Malaquias 2
2
Ja Dyosi, ya stup ja smul ja pagre jumasa
1Ja rason iti, a b'aj we'nlex pagre jumasa: 2-3Ta yuj mixa k'u'anonex sok mik'a cho a neb'awex jastal oj ja kis'onex, ja ke'n mi lek oj kil'ex. Ta yuj k'a mi tojuk waxa toyowonex, oj ka sutxuk mi lekuk ja slekil jk'ujol jumasa a mokexi. Mi kechanuka, oj ka eluk a wi'ex ja wa wa'telexi, ti oj b'ats b'a wa satex ja sk'oy ja chante jumasa it waxa tsikawexki b'a jmajtani. —Jachuk ti oj mesjanik el ja we'nlex lajan sok ja sk'oy ja chante jawi— Ke'n ja Dyos it jel ja kipi, ja jas wax kala yujni jach' oj k'u'l merana.
4-5—Yuj ja lom wax kala wabyex ja iti, ja yuj ja wax k'ana oj ja na'ex oj k'u'l meran ja trato jk'u'lunej sok ja Levi, ma ek' paxta a wujilexi. Ja b'a trato jawi, kala yab' oj ka'yi sak'anil sok jel laman oj ajyuk; Jaxa ye'n ja Levi, yala kab' oj skis'on lek sok oj stoy'on lek, jach'ni sk'u'lana. Ke'n ja Dyos it jel ja kipi, ja jas wax kala yujni jach' waj merana. 6Ja Levi, mini nunka b'a slo'la ja kristyano'i, loke sk'u'lani, sje'ayi ja smeranili; tola bida jel gusto ajyi jmok, sok jun winik jel toj ajyi, jel jitsan ya eluk ja ma' ti aye b'a yoj mi leki.
7—Ja we'nlex pagre jumasa we'n waxa walawex ek' ja kab'ali. Ja wa cholex ja oj ja je'ex yi ja mandar jumasa ja ma wa sle'awoni. 8Jaxa we'nlexi, a wa'wexta kan sk'u'lajel ja b'a leki; sok ja skistalil wa jastalexi, jel xa jitsan a wa'wexta sle smul ja kristyano jumasa, sok mixa waxa k'u'anex ja trato jk'u'lunej sok ja Levi. Ke'non ja Dyos it jel ja kipi, wax kala wabyex yujni jach'ni oj k'u'l merana.
9—Ta yuj wax ka yixtala'ukex ja kristyano jumasa sok ch'aytak'a sk'ujole ja jastal was kisawex ajyi, yuj we'n me'xa k'u'anonex, sok mila ajyiyex toj sok spetsanil ja wa mojex jumasa—.
Ja tuktukil tik'e nupaneli
10Ja ke'n Malaquias, jach' wax kala jastal iti:
—Jpetsaniltik ja ke'ntiki, junxta ja ma ek' paxta kujtiki. Sok jpetsaniltik ja ke'ntiki, kechani june ja Dyos ma' sk'u'lanotiki. Ta yuj k'a jach' jastal iti, ¿Jasyuj ja lom wax lo'la jb'ajtik sok ja tuk jumasa b'a? ¿Jasyuj ja mix ka'tik kaso ja trato sk'u'lan ja Dyos sok ja ma ek' paxta kujtik b'a? 11—Jpetsaniltik ja janek'otik b'a Juda, sok ja b'a israeli mini t'un tojuk ajyitik sok ja Dyosi. Jpetsaniltik jel k'ixwela sb'aj ja jas jk'u'lantik b'a Jerusaleni, ja b'a mismo snajtsil ja tsomjel b'a jel wa syajta ja Dyosi— Ja winik jumasa b'a Juda wax nupaniye sok ixuke jumasa b'a wa sk'u'ane tuktukil dyos, 12-14jachuk ti'to waxa job'owexa, jasyuj ja mixax yi'aj lek ja smajtan ja Dyos wax a'xi yi'i. Ja ya'n, —a sch'ak sna'jel ja Dyos ja ma' jach' wa'n sk'u'lajel jastal jawi, mi ma' yochel ta oj yi'e jan jitsan majtanal ma oj sb'ut' e ya'lel sate b'a yaltari. Cho a sch'ay sna'jel ja ma'tik oj yil ja iti, mi jas oj b'ob' sk'u'luke altiro b'a oj yal'e mi oj b'ob'uki—
—Ja Dyosi, yilata spetsanil ja jas waxa k'u'lanex ja we'nlexi: Ja yajni keremexto nupaniyexi, a walawex oj ajyanik toj sok wa che'umexi. Pero mini yuj waxa k'u'lanex meran ja jas a walawexa. 15-16Ja Dyosi, sk'u'lanotik b'a kechan jun jkwerpo'tik oj ajyukotik sok kechan jun espiritu. Jach' sk'u'lanotik jastal jawi, b'a june ita oj ajyukotik jpetsaniltik b'a toj oj ajyukotik sok ja ye'n. Ja Dyos kujtiki mi lek wax yila ja ma' jel tsats wax ya'a sb'aj wa sjipa kan ja sche'umi. —Ja'yujil talna lek a b'ajex ajyanik toj sok wa che'umexi.
17—Ja Dyos kujtiki, axwita yuj ja jastal jel wala ochyex parte soki. Sok waxa wa'wex axwuk ja kwando waxa walawex ja Dyosi, mi lekuk ja lom lek wax yila ja ma'tik jel malo ja smodo'e'i.
S'ha seleccionat:
Malaquias 2: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021