Malaquias 3
3
Ja Dyosi, oj sjek ja yalumani
1-2Ja Dyos it jel ja yipi, yalunej:
—K'elawilex ja ma' wax waj yal a wabyex ja jmandari— Ja we'nlexi, waxa majlayex oj k'otuk, ja ye'n b'ejxa ay. Ke'n wax jeka ti wax el b'a stij sat, b'a jach' oj waj schap ja b'eji. Ja yajni mi ja'uk wa'nex sna'jeli, jani k'ak'u jaw ja ti oj ajyukon b'a jnaji. Ke'non ja Dyos it jel ja kipi, ja it ma waxa le'awex ja we'nlexi.
—Ja ma wax jak b'a oj yal a wabyexi, jakumxa. Yaj nix juli, mi ma oj kuch yuj ja yajni sje' sb'aji. —Ja k'ak'u jawi, mi ma oj kuch yuj ja tek'an oj ajyuki— Ja kalumani, ja lajan sok ja k'ak' wax ch'ak stsik el ja sxakil ja tak'in jumasa; lajan sok jastal ja jabon wa sak'a el ja kuxi. 3-4Yaj nix juli, oj och kulan b'a oj skus ja smule jumasa ja yintil jumasa ja Levi, yuja wa'n sak'jel k'anal tak'in sok sakal tak'in b'a k'ak'. B'a jach' oj b'ob' stsik e ki ja majtanal oj ya'we ja swinkil ja chonab' Juda sok ja chonab' Jerusaleni. Jach' oj ya'weki, jastal wax k'ana ja ke'n, jaxa ke'n jel ni tsamal oj ki'a, jach' jastal jel tsamal wax ki'aj yi'e ja jel b'ajtani—.
Ja Dyosi, oj sk'el ja smul ja schonab'ili
5Ja Dyos it jel ja yipi, yalunej:
—Ja we'nlexi, oj ka k'e jun a wokolex. Oj je' jb'aj wax na'a ja jas wa'ne sk'u'lajel ja brujo jumasa, ja ma'tik wa sta'a tuktukil ixuki, ja ma'tik wa sle'a lom ab'ali, ja ma'tik ixta wax yila ja viwuda sok ja meb'a jumasa, ja ma'tik ixta wax yila ja ma'tik mi israelenio'uki, sok ja ma'tik mi skisawoni.
6—Maklayonik lek israelenio jumasa: Ta yuj k'a mitox ch'ak a na'jelex ke'n ja Dyos ja it jel ja kipi sok mix tukb'i ja syajal jk'ujoli. 7Ja we'nlex man yajni ti'to ajyiye ja ma ek' paxta awujilexi, petsanil k'ak'u mixa k'u'anex ja kab'al jumasa. Ta yuj k'a wax sutxi wa k'ujolex oj jakanik jmoki, jach'ni ja ke'n oj cho kumxukon amokex. Ke'n ja Dyos it jel ja kipi, ja jas wax kala yujni jach' oj k'u'l merana.
—Jaxa we'nlexi, ti waxa job'owexki'a: ¿Jasyuj ja t'ilan oj sutxuk ja k'ujoltikon b'a? 8Jaxa ke'n ti wax kala wabyexa: Jel wokol ay ma' oj yelk'anyon; jaxa ja —we'nlexi wanixa welk'ayonexa—
—Jachuk ti'to wa xa job'owex ki'a: ¿Jasunk'a wax kelk'antikon a wi' b'a? wala Chiyex. Maklayik lek ja jas oj kal a wabyexi: —Waxa welk'ayonex yuj ja mixa wa'wex ki ja slajunil ja jas waxa wa'wex eluk ja b'a wa lu'umexi cho mini wa limosna'exi— 9A petsanilex ja we'nlex swinkilex ja niwan chonab'i, a welk'ayonexta; ja' yujil oj ni ko'kab'ajex ja jas kistal'a petsanilexa, cho jach'ni ja wa niwan chonab'ilexi.
10—I'ajik jan b'a jnaj ja slajunil wa jastik a b'ajexi, sok tixa wa'wex och b'a skajonil b'a wax nolxi ja limosna jumasa; b'a jach' mi oj ch'akuk ja wa'el ja tiwi. —Sok ja iti, yilawotikon ta yuj meran— Ti oj ja wil'ex oj jam ja sbentana'il jumasa b'a satk'inali, oj jek a wi'ex tsatsal awasero. 11-12Mi kechanuk ja jawi, ja b'a wa walajexi mini t'un oj ko' schajnula, mi oj sch'ak us ja sb'a'al ja wa walajexi sok ja sat wa ts'usub'exi. Jel tsamal oj ajyuk ja sniwanil wa chonab'ilexi, ja tuk niwak chonab' jumasa spetsanil oj yal'e jel lek ayex. Ke'non ja Dyos it jel ja kipi, ja jas wax kala yujni jach' oj k'u'l merana.
13—Ja we'nlexi, wanixa ta'awonex ti' mi leka, jachuk ti'to waxa job'owex ki'a: ¿Jasunk'a kistal wax kalatikon a b'aj b'a? 14Ja it ja a walunejex jb'aji: Me'y sb'ej ja lom oj ka'teltatik ja Dyos it jel ja yipi. Ta yuj k'a wax le'a jmultik sok ja ye'n, mi sb'ejuk oj cham jk'ujoltik, sok mi jas oj makunuk kujtik ja oj k'u'utik ja yab'al jumasa. 15Wax na'atik lek ja ma' wa stoyo sb'aje tsamal wax ek' yujile ta, cho jach'ni ja ma'tik jel kistal jastale'i, jel lek wax cho ek' yujile; mini b'a oj ja wil wokol wa'n ek'el yujile'a, mini ja yajni wa sta'awe ti kistal ja Dyosi, sok wax ya'we och probar—
Ja sju'un ja Dyosi
16Jaxa ma'tik wa sk'u'ane ja Dyos sok wa skisawe leki, ti och yal sb'aje'a jaxa Dyosi, ti yab'a ja'yuj ti smakla leka, ja'yuj ti yala oj ts'ijb'axuk kan b'a jun ju'un ja sb'i'ile'i, b'a jach' ojto na'xuk ja mas tsa'ani. 17Mi kechanuka, ja Dyosi, cho yala jastal it yuj ja ye'nle'i:
—Jakumxa ja k'ak'u oj choj b'ajuke ja ye'nle'i. Ja ye'nle'i, lajane sok jastal jun tak'in b'a tsa'ub'ali, sok mini jun kistal oj k'u'l yi'e'a; jach' oj kil'e' jastal jun tatal wax yila lek ja yuntikil b'a wax makuni lek yuji. 18Ja'yuj ja we'nlexi, oj ni a wil'exa, jun majke smoj, mini jun xta ja b'a lek sok ja b'a kistal, sok ja ma wa sk'u'an ja Dyos sok ja ma mi wa sk'u'ani—.
S'ha seleccionat:
Malaquias 3: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021