Mateo 24
24
Ja snajtsil tsomjeli, oj jomuk
(Mr 13:1-2; Lc 21:5-6)
1Yajni el ja Jesús b'a snajtsil tsomjeli, jaxa sneb'uman jumasa, ti ochye mojan soka, sje'awe yi ja niwak ton jumasa tojb'el sok ja snajtsil tsomjeli. 2Ja'yuj ti' alji yabye jastal it yuj ja Jesusi: —¿Wa'n a maxa wilawex jastal tojb'el ja na'its jumasa iti? Ja smeranili, oj kal a wabyex spetsanil ja jastal waxa wilawex tojb'eli, ojni ch'a jomuka. —Mini jun ton oj kan latsana—.
Chapa a b'ajik ja b'a stik'anali
(Mr 13:3-23; Lc 21:7-24; 17:22-24)
3Tsa'an, ja Jesús sok ja sneb'uman jumasa, ti wajye b'a wits Olivos. Jaxa Jesusi ti och kulana,#24:3 Ja sb'ej ja lom och kulan ja Jesusi, k'ela ja jas wax yala b'a snota'il b'a Mateo kapitulo 5:1. yajni stuch'ile'xa, ti sjob'owe ja sneb'uman jumasa:
—¿Kajwal, jas ora oj jomuk ja snajtsil tsomjel b'a? ¿Jastal oj na'tikon ta yuj ojtoni cho kumxan ja we'na b'a, mayuj ja' ti'xa k'ot ja stik'anali? ¿Jastik senya'il oj ja je' b'a?
4Ti alji yabye yuj ja Jesusi:
—Talna lek a b'ajex— Mok a wa'a b'ajex ma oj slo'layex. 5Yuj ja jel jitsan ja ma'tik oj jak yi'e majan ja jb'i'ili, ti oj yalwe yab' ja kristyano jumasa'a: Ke'non ja Mesiasi. Malan sok ja oj sta'e ti' ja jb'i'ili, jel jitsan ja ma' oj slo'laye'i.
6—Ja we'nlexi, oj ja wabyex yab'alil jel wa'n ajyel ja guerra b'a tuktukil chonab' jumasa, oj cho a wabyex ja b'a pilan chonab' jumasa lajan sok ojxa ch'ak syamtala'uk sb'aje. Jaxa we'nlexi mi lom la xiwyex; ja jaw jumasa ojni ch'ak ek'uka, ja k'ak'u jumasa jawi, cho mitoni ja'uk ja stik'anala. 7Yuj ja jel t'ilan oj k'e'uke ab'al k'umal ja chonab' jumasa, ja kristyano jumasa mi oj sta' jas oj yabye, b'a jitsan chonab' jumasa oj nijkuk ja lu'umi. 8Spetsanil ja jastik jumasa jawi, ja'toni sk'e'ub' ja wokol jumasa'a.
9—Ja we'nlexi, oj i'janik oj waj lutjanik, ti oj cho a'janik b'a sk'ab' ja ma'tik ay ya'tel b'a oj yixtala'ukex lek b'a jach' ti oj smil'ex kan tiwi. Spetsanil ja kristyano jumasa mi oj yil'ex lek yuj ja waxa k'u'anex ja kab'ali. 10Ja k'ak'u jawi jel jitsan ja ma' ti' nochane jmoki, jasa, mi wokoluk oj sch'ay'one sk'ujole; ay chab' oxe ye'nle ita oj sk'u'luke entregar ja smoje'i, jaxa tuki, tajkelxta oj yil sb'aje. 11Jel jitsan oj sje' sb'aje yuj aluman Dyose, ja jachuki, jel jitsan ja ma oj slo'laye'i. 12Ja kristyano jumasa oj jelxuk el ja jas mi lek was sk'ulanei, mas jel jitsan ja ma mi oj syajta sb'aji yujile'i. 13Jaxa ke'n man b'a stik'anal ojni koltaye ja ma'tik mi oj ya'ekan jk'u'ajel ja ke'ni. 14Ja stik'anali, ja ti oj ilxuk ja yajnix ch'ak alxuk ek' b'a spetsanil ja lu'um it ja smandar ja Dyosi, ja'ni yajni ch'akta smaklane spetsanil ja kristyano jumasa b'a lu'um iti.
Jun senya b'a jastal oj paktik ajnel
15Ja Jesusi, mix ch'ak yaljel yab' ja sneb'uman jumasa yuja ja jastal oj k'otuk jas stik'anali, ti yal yabye'a:
—Ja ma' wa sk'uman ja jas ts'ijb'anub'al b'a ju'un iti, jel t'ilan oj yab' sb'ej ja jas yala ja aluman Dyos Danieli. Ja ye'n yala oj k'ot jun k'ak'u ay ma' oj ya' jun kistal majtanal ja b'a snajtsil ja tsomjeli.
—Yajnixa wilawex ja b'a snajtsil tsomjel b'a it tsa'ub'ali, jach' k'a wa'n ek'el ja jastal yala ja aluman Dyos Danieli, ja k'ak'u jawi pakawik ajnel. 16Ja ma'tik tey b'a slujmal Judea a spak ajnel b'a yaxk'ul; 17Ja ma' tey b'a s'olom snaji, mixa lomx ko' b'a ay jas oj ya eluk, 18jaxa ma' tey b'a witsi mokxa kumxuk b'a oj waj yi' ja sk'u'i. 19—Ja k'ak'u jawi, jel ajula sb'aj ja ixuk ma' kuchan yuj niwan chameli, cho jach'ni ja ma' wantox ch'ak sman ja yal yalatsi, yuj ja jel oj yi'e ja wokoli—. 20K'umanik ja Dyosi, k'anawik yi ts'akatal mok ek' b'a sk'ak'u'il che'e sok mini b'a sk'ak'u'il jijlel ja jastik jumasa iti, 21Yuj ja k'ak'u jumasa jawi, jel oj yi'e ja wokol ja kristyano jumasa. Ja Dyosi, desde sk'u'lan ja lu'umi, man ya'n, mini b'a wax yi'aj wokol ja kristyano jumasa ja jastal wa'n yi'jel ja ya'n; cho mini oj yi'e wokol pilan majke jastal ja ita. 22Ja ma' ye'n stsa'unej ja Dyosi, wani syajtana, ja'yuj mi jel najatuk oj wajuk ja niwan wokol oj ajyuki. Ja lek mi jach' wax yila jastal jaw ja Dyosi, spetsanil ja kristyano jumasa ojni ch'ak chamuke'a.
23—Ja k'ak'u jumasa jawi, ay k'a ma oj yal a wabyex: K'elawilex, itul ja Mesiasi, ma oj cho yal'e tey tiw ja Mesiasi, mok lom a k'u'ukex yi'e. 24Yuj ja ayni ma oj jak yal yujni aluman Dyos ja ye'na b'aya mi meranuk, cho ayni ma' oj jak stoy sb'aj ke ye'n ja Mesiasi, sok jel tsamal ja jas oj sk'u'luk b'a oj slo'laye ja kristyano jumasa. Man oj b'ob' slo'laye ja ma' ti'ni nochane sok ja yab'al ja Dyosi. 25Ja we'nlexi, b'ajtanxa kaloj a wabyex 26ay k'a ma'x jak yal a wabyex: Ja Mesiasi, tey b'a chayan lugar ta xchi k'a, mok lom wajanik b'a oj waja wil'ex. Ma yuj oj yal a wabyex: Ja Mesiasi ti snak'unej sb'aj tiwi—, mok lom a k'u'ukex. 27Ja yajni oj jakon ja ke'n yuninon ja winiki, mi oj nak' jb'aj. A petsanilex ojni a wil'onexa, ja yajni oj jakon ja ke'n jach' oj ijlab'anukon jastal ja tsansewal wax ya ijlab'anum spetsanil ja satk'inali. 28Spetsanil ja kristyano jumasa b'a lu'um iti, wa sna'a lek ja b'a wa stsomo sb'aj ja usej jumasa, yuj ay jun cham chante. Jach' jastal jaw ja k'ak'u oj jakon ja ke'n: A petsanilex oj ch'ak a na'ex.
Ja yajni oj kumxuk ja yunin ja winiki
(Mr 13:24-37; Lc 17:26-30,34-36; 21:25-33)
29Ti cho yala ja Jesusi:
—Yajnix ch'ak ek'uk ja niwak wokol jumasa:
Ja k'ak'u oj tupuk,
jach'ni ja nan ixawi mi oj ijlab'anuk.
Ja k'anal jumasa oj mok' koni,
ja jas yipunej sb'a sok ja
satk'inali, oj k'itk'unuk.
30—Ja'yuj ja b'a satk'inali, oj ilxuk jun niwan senya, ja jawi, ja'xani wa'n sje'jel yuj ti'xa jakumon ja ke'n ja yuninon ja winiki. Jaxa yajni oj a wil'ex ti'xa jakumon b'a yoj asoni, sok jel ja Kipi cho jel tsamal jakumoni, spetsanil ja swinkil ja niwak chonab' jumasa b'a lu'um iti, oj ch'ak och k'itk'unuke yuj ja xiweli. 31Ti oj jek b'a spetsanil ja lu'um it ja kanjel jumasa, oj ka'yi'e jun skorneta'e b'a oj waj stsom'e spetsanil ja jneb'uman jumasa.
Ja lo'il sb'aj igo
32—Neb'awik t'unuk ja lo'il it wa sje'a ki'tik ja higuera. Yajni waxa wilawex ja te' jaw wa'nxa elel yawal sk'ab' sok yawal spo'wil, yujni mojanxa oj ya ja ja'i. 33Cho jach'ni, kwando oj a wil'ex nake wa'n k'otel smeranil ja jas kala wabyexi, ti oj a na'ex yujni jelxa mojan jakumona. 34Ja smeranili, oj kala wabyex spetsanil ja iti, b'ajtan oj ch'ak ek'uk yuj ja oj chamuke ja chab' oxe ma' sak'an aye ja ya'n. 35Ja satk'inal sok ja lu'umi, ojni ch'akuka, jaxa spetsanil ja jas wax kala a wabyexi, mini oj ch'akuka.
36—Ja k'ak'u oj jakoni mini jun ma oj sna'a jas ora'a; mini ja anjel jumasa b'a satk'inali, mi oj sna'e. Cho mini ja ke'n mi oj jna' ja sk'ak'u. Kechan ye'n ja Dyos, ja jtat oj sna'i.
37—Ja ke'n ja yuninon winiki, yajni la jakyon pilan majke, ja kristyano jumasa jach'to oj ayuke jastal ajyiye ja kristyano jumasa ja yajni ti'to ay ja Noeji. 38Ja kristyano jumasa ja k'ak'u jawi, wax wa', xyu'aje ja, wax nupaniye, jach' wa sk'u'lane man och b'a barco ja Noeji; tsa'an ti jak ja b'ut' ja'i. 39Ja kristyano jumasa mi sna'awe jasunk'a wa'n ek'eli, man jak ja b'ut' ja'i, ti ch'ak sjik' e ja'a. Jach' oj cho ek' jastal jaw ja yajni la jakyon pilan majke ja ke'n ja yuninon ja winiki. 40Ja k'ak'u jawi, ay k'a chab' winik ti wa'ne a'tel b'a alaj, june oj ki' jaxa juni oj ka'kani. 41Ay k'a chab' ixuk lajan wa'ne juch'uj ixim june oj ki' jaxa juni oj ka'kani. 42Ja'yuj chapanxta ajyanik yuj ja mi oj a na'ex ja k'ak'u'il oj jak pilan majke ja wa wajwalexi. 43Ja smeranili, ta ay jun winik wa sna'a jas k'ak'u oj och ja elk'anum b'a snaji, oj stalna ja snaji, mi oj yi' lek ja oj ochuk ja elk'anum jawi. 44Cho jach'ni sok ja we'nlexi, k'elan jakan sok chapanxta ajyanik, yuj ja ke'n ja yunin ja winiki, ja oj jakon ja yajni mini t'un ja'uk waxa na'awexi.
Ja a'tijum jumasa
(Lc 12:41-48)
45—¿Machunk'a a'tijum jel lek sok chapanxta ayi? Ja jawi ja it ma wax a'ji kan yi b'a ye'n oj stalna yi ja swinkil snaj ja ajwalal b'a mi oj ya ek' yora'il ja swa'ele'i. 46—Jel lek oj yil ja a'tijum ja ma oj jak ta'juk yuj ja yajwal wa'n sk'u'lajel spetsanil ja jas alji kan yab'i— 47Ja smeranili, ye'n oj a'ji sk'el spetsanil ja kosa jumasa b'a snaj ja ajwalali. 48La kaltik a wil sok jun a'tijum mi lek a'tiji, oj b'ob' ek' sk'ujol: Ja kajwali, wajel ele, ja jawi oj alb'uk lek mi na'b'en ja sk'ak'u oj kumxuk, ta xchi k'a. 49Ti' och syajb'es ja smoj jumasa'a, och wa' sok ja yakb'um jumasa. 50Yajni kumxi ja yajwali, jun k'ak'u mini t'un ja'uk wa'n smajlajel ja a'tijum jawi, 51oj a'juk yi jun wokol jastal wax a'ji yi wokol ja ma' wa slo'la ja yajwali. Ti oj och ok' leka man oj sk'ux ja yeji.
S'ha seleccionat:
Mateo 24: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021