Mateo 15
15
Ja jas sje'awe ja ma' ek' paxta
(Mr 7:1-23)
1Ay chab' oxe fariseo sok chab' oxe ma' wa sje'a ja mandar it a'ji yi ja Moisesi, cho ti'ni jakele b'a Jerusalen ja ye'nle'i, ti sjob'owe yi ja Jesusi:
2¿Jasyuj ja wa neb'uman jumasa we'n ja mi sk'u'ane ja jastal ya'oje kulan ja ma' ek' paxta kujtiki, ja ye'nle'i, ayxa lek k'ak'u jach'ni wa'ne jan sk'u'lajela? ¿Jasyuj ja mi sak'a ja sk'ab'e ja oj wa'uke b'a?
3Ti alji yabye yuj ja Jesusi:
—¿Jaxa we'nlexi, jasyuj ja waxa k'okowex ja smandar ja Dyos sok ja' jel niwan waxa wilawex ja jas we'n ita a wa'ojex kulan b'a? 4Ja Dyosi, jach' yala jastal iti: K'u'anik ja yab'al ja wa nan a tatexi, cho talnanik; ja ma' mi oj syajta ja snan stati, ojni chamuka, —xchi ja yab'al ja Dyosi.
5-6—Jaxa we'nlexi, waxa walawex mi yuj wa'nukex sk'okjel ja smandar ja Dyos ja yajni waxa walawex yab' jastal it ja wa nan a tatexi: Mi oj b'ob' jkoltayex, spetsanil ja jas ki'oji, ja kaloj yab' ja Dyos ye'n oj ch'ak ka'yi, cho jach'ni ja jtak'ini. Waxa wutaj wa nan a tatexi.
—Ja we'nlexi mini t'un waxa kisawex ja smandar ja Dyosi, kechan ja' wajel a k'ujolex sok ja jas we'n a wa'ojex kulani. 7—Toj pakax ayex ja we'nlexi— Ay lek sb'ej ja i'ji majan ja sti' ja aluman Dyos Isaias yuj ja Dyos ja yajni yala jastal iti:
8Ja kristyano jumasa iti, wax yalawe ke yuj wa sk'u'anone,
ja smeranili, najat aye jmok.
9Mi jun ya'tel ja waxa wala yuj waxa toyowonexi,
we'n waxa walawex ja jas oj ja k'u'lukexi
ja'ni wax och a je'exa
waxa walawex yuj ke'n jach' kalunej.
Ja jas wax ch'aywani smeranili
10Ja Jesusi, ti spaya ja kristyano jumasa ti yala yabye'a:
—Maklayik sok a' kan lek b'a wa olomex ja jas oj kali: 11Ja jas wa sch'ayawotik b'a sti' sat ja Dyosi, mi ja'uk ja wa'el wax och b'a jti'tiki. Ja jas wa sch'ayawotiki, ja yajni jex ka'a kocheltik ja jmojtiki, sok ja jastal mi lek wax ta'a jb'ajtik ti'i.
12Ja'yuj ti ochye jan mojan ja sneb'uman jumasa ja Jesusi, ti yalawe yab'a:
—Ja fariseo jumasa, mi yi'aje lek ja jas a wala yabye'i.
13Ti yala ja Jesusi:
—Ja jtati, jach' oj sk'u'l yi ja fariseo jumasa jastal wa sk'u'lan ja ts'unu nichim b'a mi ye'n sts'ununejuki: Wax ch'ak sjots el man yech wa sjipa'ele. 14Mok a kis'ex ja fariseo jumasa jawi: Ja ye'nle'i, lajan sok mix ilwaniye, cho wa'ne sje'jel yi sb'ej jun pilan ma' mix yila k'inal, jun tupel sat ta wan k'ax cho sje'a yi sb'ej ja smoj tupel satili schawanile lajan ti oj mok'uke b'a jun k'e'en.
15Ti sjob'o ja Pedro:
—Ala kab'tikon jas b'ej ja it a wala ay jas oj sjom'otikon b'a sti' sat ja Dyosi.
16Ti yala ja Jesusi:
—¿Cho mini a we'nlexi, mi maxa na'awex sb'ej b'a? 17Spetsanil ja jas wax kab'tik sok ja jas wax ku'ajtiki, ti wax waj b'a yoj jlukumtik, tsa'an ja kwerpo tiki, wa sjipa ele. 18-20Jaxa kristyano ma' mi lek wax k'umani, yujni mi lek ja ye'na, cho spetsanil k'ak'u mi sb'ejuk ja jas wa'n ek'el a k'ujolexi: Jach' jastal ma' wax milwani, ma jastal ma' wax yi aj sb'aj sok tuktukil ixuk, jach' jastal sk'u'ljel b'a jel kistal, jastal elk'anel, yutjel pilan jmojtik, sle'jel ab'al. Ja Dyosi, mi lek wax yi'aj ja ta yuj k'a ti' oj cho toyjuk yuj ja kristyano jumasa jastal iti.
Jun ixuk mi' judio'uk sk'u'an ja Dyosi
(Mr 7:24-30)
21Ti'xa el ja Jesús ja tiwa, ti waj b'a slujmal ja Tiro sok b'a Sidon. 22Jun ixuk ja b'a chonab' jumasa jawi, tey sok ja nole judio jumasa, wax yalawe sb'aj cananeo jumasa, ti och sta' mojan ja Jesusi, ti yal yab' sok yawanela:
—Kajwal, yuj we'na Mesiasi, talna jya'ujlal ja ke'n cho koltayon. Ja kak'ixi, tey sok jun tan pukuj jel wax a'ji yi' ja wokoli—
23Ja Jesusi, mini t'un skisa'a. Jaxa sneb'uman jumasa ti och sta'e mojana, ti sk'anawe yi pabora.
—Kolta ja ixuk jawi, snajtil ja b'eji ti wa'n jan awanel b'a jpatiktik.
24Ti yala ja Jesusi:
—Ja ke'n sjekunejon ja Dyos b'a kechan ja oj kolta ja israelenio jumasa, ja ye'nle'i lajane sok jastal ch'ayel chej wax kilawe.
25Jaxa ixuk jawi, och smoj lek ja Jesusi, och mek'an b'a sti' sati, ti yal yab'a:
—Kajwal, koltayon.
26Ti alji yab' yuj ja Jesusi:
—Mi sb'ejuk oj japxuk yi ja swa'el ja untikal b'a ja oj a'xuk yi ja ts'i' jumasa.#15:26 Ja ts'i'i jumasa: Ja jach' wax yalawe ja judio jumasa, yuj ja kristyano jumasa ma' mi judio'uki.
27Ti cho yala ja ixuki:
—Kajwal, ja jawi smeranilni'a— Ja ts'i'i, wanix b'ob' yab' ja sts'ub'il swa'el wax mok' yuj ja yajwal b'a yib' smesa.
28Ti alji yab' yuj ja Jesusi:
—Nana, ja we'n wanixa k'u'an lek ja Dyosi— Ja jas a k'anata ki'i, ojni b'ob'uka.
Ti'xta'a, tojb'i ja yak'ix ja ixuki.
Ja Jesusi, ya tojb'uk jitsan ma' mi lek ay
29Cho el ja Jesús ja tiwi, ti k'ot b'a sti' paman ja' b'a Galilea. Tsa'an ti k'e' b'a jun wits ti och kulan tiwi. 30Jitsan kristyano ma' mi lek ay i'ji och yi ja Jesusi. Ja chamum jumasa jawi, ay ma' mix b'ejyi, ma' mix ilwani, ja ma' mix b'ob' b'eyuki, ma' mix k'umani, sok ay jitsan tuktukil chamel. Jaxa Kajwaltik Jesusi, ch'akni ya tojb'uka. 31Jaxa kristyano jumasa jex cham sk'ujole yuj ja yilawe ch'ak tojb'uk spetsanil ja ma'tik mi lek ayi, ti'xa och stoy'e jas Dyos ja israelenio jumasa'a.
Ja Jesusi ya wa' jitsan kristyano
(Mr 8:1-10)
32Ja Jesusi, spaya ja sneb'uman jumasa ti yal yabye a:
—Spetsanil ja kristyano jumasa iti, jel wax talna sya'ujlale. Oxexa k'ak'u ti aye jmoka, sok mey yi'oje swa'ele. Mix k'ana oj wajuke jach' mi wa'eluke, lek xwaj jom sk'ujole b'a b'eji.
33Ti alji yab' yuj ja sneb'uman jumasa:
—Jun chayan lugar jastal ja iti, ¿B'a' oj ta'tik jitsan wa'el b'a oj yab' ja kristyano jumasa iti?
34Ti job'ji yi'e yuj ja Jesusi:
—¿Jaye pan a wi'ojex b'a?
—Juke pan sok chab' oxe yal chay —xchi ja sneb'uman jumasa.
35Jaxa Jesusi, ti yal yab' ja kristyano jumasa a ch'ak ochuke kulan b'a lu'um. 36Tsa'an ti yi'aj ja juke pani, sok ja chab' oxe chayi, sk'ana yi ts'akatal ja Dyosi. Ch'ak sxet' ja pan sok ja chayi, ti ya'yi ja sneb'uman jumasa, jaxa ye'nle'i, ch'ak spil'e yi ja kristyano jumasa. 37Spetsanil ch'ak wa'uke man b'ut'ye lek. Jaxa sts'ub'il janek' kani, b'ut' juke mo'och. 38Ja janek' wa'ye'i, ay mojan chane mil (4,000) winik, pilan ja ixuke sok ja yal untik jumasa.
39Tsa'an ja Jesusi, ti'xa ch'ak sk'um kan ja kristyano jumasa, ti'xa waj k'e' jun barco'a, ti waj b'a jun chonab' sb'i'il Magadan.
S'ha seleccionat:
Mateo 15: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021