Mateo 20
20
Ja a'tijum jumasa b'a yaljil ja ts'usub'i
1—Ja b'a wa sk'ulan mandar ja Dyosi, ja oj slaj ja jastal ek' sb'a jun alaji. Ja swinkil ja alaj jawi, sajto lek eli b'a waj sle' ma' oj a'tijuk ja b'a alaja jawi. 2Yajni sta'a ja a'tijumi, ti slajawe sok ja swinkil ja alaj sok janek' oj tupjuke ja b'a jun k'ak'u; yajni slaja sb'aj yujile'i, ti'xa jekji ye b'a a'tela. 3B'a b'alune ora ja sakb'eli, cho el ja swinkil ja alaji, waj cho sle' jan a'tijum, yajni k'ot ja b'a k'achinub'i, sta'a jitsan winik lom aye. 4Ti yal yabye: Ka'axik kax a'tijananik b'a kalaj, ja wa ts'akolexi, mix cham a k'ujolex ojni jtup'exa. Ja winike jumasa jawi, lekni yabye'a, ti'xa waj a'tijuke'a. 5Mojan kulan k'ak'u, cho el ja swinkil ja alaji, waj cho sle' tuk a'tijum, jach' cho yal yab' ja jastal yalata yab' ja tuk jumasa; cho el pilan majke ja b'a oxe ora b'a och k'ak'u, jach' cho yal yab' ja jastal yala yab' ja tuk jumasa. 6Jo'e xa ora sb'a och k'ak'u, cho el pilan majke ja swinkil ja alaji, yajni k'ot ja b'a k'achinub'i, cho sta'a tuk winike lom aye. Ja'yuj ti sjob'o yi'e'a: ¿Jasyuj ja snajtil k'ak'u lom ayex b'a?
7—Ti yalawe ja ye'nle'i: —Mi ma'x ya' ka'teltikon—
—Ti alji yabye yuj ja swinkil alaji: Kax a'tijananik b'a kalaj.
8Yajni och ja a'kwali, ja swinkil ja alaji, ti yal yab' ja ma' wax yila ja a'tijumi: Paya kada jujune ja a'tijumi, tupuwe, jaxa tupwanumi, ja stuluyi sok ja ma' tsa'an och a'tijuki, ja tsa'an stupu ja ma' b'ajtan och a'tijuki.
9—Ja'yuj ti'xa och yi'e ja sts'akole ja ma och a'tijuke b'a jo'e ora b'a och k'ak'u, ja sts'akol yi'aje'i, b'a snajtil jun k'ak'u. 10Tsa'an k'otye ja ma'tik sajto lek och a'tijuke'i, ek' sk'ujole ja ye'nle yuj oj tupjuke t'un mas. B'a'ya kechani tupjiye b'a snajtil jun k'ak'u'a. 11Tsa'an ja a'tijum jumasa jawi, yajni ch'akta yi' ja sts'akole'i, ti och k'umanuke sb'aj ja swinkil ja alaji, 12ti yalawe'a: Ja ma'tik och a'tijuke b'a jo'e ora b'a och k'ak'u, mixa alb'i a'tiji ye, jaxa we'n jach a tupu jastal a tupuwotikon ja ke'ntikoni, jaxa ke'ntikoni, snajtil k'ak'u ti wa'ntikon stek'jel ja k'ak'u. Ja jachuki, mi sb'ejuk.
13—Jaxa swinkil ja alaji, ti yal yab' june ja ye'nle'i: —K'elawil —Ja ke'n me'x lo'lana. Na'a lek ja jas kalatiki, oj waj a'tijanan b'a kalaji, jaxa ke'n kal a wab'i, b'a snajtil ja jun k'ak'u oj tup a'. 14Ja we'n i'aj ja tak'in ja janek' a b'aji ka'xa. Mixa a wocheluk ja ta yuj k'a jach' wax cho jtupu ja ma' och a'tijuk b'a jo'e ora b'a och k'ak'u'i. 15Ja ke'n sok ja jtak'ini, ke'n xna'a jasunk'a oj k'ul soki. ¿Jasyuj ja waxa k'ana oj ja wil k'ujoluk ja ma'tik lek wax kila b'a sok b'a?
16Ja Jesusi, jach' sch'aka jastal it ja lo'ili: —Ja'yuj ja ya'n ja ma' b'ajtan ay wax yab'i, ye'n tsa'an ay; jaxa ma' ye'n tsa'an ay wax yab'i, ye'n b'ajtan ay—.
Ja Kajwaltik Jesusi, cho yala jun majke smoj jastal oj chamuk
(Mr 10:32-34; Lc 18:31-34)
17Jaxa Jesusi, yajni ti'xa wajum b'a chonab' Jerusaleni, b'a b'ej ti stsomo ja lajchawe sneb'umani, (12) ti yal yabye'a:
18Ja ya'n ti xa wajumotik b'a Jerusalen. Ja ke'n yuninoni ja winiki, ti oj a'jukon b'a sk'ab'e ja pagre jumasa matik jel niwak ja ya'tele'i, sok jach'ni ja ma'tik wa sje'a ja mandar jumasa it a'ji yi ja Moises yuj ja Dyosi. Ye'n oj yal'e ja ke'n ojni chamkona, 19oj cho ya'wone b'a sk'ab' ja matik mi lek xyilawoni b'a oj yixtala'ukone, sok oj syajb'esone, b'a jach' ti oj smil'one b'a jun cruz. Jaxa ke'n b'a yoxil k'ak'u ojni sak'wukona—.
Ja jas sk'ana ja snan ja Santiago sok ja Juani
(Mr 10:35-45)
20-21Ja chab' sneb'uman jumasa ja Kajwaltik Jesusi, ja'ni ja Santiago sok ja Juani, wajye sok ja snane wa sk'umuke ja Jesusi. Yajni k'otye ja b'a'yi, jaxa snane'i ti ko' mek'an b'a sti' sat ja Jesús b'a oj sk'an yi pavor. Ti job'ji yi yuj ja Jesusi:
—¿Jasunk'a waxa k'ana'i?
Ti yala ja ixuki:
—Awapavori, ja yajni ti'xa kulana k'ot ja b'a oj iljan niwani, ala tix kulani a mok lajan ja chab' kuntikili, june b'a stojol, sok june b'a pakaxil ja wa k'ab'i.
22Ti yala ja Jesusi:
—Ja we'nlexi, mixa na'awex ja jas wa'nex sk'anjeli. ¿Yuj a ma chapan ayex oj a wi'ex spetsanil ja wokol jumasa jastal oj ki' ja ke'n b'a?
Ti yalawe ja ye'nle'i:
—Ja'i, chapan aytikon.
23Ti alji yabye yuj ja Jesusi:
—Ja smeranili jelni oj a wi'ex ja wokol jastal oj ki' ja ke'ni. Jaxa jas waxa k'anawexi, kechan ye'n ja jtat wa sna'a machunk'a oj ya kulan ja b'a stojol sok pakaxil k'ab'i. Ja jawi mi ke'n oj kale.
24Yajni ch'ak yabye spetsanil ja lajune sneb'umani, jel tajkiye sok ja Santiago sok ja Juani. 25Ja'yuj ja Jesusi, ti spaya spetsanile'a, ti yal yabye'a:
—Ja we'nlexi, waxa na'awex lek ja mandaranum b'a chonab' jumasa, waxa wilawex jastal a wajwalex, jaxa ye'nle'i niwak winike ni'a, kechan wax yalawe jasun oj sk'u'luk ja kristyano jumasa. 26Jaxa janek' ayex ja we'nlexi, mini t'un sb'ejuk jach' oj k'u'laxuk jastal jawa. Ta yuj k'a ay ma' wa sk'ana niwan oj iljuk, a ya'telta ja smoj jumasa. 27Ta ay k'a ma' wa sk'ana b'ajtan oj ajyuk, t'ilan oj och a'tijuk jastal jun ma' yib' k'ab'al ay. 28Ja ke'n ja yuninon ja winiki, jach' oj jk'u'l jastal iti. Mi jakyon ja b'a lu'um it b'a oj ya'teltayon ja kristyano jumasa, jakyon b'a ke'n oj ka'teltaye. Jakyon b'a oj chamkon yuj petsanil ja ma' oj koltani—.
Ja Jesusi, ya tojb'uk chawane ma mix ilwani
(Mr 10:46-52; Lc 18:35-43)
29Yajni el ja Jesús sok ja sneb'uman jumasa b'a chonab' Jerico, jitsan kristyano nochji ye yuj. 30Ja b'a b'eji ti sta'awe chab' winik mix ilwaniye. Yajni yabye ti wan ek'el ja Jesús ja b'a'ye'i, ti och awanuke'a: —Kajwal we'n ja Mesiasi, talna jya'ujlaltikon cho koltanotikon—.
31Jaxa kristyano jumasa ti skomowe ke a ch'ajb'ajuke ja chab' wane ma mix ilwani, jaxa ye'nle'i, jel tsats awaniye: —Kajwal, we'n ja Mesiasi, talna jya'ujlaltikon cho koltanotikon—.
32Jaxa Jesusi, ti k'ot tek'ana, spaya ja chab' winik mix yila k'inali, ti sjob'o yi'a:
—¿Jasunk'a waxa k'ana oj k'u'luk a wi'ex b'a?
33Ti yalawe ja ye'nle'i:
—Kajwal yuj wax k'anatikon oj wa kiltikon k'inal, —xchiye.
34Jaxa Jesusi, stalna sya'ujlal ja chab' winike jawi, syama yi ja sate'i. Wego yilawe k'inal, ti'xa wajye nochan sok ja Jesusi.
S'ha seleccionat:
Mateo 20: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021