Mateo 16
16
Ja jas ek' yuj ja Jonasi
(Mr 8:11-13; Lc 12:54-56)
1Ay chab' oxe fariseo sok chab' oxe saduseo jumasa, ti ochye mojan sok ja Jesús b'a oj yabye jas oj yale, ti yalawe yab'a:
—Wax k'anatikon oj ja k'u'l jun milagro, b'a ti oj na'xuk ta yujni yuj ye'n ja Dyos sjekuneja.
2Jaxa Jesusi, ti alji yabye yuj ja:
—Ja b'a och k'ak'u jumasa, yajni waxa k'elawex ja satk'inali, yuj k'a ch'ak pampam ay ti waxa walawexa: —Jel lek oj ek'uk ja k'ak'u jumasa iti— 3Jaxa b'a sakb'el jumasa yuj k'a ch'ak pampam ay ja satk'inali, ma yuj musan, ti' waxa walawexa: —Ja ya'n mi lek oj ek'uk— Ja we'nlexi, jexa na'awex sb'ej ja jas wa sje'a b'a satk'inali. ¿Jasyuj ja ya'n ja mixa na'awex sb'ej ja jas wa'non sje'jeli, ja iti, jun senya sb'a Dyos tak? 4Yuj ja waxa k'ana oj a wil'ex jun milagro ja'yuj ja mi lek ja jastal ayexi, yuj ja mix cho a k'ana oj a k'u'ukexi. Ja milagro oj je'awi'exi, kechan ja', jas ek' yuj ja aluman Dyos Jonasi.
Yajni ch'ak yal ja Jesusi, spila sb'aj soke, ti'xa waja.
Ja jas wa sje'awe ja fariseo jumasa
(Mr 8:14-21)
5Ja Jesús sok ja sneb'uman jumasa, sk'utsuwe och ja paman ja' b'a Galilea. Jaxa sneb'uman jumasa, ch'ay sk'ujole oj yi'e och jitsan pan. 6Ti alji yabye yuj ja Jesusi:
—K'elawilex, talna lek a b'ajex yuj ja slevadura'e ja fariseo sok ja saduseo jumasa.
7Jaxa sneb'uman jumasa ti och yal sb'aje ye'nle ita'a, ti wax yalawe'a: —Ja smeranili, ja ti yala jachuk ja Jesús yuj ja mi ki'ajtik jan jitsan ja pani—. 8Jaxa Jesusi, sna'a k'inal ja jas wa'ne yaljeli, ti alji yabye'a:
—Jel ko'el waxa k'u'anex ja Dyosi— ¿Jasyuj ja jex cham a k'ujolex yuj ja mey a wi'ojex jan jitsan pan b'a? 9Maklayik lek sb'ej ja jas wax k'ana oj kala wabyexi; ¿Ma yuj ch'ayta ak'ujolex ja jun majke'il ka wa' jo'e mil winik sok kechan jo'e ala pani? ¿Mi oj kal yuj ch'ayta a k'ujolex ja jaye mo'och kan ja k'ak'u jawi? 10¿Mixa xa na'awex ja k'ak'u ka wa' chane mil sok kechan juke ala pani, cho we'nani a wilawex jitsan mo'och kan tak? 11¿Mi' maxa na'awex t'unuk ja ke'n mi ja'uk wa'non yaljel ja wa'el jaw b'a? —Talna b'ajik yuj slevadura'e ja fariseo sok ja saduseo jumasa—.
12Jachuk ja neb'uman jumasa yabye sb'ej ja jas yala ja Jesusi, mi ja'uk wa'n yaljel ja levadura wax och b'a arina sb'a pani, ja' wa'n yaljel ja smodo'e ja fariseo sok ja saduseo jumasa.
¿Machunk'a Jesusi?
(Mr 8:27-30; Lc 9:18-21)
13Yajni mojan ojxa k'otuke b'a chonab' Cesarea b'a Filipo, ti sjob'o yi ja sneb'uman jumasa ja Jesusi:
—¿Jasun wax yala ja kristyano jumasa yuj ja ke'n, ja yuninon ja winiki?
14Ti yala ja sneb'uman jumasa:
—Ay ma' wax yala yuj we'n ja Juan ma' ya'a yi'jel ja'i, jaxa tuki wax yalawe yuj we'n ja aluman Dyos Eliasi, ma' we'n ja aluman Dyos Jeremiasi, ma ay ma' tuk aluman Dyos.
15Ja Jesusi, ti cho sjob'o yi'ile'a:
—Jaxa we'nlexi, ¿Jas la chiyex? ¿Machunkilon ja ke'n?
16Ti yala ja Pedro:
—We'n ja Mesiasi, ja yunin ja Dyos it sak'an lek wax cho ya'a sak'anili.
17Ti alji yab' yuj ja Jesusi:
—Pedro yunin Jonas, jel lek ja jas a wala—. Mi we'n a tuch'il waxa na'a ja jas a wala, ja yala wab' ja jtat it tey b'a satk'inali. 18Ja'yuj oj ka'a b'i'iluk Pedro, ja b'i'ilal Pedro wa sk'ana yale —ton—. B'a sat ja ton iti, ti oj ka' ajyuk ja kuntikil jumasa, sok mi oj ch'ayjuk sna'jele yuj chamel ch'akeli. 19Ja we'n Pedro, we'n oj ka'wi ja a'tel b'a wa sk'ulan mandar ja Dyosi. Spetsanil ja jas mi lek oj a wil ja we'n b'a lu'um iti, man b'a satk'inal mini cho lek oj yil ja Dyosi. Jaxa jas lek oj a wili, jach'ni ja Dyosi, cho lekni oj yil'a.
20Ja'yuj ti yal yab' ja sneb'uman jumasa ja Jesusi, mok b'i ma' yal'e yab' ta yuj ye'n ja Mesiasi.
Ja Jesusi, yala jastal oj chamuk
(Mr 8:31—9:1; Lc 9:22-27)
21Man k'ak'u jaw ja Jesusi, och yal yab' ja sneb'uman jumasa ja jastal oj ek' yuji: —T'ilan lek oj yi'one b'a chonab' Jerusalen, ja ma'tik ay ya'tel b'a chonab'i, ja pagre jumasa ma'tik niwak ya'teli, sok ja ma'tik wa sje'awe ja mandar it a'ji yi ja Moisesi, jel oj ya'we ki' ja wokoli. Cho ti'ni oj smil'one tiwa, jaxa b'a yoxil k'ak'u oj ni sak'wukona—.
22Jaxa Pedro ti spila el ja Kajwaltik Jesusi, ti och skom yuj ja jas yala. Ti yal yab'a:
—Kajwal mini jach' oj ek' jastal jawi. Ja Dyosi, mi oj sk'an ja jach' oj ek' jastal jawi—.
23Ja Kajwaltik Jesusi sutu sb'aj ti yala yab'a:
—Pedro ja jas waxa wala ja wax yala wab' ja tan pukuji— Elan b'a jts'e'eli— Ja we'n mixa na'a sb'ej ja jas chapan yuj ja Dyosi, ja we'n kechan waxa k'ana oj k'ok yi ja jas yaloj ja Dyosi, —xchi ja Jesusi.
24Ti'xta ja Jesusi, cho yal yab' ja sneb'uman jumasa:
—Ta yuj k'a waxa k'ana oj ochanik jneb'umanil ja we'nlexi, jel t'ilan oj ch'aka wa'wex kan ja jas jex k'ank'uni oj ja k'u'lukexi. Jel t'ilan oj ja kuch ex ja wokol jumasa, sok ja' oj ja k'u'lukex ja jas oj kala wabyex ja ke'n. 25Spetsanil ja ma kechan ja wajel sk'ujol tsamal oj ek' yuj b'a lu'um iti, ojni ch'ayuka. Kechan ta yuj k'a ti la chamyex yuj ja waxa k'u'anonexi, ja jachuki, ojni a ta' wa koltajelexa. 26Mi jas oj makunuk ta ay k'a ma' ay yi'oj ja jas wa sk'ana b'a lu'um iti, ja k'a yuj ja jaw ja ti' oj ch'ay sna'jeli. Mini jun ma' ay jas oj a'juk yi yuj b'a oj skolta sb'aji. 27Yuj ja ke'n ja yunin ja winiki, jelxa mojan oj jakon sok ja yip ja Dyosi sok ja kanjel jumasa b'a oj jak ka'yi ja smajtan ja ma' tsamal ja jas sk'u'lane'i, b'a oj cho jak ka stup ja smul ja ma'tik jel kistal ja jastik sk'u'lane'i. 28Ja smeranili, ay chab' oxe ja ma' ti ayex jmoki, mi oj chamanik man oj a wil'ex oj ki' ja ka'teli—.
S'ha seleccionat:
Mateo 16: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021