सभोपदेशक 4
4
1फेर मन्नै वो सारा अंधेर देख्या जो सूरज कै नीच्चै होवै सै। अर के देख्या, के अंधेर सहण आळयां के आँसू बहण लागरे सै, अर उन ताहीं कोए शान्ति देण आळा कोनी! अंधेर करण आळयां के हाथ म्ह ताकत थी, पर उन ताहीं कोए शान्ति देण आळा न्ही था। 2इस करकै मन्नै मरे होयां ताहीं जो मरगें सै, उन जिन्दयां तै जो इब तक जिन्दा सै घणा धन्य कह्या; 3बल्के उन दोनुवां तै घणा आच्छा वो सै जो इब ताहीं पैदा ए न्ही होया, ना ये बुरे काम देक्खे जो सूरज कै नीच्चै होवै सै।
मतलबी मेहनत भी बेकार सै
4फेर मन्नै सारे मेहनत के काम अर सारे सफल काम्मां ताहीं देख्या जो लोग अपणे पड़ोसी तै जळण कै कारण करै सै। यो भी बेकार अर हवा नै पकड़ण के जिसा सै।
5बेकूफ छात्ती पै हाथ धरे रहवै अर मान्नो बिना काम करे अपणे आप नै खतम करै सै#4:5 अपणा ए माँस खावै सै।
6चैन की गैल एक मुट्ठी उन दो मुट्ठियाँ तै आच्छी सै, जिनकी गैल मेहनत अर हवा नै पकड़णा हो।
7फेर मन्नै सूरज कै नीच्चै यो भी बेकार बात देक्खी। 8कोए एक्ला रहवै अर उसका कोए न्ही सै; ना उसका बेट्टा सै, ना भाई सै, फेर भी उसकी मेहनत का अन्त न्ही होन्दा; ना उसकी आँख धन तै छिकदी, अर ना वो कहवै सै, मै किसकी खात्तर मेहनत करुँ अर अपणी जिन्दगी नै दुखी राक्खूँ सूं? यो भी बेकार अर कती दुख भरया काम सै।
मित्तर का मोल
9एक तै दो भले सै, क्यूँके उनकी मेहनत का आच्छा फळ मिलै सै। 10क्यूँके जै उन म्ह तै एक गिरै, तो दूसरा उस नै ठावैगा; पर हाय उसपै जो एक्ला होकै गिरै अर उसका कोए ठाणिया ना हो। 11फेर जै दो जणे कठ्ठे सोवै तो वे गरम रहवैंगे, पर कोए एक्ला किस तरियां गरम हो सकै सै? 12जै कोए एक्ले पै हावी हो तो हो, पर दो उसका मुकाबला कर सकैगें। जो डोरी तीन ताघयां तै बटी हो तो वो ताव्ळी न्ही टूटदी।
मशहुर होन्दे जाणा
13बुद्धिमान जवान गरीब होण पै भी इसे बूढ़े अर बेकूफ राजा तै घणा बढ़िया सै जो सलाह न्ही लेन्दा, 14चाहे वो उसके राज्य म्ह गरीब पैदा होया हो, या जेळ म्ह तै लिकड़कै राजा बण्या हो। 15मन्नै सारे जिन्दयां ताहीं जो सूरज कै नीच्चै चाल्लै-फिरै सै देख्या के वे उस राजा बणाण आळे जवान कै गैल हो लिये सै जो उनकी जगहां लेण की खात्तर खड्या होया। 16वे सारे माणस अनगिणत थे जिनपै वो प्रधान होया था। फेर भी आण आळे बखत म्ह नई पीढ़ी के माणस उसके कारण खुश न्ही होवैंगे। बे-शक यो भी बेकार अर हवा नै पकड़णा सै।
S'ha seleccionat:
सभोपदेशक 4: BGC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.