NA RUKUDA DA PA-PAHURUNGU 9
9
Na panjilungu-na i Hauluhu
(Pphr. 22:6-16, 26:12-18)
1Ba talànga tunaka nu i Hauluhu pangalangu-mananya la pa-pangàdu-nya dàngu la pa-pameti-ha da ma-kikungu lai Miri Yehu. Nalua la ratu bokulu, 2pakarai huratu kuaha la palua ngàndinja da amaboku - amabokulu la uma bungguru tau Yahundi la Ndamàhiku, jàka era hungguna lai nu tau mawaiya i Yehu, ka peku yàpa-naha ka ngàndiha la Yeruhali.
3Ba talànga hanggangu-naka la Ndamàhiku, ba na-mareni-nyaka na paraingu, hi jia tapanjiru winggiru bia-nanya ma-kajilaku welingu la awangu i Hauluhu. 4Ka pàngi wàna madua-ka la tana, hi narongu lii mapanii dànya, “Hauluhu, ha Hauluhu! Nggikina hiu pa-mayila-ka?” wànanya.
5“Ka nggamukau Miri?” hi wàna i Hauluhu.
Napaya na mangu liingu, “Nyunggadu, Yehu, na pa-mayila-mu. 6Tàka nàhu hadangu-wa kau tama la paraingu. Lai nu napa ka panii-nggauka jàka nggàra ula-muka napa,” wànanya.
7Da tau da malaku karia-nya i Hauluhu, da-katàtaku hi lupa nda dahilu pingu pa-kareuku; nadu darongu-ya na lii nuna tàka nda ningu haàtu paita-da. 8Ka ndolaku-nanyaka i Hauluhu hi na-pabula-nja da matana, tàka nda nggàrapa paita-da da matana. Ka yàpa-danyaka na limana, hi dalonda-ya patama la Ndamàhiku. 9Tailu mbua loduna ba nda peku ngitana, nu ba mandai tuna nu nda nangangu nda na-ngunungu-a.
10La Ndamàhiku ninya na haàtu na tau na ma-kikungu lai Miri Yehu, na ma-tamungu Anania. La harii mata naita-ya i Miri ba napanii dànya, “Anania!” wànanya.
Nahema i Anania, “O Miri!” wàna.
11I Miri napanii, “Hadangu-wa nu. Kau lua la umana i Yundahu la Ànda Kunduhu. Kau paàra-nya lai nu na tau na ma-tamungu Hauluhu na ma-pawelingu la paraingu Tàruhu. Nyuna nu talànga hamayangu-na, 12nu la harii mata naita-mayaka na tau, na ma-tamungu Anania, na mamai lai nyuna hi na-padambaku-nya lima ka peku ngita belina,” wànanya.
13Nahema i Anania, “Miri, dangu-maka parongu-nggu nyungga rukuna na tau nuna ri - rihi na ruku pa-mayila-nanya na kabungguru-mu la Yeruhali. 14Tàka nàhu mai-nanyaka lai Yehu paraï ruku pulingu-da da ratu kapala la payàpa hàlaya na tau na mapawai lai Nyumu,” wàna.
15Tàka nanapa-ya i Miri, “Luawa nyuna na! Nadu jàka jiaya nyuna ba pindi-manggu-nyaka la palumu-ngga Nyungga, ka na-bobaru-ya na rukunggu Nyungga la ba - banjaru hawiangu na manda katangu anggama Yahundi dàngu la hanganji - hanganji hamanai la banjaru Ihirailu-mbu. 16Dàngu napa Nyungga wikima ma-paita-nya na mayila na pa-hambeta-na lumungga Nyungga,” wàna.
17Ka lua-nanyaka i Anania la uma nuna hi na-padambaku-nya lima i Hauluhu, “Angu dedi Hauluhu,” wànanya, “i Miri Yehu na paita-mu la padua ànda bau pa-maingu nàmu, Nyuna na ma-palewa-ka pamai ka peku ita belimu dàngu ka peku kuaha-nanggau na Ngahuna i Ala, wàna,” hi wànanya. 18Ndedi mbàdiku-na la rehi nuna-ma-duaka ba hama nepi iyangu-ya na ma-kawàraku welingu la matana i Hauluhu, ka ita beli-madua-nanyaka. Hadangu-nanyaka hi parunu-nya. 19Ba nahàla-ka pangangu, àtalu beli-nanyaka.
I Hauluhu ba na-ajaru la Ndamàhiku
I Hauluhu na-ndàdiku dànja la Ndamàhiku da ma-kikungu lai Yehu ràkangu ana pira mbua loduna. 20Ka hàngu laku-ma-ananya la uma - uma bungguru hi na-pakiringu pa-bobaru-ya nu i Yehu ba Ana Alaya.
21Da-hangàtaru hàla ba da-ronguya i Hauluhu. Dapanii, “Ka nda jiaya ni la Yeruhali na ma-pameti hàlaya na tau na mapawai lai Yehu? Hi namai lai yiahu ba jiaya nuna-madui ka yàpaha dàngu ka ngàndiha la ratu - ratu kapala wàna!” wàda.
22Tàka i Hauluhu parukangu-mananya pa-pangaru. Dangu ma-paihikungu pa-wàlahu-na na ma-pakaràngi-ya na rukuna i Yehu ba Hanganji Pa-mànangu-ya, hi lupa nda peku pandia-danya paraï da tau Yahundi da maninja la Ndamàhiku.
23Palàngangu-ka pi - pira mandaina, pahamangu-danyaka da tau Yahundi la pa-pameti-ya i Hauluhu. 24Tàka nuna na pa-pakaka-da nalu pinya. Rudungu lodu dadaiya na pindu bokulu ka pameti-ya ba wàda. 25La hau na rudungu da tau da makiku-nya i Hauluhu, da-pahama dànya hi da-papuru wànya katanga la hambeli kangeli paraingu.
I Hauluhu la Yeruhali
26Ka laku-nanyaka i Hauluhu la Yeruhali, lai nu hi na-pamukarungu pa-pakorungu lai nyuda da ma-kikungu lai Yehu. Tàka nyuda da-mangàdatu-nya, nadu ba nda datika pawaiya nyuna ba ma-kikungu langatàka-yaka lai Yehu. 27Tunaka nu namai tomaya paraïna i Mbàranamba, hi na-karia-nya la pa-pahurungu. Ka wàlahu-nanyaka i Mbàranamba lai nyuda na rukuna i Hauluhu ba naita-ya i Miri la padua ànda dàngu nggiki hamana ba napanii dànya paraïna i Miri. Dàngu na-wàlahu-mbuya na rukuna i Hauluhu ba natoru mbeni etina la Ndamàhiku pa-ajaru wànya na tamuna i Yehu. 28Ka pa-engangu-nanyaka i Hauluhu lai nyuda, dàngu natoru mbeni pa-pabobarungu la nggubulu Yeruhali na tamuna i Miri. 29Na-kareuku dàngu na-parawaku dànja da tau Yahundi da mahilu Yunani, ba tuna da-patikingu la pa-pameti-ya nyuna. 30Ba dapi-nyaka na rukuna nuna paraï da tau mapawai hawiangu, ka karia-danyaka i Hauluhu la Kaiharia, tunaka nu hi da-paràha-nya la Tàruhu.
31Ka ngudu-nanyaka na kabungguru la nggubulu Yundia, Nggalilia dàngu Hamaria. Ruku pa-ndulangu-na na Ngahuna i Ala, ba dàngu mangàdatu-danya i Miri, da kabunggu - kabungguru lai nu parukangu-danyaka pa-kapànduku dàngu pa-bonjangu.
I Peturu la Lida dàngu la Yopi
32I Peturu nalaku lai nu - lai nu pa-tadalu-ha da kabunggu - kabungguru. Handàka la hau lodu i Peturu nalua pa-tadalu-ya na kabungguru-na i Miri na maninya la Lida. 33Lai nu na-pahàmburu dànya na haàtu na tau mini, na ma-tamungu Enia, na ma-kaliparu, nda na-hadangu-mapa welingu la ngia pa-katuda-na, walu mbua ndau-manaka ba tuna nu. 34I Peturu napanii dànya i Enia, “Ha Enia, i Yehu Karitu na-mapamàlaru-kau. Hadangu-wa kau paloku-ya na ngia pa-katuda-mu,” wànanya. Ndedi mbàdiku-na hadangu-nanyaka i Enia. 35Mbuu ndàbada da ma-ngiangu la Lida dàngu la Harungu daita-ya i Enia, nu ka wai-madua-danyaka i Miri.
36La Yopi ninya na haàtu na tau kawini, na ma-tamungu Tambita. Nyuna tau mapawai lai Miri Yehuya. (Na tamuna la hilu Yunani Ndòrukàhu, la hilunda nyuta ruha, wàna.) Nyuna nawunda mànu mahàmu la anguna dàngu nandula tau mila. 37La rehi nu nahidu, hi nameti. Ba daihu-yaka hi da-bànjalu-ya la kuru dita. 38La Yopi nda nggi tuana marauna welingu la Lida. Jia ba tuna ba darongu-ka da ma-kikungu lai Yehu la Yopi ba ninya i Peturu la Lida, palewa-danyaka tau madua mangàndi-nya lii yiana, “Lu mai parenggangu nàmu,” wàdanya. 39Ka ailulu hadangu-madua-nanyaka i Peturu hi natundu-nja nyuda. Ba natàka-ka lai nu, hei karia-danyaka la kuru dita. Mbuu ndàbada da kawini meti lei lai nu da-langgungguru-nya i Peturu dàngu hiida, ba da-paita-nya da kalembi kudu kalembi bokulu pautu-nanja paraïna i Ndòrukàhu ba naluri-pa. 40I Peturu na-paràha hàlanja paluhu. Hàla patika-nanyaka ba na-hamayangu. Hàlaka nu hi nahangga-nya na metina i Ndòrukàhu, “Tambita, hadangu!” wànanya. Ka bunggahu-nahaka da matana i Ndòrukàhu, ba naitaya-ka i Peturu, uhuku-nanyaka. 41Tàka i Peturu hi nayàpa-ya na limana, hi nandula-ya la pa-ndolaku. Tunaka nu i Peturu hi napaau-nja da tau mapawai dàngu da kawini meti lei da maninja hi na-pakata-nya i Ndòrukàhu lai nyuda ba luri-nanyaka. 42Na lii rukuna nuna nakada hàlanya tau la Yopi, hi lupa nadangu na tau na mapawai lai Yehu ba Hanganji Pa-mànangu-ya. 43I Peturu na-ndàdiku-pa lai nu ana pira mbua lodu la umana na haàtu na tau na mandongu manulangu, na ma-tamungu Himungu.
S'ha seleccionat:
NA RUKUDA DA PA-PAHURUNGU 9: KAM
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
@LAI 1995 Indonesian Bible Society (Lembaga Alkitab Indonesia)