Mateo 25
25
Ja lajune ak'ixuki
1—Ja b'a wa sk'ulan mandar ja Dyosi, oj slaj jastal ek' b'a jun ch'ak ab'al, yajni och ja a'kwali, ay lajune ak'ixuk ch'ak yi'e jujune skandile, ti' waj smajlaye ja ma' oj nupanuki. 2Ay jo'wane ja ye'nle mini t'un wa stalna sb'aje'a, jaxa pilan jo'wane'i, wani stalna lek sb'aje'a. 3Ja jo'wane ma' mi stalna sb'aje'i, mi sb'ut'uwe ya'lel ja skandile'i, 4jaxa jo'wane ma' wa stalna sb'aje leki, sb'ut'uwe lek ja skandile'i, cho yi'ajeto pilan b'a oj ya'we ochuk ja yajnix ch'aki.
5—Jel alb'i mix k'ot ja nupanumi, jaxa ak'ixuk jumasa jawi, jak swayele, ti och wayuke'a. 6Mojan nalan a'kwal ti yabye ja awaneli: —Jakumxa ja nupanumi, ka'xa ta'awik—.
7—Yajni yabye ja ak'ixuk jumasa juts'in ch'ak k'e'uke och schap ja skandile'i. 8Jaxa jo'wane ma mi jel wa stalna sb'aje'i, ti yalawe yab' ja jo'wane ma' chapan aye'i: a'wik ki'tikon t'unuk ja ya'lel ja wa kandil we'nlex it a wi'ajex jani, ja jb'ajtikoni ch'akta ja ya'leli, nakaxa wa'n tupel.
9—Ti yalawe ja jo'wane ma chapan ayi: Me'y ki'ojtikon jitsan b'a oj cho ka'tikon a wi'ex ja we'nlexi. Mas lek kax manawik ja b'a wax chonji.
10Yajni yabye ja jo'wane ak'ixuk jumasa it mi chapan ayuke'i, ti wajye'a waj sman'e ja ya'lel ja skandile'i, ti'to makane'a yajni eljul ja nupanumi. Ja'yuj ja jo'wane ma chapani ochye sok ja nupanum ja b'a k'ini, yajni ch'akta ochuke'i, ti'xa slutuwe kan ja puerta 11Yajni k'otye ja jo'wane ma mi chapanuki, nakaxa lutan sta'awe ja puerta, ti och awanuke'a: —Kajwal, Kajwal, jamaki'tikon ja puerta—.
12—Jaxa nupanumi, ti yala'a: Ja smeranili mix na'a b'ajex ja we'nlexi.
13—Jachuk ja we'nlex jneb'uman jumasa, jel t'ilan chapan oj ajyanik, yuj ja mi oj a na'ex ja sk'ak'u'il sok ja yajni oj kumxukon pilan majke.
Ja oxe a'tijumi
(Lc 19:11-27)
14—Ja b'a wa sk'ulan mandar ja Dyosi, ja lajan sok ja jastal ek' yuj jun winik ja jun majke'ili, ja winik jawi wan schapjel sb'aj, b'a' ay b'a oj wajuk. Ja'yuj ti spaya ja ya'tijum jumasa, ja stak'in janek' yi'oj ja winik jawi, ch'ak spil kan yi kada jujune ja ya'tijum jumasa. 15Ja winik jawi, wa sna'a lek jasunk'a oj sk'u'luke kada jujune ja winike jawi. Ja'yuj june ja ye'nle'i, a'ji yi b'a sk'ab' jo'e mil sat tak'in ja juni a'ji yi chab' mil jaxa otro mil. Tsa'an ti'xa waj ja winik jawa.
16—Ja a'tijum ma' yi'aj kan jo'e mil sat tak'ini, ya' a'tijuk ja tak'in jawi, ya pojxuk jo'e mil mas. 17Ja ma' a'ji kan yi chab' mili, ya pojxuk chab' mil mas. 18Jaxa ma' a'ji kan yi jun mili, yi'aj ja tak'in jawi, waj smuk b'a lu'um.
19—Jitsan k'ak'u lek ek'i, ti'to kumxi ja winik jawi, yajni juli ti payjiye b'a oj yil'e janek'xa pojxita yujile ja tak'in it a'ji kan yi'e'i. 20Ye'n b'ajtan k'ot ja ma' a'ji kan yi jo'e mili, ya'yi ja stak'in ja ajwalali, cho ya'yi pilan jo'e mil mas, ti yal yab'a: Kajwal ja we'n a wa'ki jo'e mil sat tak'in, cho it b'a'yjul pilan jo'e mil mas ja'ni b'a janek' pojxi kuji—.
21—Ti alji yab' ja winik jawi: —Jel lek ay ja wa wa'teli— Ja we'n jun lekil a'tijuma, oj b'ob' cho jniwan jk'ujoluka. Yuj ja t'usan janek' ka'wi'i, jel lek a'tiji ya sok, ja ya'n oj ka'wi b'a wa k'ab' ja a'tel b'a jel niwani. Ja'yuj ja ya'n la' oj k'ultik jun k'in—
22—Tsa'an ti cho k'ot ja ma' a'ji yi chab' mili, ti yala'a: Kajwal ja we'n a wa'a ki, chab' mil sat tak'in, cho it b'a'yjul pilan chab' mil mas ja janek' pojxi kuji—
23—Jaxa winik jawi ti alji yab'a: —Jel lek ay ja wa wa'teli— Ja we'n jun lekil a'tijuma, oj b'ob' cho jniwan k'ujoluka. Yuj ja t'usan janek' ka'wi'i, jel lek a'tijiya sok, ja ya'n oj ka'wi b'a wa k'ab' a'tel b'a jel niwani. Ja'yuj ja ya'n la' oj k'ultik jun k'in.
24—Ye'n tsa'an lek k'ot ja ma a'ji kanyi mili, ti yala'a: Kajwal, ja ke'n wanix na'a ke mini jas oj ja ch'aya, man b'a mi a b'ajuki waxa k'ana. 25Ja'yuj ja ke'n ya'ki xiwel, jaxa wa tak'ini ti waj muk b'a lu'um, itul spetsanil ja mil sat tak'in (1,000) it awa'ki'i.
26—Ti alji yab' ja winik jawi: Mi t'un lek ja jas a k'u'lani, mi jas la makuni. Ta yuj k'a waxa na'a ke mini jas oj ch'ayi, 27¿Jasyuj ja mi a wi'aj och b'a banko ja jtak'ini? Jaxa yajni la kumxiyon ja ke'n oj ki' ja jtak'ini, cho ojni ja janek' alinita.
28—Ja'yuj ja ajwalali, ti yal yab' ja ya'tijum jumasa: Japawik yi ja winik jaw ja mil sat tak'ini, ja'xa wa'wex yi ja ma' yi'oj lajune mili. 29Yuj ja ma' ay yi'oj jitsani, jel jitsan oj cho a'xuk yi, ojto kan smojol; jaxa ma' mi jas yi'oji, ja janek' t'usan yi'oji oj japxuk yi. 30Jaxa a'tijum iti, yuj ja mini jun ya'tela, jipawik el b'a yoj k'ik'inal; ja tiwi jel ja wokoli, jel ja ok'eli, ti oj sk'ux lek tiw ja yeji.
Ja k'ak'u oj sk'el ja Dyos ja b'a lek sok b'a mi leki
31—Ja yajni oj kumxukon ja ke'n ja yuninon winiki, jach' oj jakon jastal jun mandaranum b'a jel ja yipi, joyb'anub'alon sok ja kanjel jumasa oj jakoni, tsa'an ti oj kulanukon ja b'a jkulayub'i. 32Spetsanil ja kristyano jumasa b'a spetsanil ja niwak chonab' jumasa ti oj ch'ak ajyuke b'a stij sat, jaxa ke'n oj ch'ak jpil ja b'a mi lekuki, cho ojni ja b'a leki, jach' jastal wa sk'u'lan ja talna chej wa spila ja schivo sok ja scheji.#25:32 Ja talna chej jumasa b'a slujmal ja Kajwaltik Jesusi, snajtil ja k'ak'u lajan wax ajyiye ja chej sok ja chivo, jaxa b'a a'kwali, pilan wax kan ja chej jumasa, sok pilan ja chivo'i. Porke mas niwan wax ilji ja chej yuj ja chivo jumasa. 33Ja b'a leki, ti oj ka' b'a stojol jk'ab', jaxa ma'tik mi lekuki, ti' oj ka' b'a spakaxil jk'ab'. 34Ja'yuj ja ke'n yuj ja ay ka'teli, ti oj kal yab' ja ma'tik leki: —Jel lek yilunejex ja Jtati. La'ik ti oj ajyanik ja b'a schapunej ja jtat man me'x kujlaji ja satk'inal sok ja lu'umi—. 35Ja yora jel wa'inx kab'i, a wa'wex ki jwa'el; yajni takin jti'i, a wa'wex k'u' ja'; ja yajni elyon b'a jchonab'ili, a wi'ajonex b'a wa najex; 36yajni mey jk'u'i, a wa'wex ki; yajni koyon chamel ch'akeli, waj a paklayonex; yajni lutjiyon preso, waj a wil'onex.
37—Jaxa ma'tik leke'i, ti oj sjob' e ki'a: Kajwal, ¿Me'x kilatikon jas k'ak'u wana tek'uj wa'in, cho me'x ka'tikon a wi a wi a wa'el? ¿Me'x cho kilatikon jas k'ak'u takji a ti', sok me'x ka'tikon a wu' ja'? 38Me'x kilatikon jas k'ak'u ula aya b'a jchonab'iltikon, sok me'x lokowatikon b'a jnajtikon, ma yuj kilatikon meyuk ja wa k'u'i, sok ka'tikon a wi' ja wa k'u' b'a oj a lapi? 39Me'x kilatikon ta koya chamel, ma lutji ya preso, waj kil'atikon.
40Yuj ja ke'n ay ka'tel ja k'ak'u jawi, ti oj kala: Spetsanil ja jas a k'u'lanexi, mi ke'nukon a k'u'lanex ki, ja a k'u'lanex yi june ja wa mojexi lajan sok ke'nani a k'u'lanex ki'a.
41—Jaxa ma'tik jel malo'e'i, ti oj kal yabye'a: —Elanik ja b'a ts'e'el ja we'nlexi, kechan ja jel wajel a k'ujolex ja b'a mi lekuki, ja jas oj sk'u'luk a wi'ex ja Dyos ja we'nlexi, kechan oj ya'a tup ja wa mulexi. Ja we'nlexi ti oj wajanik b'a yoj k'ak' b'a it mini wax tupi, ja k'ak' jawi ye'n schapa ja Dyos ja sb'aj ja tan pukuj sok ja smoj jumasa. 42Yuj ja yajni wa'ix kab'i, ja we'nlexi, mini a wa'wex wa'kona; ja yajni takin jti'i, mi a wa'wex k'u' ja'; 43ja yajni ula ayon ja b'a wa chonab'ilexi, mi a lokowonex b'a wa najexi; ja yajni meyuk ja jk'u'i, ja we'nlexi, mi a wa'wex ki ja jk'u'i; ja yajni koyon chameli, cho lutjiyon preso jasa mini waj a wil'onexa.
44—Jaxa ye'nle'i, ti oj yal e kab'a: Kajwal mini b'a kilatikon ta wa'inxa wab'i ma yuj takin a ti'. Mini b'a kilatikon ta ula aya, sok mi b'a kilatikon ta meyuk a k'u'. Cho mini b'a kab'tikon yab'alil ta ay b'a ko' ya chamel ma lutjiya, ja'yuj mi waj k'el'atikon.
45—Jaxa ke'n ti oj kal yabye'a: Mi ke'nukon ja mi a k'u'lanex ki'i, ja june ja wa moj we'nlex mi a k'u'lanex yi, lajan sok ke'nani mi a k'u'lanex ki'a.
46—Ja kristyano jumasa ma'tik jel malo'e'i, mini oj ch'akuk ja swokole'i, jaxa ma'tik wa sk'u'ane ja yab'al ja Dyosi, ojni sta'e ja sak'anile b'a mini nunka oj ch'akuki—.
S'ha seleccionat:
Mateo 25: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021