti yalawe yab'a:
—Ja wa nani, sok ja wa moj alijel jumasa wa wats jumasa, ti aye b'a sti na'its wa sk'ana oj lo'lanuke a mok.
33Ti job'ji yi'e yuj ja Jesusi:
—¿Ja smeranili, machunk'a ja jnan sok ja moj alijel jumasa b'a?
34Tsa'an ti sk'ela spetsanil ja janek' ti joyan sb'aji, ti yala'a:
—Spetsanil ja it jumasa ja jnan sok ja moj alijel jumasa—. 35Ja smeranili, chikan ma wa sk'u'an ja jas wax yala ja Dyosi, ja' jb'ankil, ja' jwats, sok ja jnan ja Ke'n.
S'ha seleccionat:
Marcos 3: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021