ROMA 7
7
Na uku lii lalei lii mangoma ba ngerangu-ya
1Angu dedi! Nyimi mbuu ndàbami mbàda pimami-nyaka na uku. Jia ba tuna mipi-manya na-jorutu-na na uku la haàtu tau, mbulungu-ana la ngala lurina. 2Ngera hama tuna, na haàtu kawini maningu leina, na-jorutu-ya uku la mini leina mbulungu la ngala lurina na mini lei-ana. Jàka nameti-ka na mini leina pahàlangu-nanyaka duna na papaha-na welingu la jorutu-nanya uku la mini leina. 3Jàka na-papohungu dàngu mini haàtu ba naluri-ipa na leina, njuraku-nanya wànanya. Na nyuna jàka nameti-ka na leina, pa-namatu-nya la uku, kawini jua-yaka duna nyuna. Tàka jàka naleingu mini haàtu, nda njuraku-ananya. 4Tuna numbu na ngerami nyimi angu dedi. Mbàda meti pahàlangu-mika welingu la uku anggama Yahundi, ba mbàda papambulungu-kaika dàngu na ihina i Karitu, tàka hi namangu-nggai paraïna Nyuna na pambàda paluri beli welingu la meti. Hi paluri beliya Nyuna welingu la meti ka ningu lingunda lai Ala la lurinda. 5Nadu àmangu taluri nunjuya na hada tau. La rehi nu da parinju etinda da manjala da ma-miripu la etinda rukuna ba ninya na uku anggama, jiaha da ma-manyori daa la wikinda. Tuna nuduka hi tawunda-ha da ma-orangu la meti. 6Na nyuna nàhu nda na-jorutu-atapa uku anggama Yahundi. Meti pahàlangu-ndanyaka la uku na ma-taukuta àmangu. Nda tarajaku pa-namatungu-apa hama tuna na pawàngu la ma-wungangu, ba pa-namatu-nya na uku na pa-tulihu. Tàka nàhu rajaku pa-namatungu-ndanyaka la pawàngu na mabidi na papaita-nanda na Ngahuna i Ala.
Na uku dàngu na njala
7Jàka tuna nu, nggikina wàndaka bàdi? Na-kajàliku na uku anggama Yahundi wàndaka? Nda hidama! Na nyuna jiaya na ukuma na ma-papeka-ngga rukuna na njala. Nda kupi-anya duku làti jàka nggàraya duna na malumbangu, “Àmbu malumbangu,” jàka nda wàna na uku anggama. 8Welingu la uku anggama, na-ngalangu ma-kalongga na njala la pa-pamiripu màtu - màti pati-kingu la pa-malumbangu daa la etinggu; nadu jàka nda ninya làti na uku anggama, ka meti-nanyaka na njala. 9Àmangu kuluri mangu nda ningu uku anggamangu. Tàka ba ninyaka na uku anggama pakiringu-nanyaka paluri na njala, 10tàka nyungga meti-nggunyaka. Tàka na uku anggama na paluri wàngu ba wànda làti na pawuku la mangilu-na, hi jia bia-yaika na maparuu-ngganya na meti. 11Maa ba na-hadangu-ya welingu la uku anggama-du hi na-ngalangu manggawangu na njala la pa-panyonga-ka dàngu la papa-metika.
12Na uku anggama ma-pawelingu lai Alaya, nimbihu-da da hupu lii daa la uku welida lai Ala, ba tuna damola dàngu dahàmu-ma. 13Màla, ka jiaya na mahàmu-ka ihu nu na ma-patàka-ngganya na pameti wàngu? Jiangu-ma ba ndia-a! Jiaya na njalama duna na ma-patàka-nya na pameti wàngu. Ba nawàngu pawànya na mahàmu, na patàka-ngganya na meti paraï njala, ka peku lohanguda da hadana na njala. Welingu la hupu liina i Ala hi itaya ba kanjupu akatu-ya na njala.
Da ma-pandubaku daa la wikina na tau
14Tapi-manya ba ma-pawelingu la Ngahuna i Alaya na uku anggama Yahundi; tàka nyungga tau maluputu-aka duku. Pambàda danggangu-kaka la panjadi ata njala. 15Nadu nyungga wiki nda kupi-anya na pawunda-nggu. Da pambuha-nggu da pawunda ba wànggu làti, nda jia-aha da pawunda-nggu, tàka pàku da pa-karaü-nggu eti, jia nihai da pawunda-nggu. 16Nu ba tuna, jàka kuwu-ndaha da ma-pahilitu la pambuha-nggu, nahàmu na uku anggama Yahundi, wànggu-duka nu. 17Jia ba tuna, nda nyungga-apa duku mawunda-ha nuda, tàka jiaya na njala na matauku-ka duna na mawunda-ha nuda. 18Kupi-manya ba nda ana haua mahàmu daa la wikinggu; nu la huri etinggu la hada tau-nggu. Maa ba rinjungu-manggunya làti pawunda mahàmu tàka nda ku-duluku-a la pawundaya. 19Nda kuwunda-aya na mahàmu na pawunda ba wànggu làti; tàka hi wunda ni bia-ngguhai da ma-akatu da panda mbuhanggu pawunda-ha. 20Jàka kuwunda niha da panda mbuhanggu, nu nda nyungga-a duku mawunda-ha nuda, tàka jiaya na njala na matauku-ka na mawunda-ha.
21Jia ba tuna, ku-pambulu-nya ba kuka-nandinya ba jiaya na lawiti yiana na ma-manyori: nu, ka wundaya na mahàmu jàka wàngguka, jiaya na ma-akatu-ma-a na ma-kawudaku daa lai nyungga. 22Na wini eti-nggu nambuha-manya na Ukuna i Ala, 23na nyuna kupàda-manya ba ninya na hili hau uku na ma-manyori daa la wikinggu – nu na uku na ma-patumbaru dànya na uku pa-pajia-na na pangàda etinggu. Tuna nuduka hi ku-kadupulu niya na uku njala na ma-manyori daa la wikinggu. 24-26Nu ba tuna, tuna yia na manggàna-ka nyungga: kuka-radaku wàngu eti dihanggu la Ukuna i Ala, tàka ku-rajaku wàngu huri eti taunggu la njala. Ai inai na ngera-angguka duku! Nggamu-aka na ma-pahàla-ka welingu la tàda ihinggu yiana na mangàndi-ka la meti? Malangu-na i Ala! Ba na-mbuhangu pa-pahàla-ka rukuna i Yehu Karitu.
S'ha seleccionat:
ROMA 7: KAM
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
@LAI 1995 Indonesian Bible Society (Lembaga Alkitab Indonesia)