NA RUKUDA DA PA-PAHURUNGU 8
8
1Nahàmu-mbu na etina i Hauluhu ba pameti tudanya nu.
I Hauluhu ba na-pamayila-ya na kabungguru
La lodu nunama ba pakiringu panya - nyaraya na kabungguru la Yeruhali, hi lupa mbuu ndàbana na tau na mapawai, hinggilu-da da pa-pahurungu hau iha - hau iha-naka la nggubulu tana Yundia dàngu Hamaria. 2Da tau da ma-mangàdatu-nya i Ala datani-nya i Hitipanu, dàngu da hii paduduru-nya ba dira hawina-ha.
3Tàka nutakungu-mananya i Hauluhu pa-palàjaru-ya na kabungguru. Na-nimbihu-ha da hau uma - hau uma hi na-ruruhu-ha la hambeli da tau pawai, hàla hi napuhi-ha la uma kapàtangu.
Na Lii Mànangu welingu lai Ala ba bobaru-ya la Hamaria
4Da tau da mapawai da ma-paihangu da-bobaru-ya na Lii Mànangu welingu lai Ala la nggi - nggini. 5I Pilipu nalaku la paraingu#paraingu; da pa-haleli ndai da manda pirada: da paraingu ma-manuha la. Hamaria hi na-bobaru-ya la tau lai nu rukuna na Hanganji Pa-mànangu na paràndi-na i Ala. 6Ba darongu-yaka tau na papanii-na i Pilipu dàngu ba daita-haka da pa-hangàtarungu da pa-patumbu-na, nadangu welingu lai nyuda da ma-tanaü-ya jàka nggàraya na papanii-na i Pilipu. 7Nadu ba daluhu-duka da wàndi akatu ba la - ladada welingu la tau dangu da pa-huruku wàndi akatu. Da tau kaliparu dàngu da tau kanjiku dadangu-mbu da pa-pamàlaru. 8Da tau la Hamaria da-hawola langatàka.
9La paraingu lai nu ninya na haàtu na tau mini na ma-tamungu Himungu, mbàda mandai-manaka ba na-pamaratangu-ya na tau Hamaria paraï ruku pinguna kabeli mata. Napeka-nja nyuda ba tau nda ningu hamangu-ya nyuna. 10Mbuu ndàbana na tau la paraingu lai nu, nggubulu-na da-patingi hàlanya nyuna, “Na tau yiana jia-yaka na kapàru-na i Ala, ‘na Mambiha manyola’ ba wàndanya,” wàda. 11Mandai-manaka ba na-pamaratangu-ya na tau paraï ruku kabeli matana, jia-duyaka hi kanjupu eti wàdanya. 12Tàka i Pilipu na-bobaru-nja nyuda rukuna na Lii Mànangu jàka nggikina i Ala ba na-pareta ba hanganji-ya dàngu rukuna i Yehu Karitu, na Hanganji Pa-mànangu. Dawaiya na lii pa-patàka-na i Pilipu, hàla hi na-parunu-nja, – mini-yakai kawini-yakai. 13Jiapa i Himungu-kadu napawai-mbu. Dàngu ba hàlaka pa-parunu-nya, kiku pangala madua-nanyaka i Pilipu. Da tanda mbiha da manjadi jia-mahaka da pa-hangàtaru wàna i Himungu.
14Da pa-pahurungu la Yeruhali mbàda rongu-daka, da tau Hamaria da-kataku-yaka na pulu na i Ala. Jia-duyaka hi da-palewa-ha i Peturu dàngu i Yuhani lai nàhu. 15Ba datàka-ka i Peturu dàngu i Yuhani, hi da-hamaya-nja tungguda da tau Hamaria, ka da-ngalangu Ngahuna i Ala, 16nadu na Ngahuna i Ala ndedi haàtu-mapa pa-kuaha lai nyuda ngia pamaina, ba hina-apa parunu-nja la tamuna i Miri Yehu. 17Hàla i Peturu dàngu i Yuhani da-padambaku-nja lima da tau Hamaria, hi da-ngalangu Ngahuna i Ala.
18Nuna nu naita-ya paraïna i Himungu hi kiri wuanja Ngahuna i Ala nuda da tau, ba ruku pa-dambaku-danja lima paraï da pa-pahurungu. Tuna nuduka hi nangàndi-nja àmahu i Peturu dàngu i Yuhani. 19Hi napanii, “Wuangga duku kuaha tungu nu, ka pekuna jàka ku-padambaku-nya lima ka lai nggamu biaya ka na-ngalangu Ngahuna i Ala,” wàna.
20Tàka nahema i Peturu, “Hanggàmaru-munyaka dàngu da àmahu-mu! Bau kakaya na pawua-na i Ala ràka pakei wàngu àmahu-ya? 21Nda ningua hàkumu nyumu la pakiku-nya na paràma-ma nyuma, nadu na etimu nda na pa-deningu hanggangu lai Ala. 22Jia ba tuna nu, dunjaku-nya nuna na pawuku-mu na ma-akatu, dàngu karaiya i Miri ka najàma-nya na kanandingu-mu na ma-akatu! 23Nadu ba kupi-manggau nyumu ba na-pakilitungu na etimu dàngu ba naata-nggau paraï ma-akatu,” wànanya.
24Hàla i Himungu hi nakarai-ha i Peturu dàngu i Yuhani, “Màla ndula àruka angu dedi ka àmbu ningu haumbu manggàna-ka welingu nudaka da papanii-mi,” wànanja.
25Tunaka nu ba dahàla-ka pa-hakahii-nya dàngu pa-bobaru-ya na puluna i Miri, beli-danyaka i Peturu dàngu i Yuhani la Yeruhali. Nàhu la ànda bobaru-madanya na Lii Mànangu la kota - kotaku Hamaria.
I Pilipu dàngu na haàtu na panggawi bokulu la Etiopia
26Na haàtu na papalewa-na i Miri napeka-nya i Pilipu, “Màla hadangu! Kau laku hu luru#hu luru; jàka ndia: la tidu lodu. la ànda na ma-welingu la Yeruhali hanggangu la Nggaha,” wànanya. Na-malinggitu nuna na ànda.#Na-malinggitu nuna na ànda; jàka ndia: nda pali-ayapa nàhu nuna na ànda. 27-28Ka laku-nanyaka i Pilipu. La rehi nu ninya na haàtu na panggawi la uma hanganji Etiopia, talànga nàhunya ba nabeli la tanana. Na tau nuna haàtu panggawi bokulu-ya, ba nyuna-duka na mahangga-nja da bandana i Kandaki, na hanganji kawini la Etiopia. Nyuna welina la Yeruhali palumu-nya i Ala, nàhu beli wàngu-nanyaka kareta-na. Ba dàngu mandapu-na nu la kareta-na, mbaha-nanyaka na mbukuna i Wunangu Yahaya. 29Na Ngahuna i Ala napeka-nya i Pilipu, “Lua kau lihinya na kareta,” wànanya. 30Ka lua-nanyaka i Pilipu hi nalihi-nya na kareta, hi narongu-ya na tau nuna ba mbaha-nanya na Mbukuna i Yahaya. Hi na-paàra-nya paraïna i Pilipu, “Màla mupinya nu umbu na pambaha-mu?” wànanya.
31Nahema na tau nuna, “Nggiki hama pi-nggunyaka, jàka nda ningu ma-pakaloka-ngganya?” hi wàna. Ka wànda-nanyaka i Pilipu pahei la kareta, hi da-mandapu papera. 32Yiadaha da ndalaru da pambaha-na,
“Nyuna beri mbimbi pa-welingu la parupu-ya,
beri ana mbimbi na manda kabia ba nggutinya na wulu ihina,
tuna nu Nyuna ba nda ana wundana hau kareuku-na.
33Nyuna da-paaka-nya dàngu da-lapiya.
Na lurina pa-butuhu-ya welingu la pinu tana
hi lupa nda ningu-apa haàtu mapanii-ya na dedina,” wàna.
34Nuna na panggawi bokulu welingu la Etiopia napanii lai Pilipu, “Màla làti kau paniingga nggamuya duna na pawuku-na na wunangu? Panii-nanya na wai ngera wikina jàka ndia hi wai ngera haàtu?” wàna. 35Ka pakiringu-nanyaka pa-kareuku i Pilipu; na-pakiri wànja da ndalaru nuda kawai ba na-bobaru-ya na Lii Mànangu na rukuna i Yehu la panggawi bokulu nuna. 36Nàhu la padua ànda tàka-danyaka la hau pangia na maningu waingu. Napanii nuna na panggawi, “Tàngaru-ya nina na wai! Màla ningupa nu ma-pabetangu ka parunu-ngga nyungga?” wàna.
[37Napaya i Pilipu, “Umbu, jàka weli eti-madumu papawai, peku-manaka ka parunu-nggau,” hi wànanya.
“Kuwaiya i Yehu Karitu ba Ana Alaya,” wànaka nuna na panggawi bokulu Etiopia.]
38Hi na-paràhangu papàtu-ya na kareta-na; tunaka nu puru-danyaka nyuda i Pilipu dàngu nuna na panggawi bokulu, datama la wai, tàka i Pilipu hi na-parunu-nya nyuna. 39Ba dadita-ka welingu la wai, pamuna-nanyaka i Pilipu paraïna Ngahuna i Ala, welingu lai nu. Na panggawi bokulu Etiopia nda naita-ayapa nyuna. Dàngu nggaüru etina na panggawi bokulu nuna pangala-nanyaka na àndana. 40Hi jia mbàda ni bianya i Pilipu la Àndutu. Dàngu ba na-pangala-nyaka na àndana, bobaru-nanyaka na Lii Mànangu rukuna i Yehu la mbuu ndàba paraingu lupa nataka la Kaiharia.
S'ha seleccionat:
NA RUKUDA DA PA-PAHURUNGU 8: KAM
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
@LAI 1995 Indonesian Bible Society (Lembaga Alkitab Indonesia)