सभोपदेशक 3
3
हर बात का अपणा बखत
1हर एक बात का एक मौक्का अर हरेक काम का, जो आसमान कै नीच्चै होवै सै, एक बखत सै।
2जन्म का बखत अर मरण का भी बखत;
बोण का बखत, अर बोए होए नै उखाड़ण का भी बखत होवै सै,
3घाव देण का बखत, अर चंगा करण का भी बखत;
गिरा देण का बखत, अर बणाण का भी बखत होवै सै;
4रोण का बखत, अर हाँसण का भी बखत;
छात्ती पीटण का बखत, अर नाचण का भी बखत होवै सै;
5पत्थर फैक्कण का बखत, अर पत्थर बटोरण का भी बखत;
गळे लगाण का बखत, अर गळे लगाण तै रुकण का भी बखत होवै सै;
6ढूँढ़ण का बखत अर खो देण का भी बखत;
बचा राक्खण का बखत अर फेंक देण का भी बखत होवै सै;
7पाड़ण का बखत अर सिम्मण का भी बखत;
चुप रहण का बखत अर बोल्लण का भी बखत होवै सै;
8प्यार करण का बखत अर बैर करण का भी बखत;
लड़ाई का बखत अर मेल का भी बखत होवै सै।
परमेसवर जरिये दिया गया काम
9काम करण आळे नै अपणी मेहनत तै के फायदा होवै सै?
10मन्नै उस दुख भरे काम ताहीं देख्या सै जो परमेसवर नै माणसां कै खात्तर ठहराया सै ताके वे उस म्ह लाग्गे रहवै। 11उसनै सारा किमे इसा बणाया के अपणे-अपणे बखत पै वे सुन्दर होवै सै; फेर उस नै माणसां के मन म्ह सारे तै पैहला अर सदा काल तक का ज्ञान पैदा करया सै, फेर भी जो काम परमेसवर नै करया सै, वो शरु तै आखिर तक माणस समझ न्ही सकदा। 12मन्नै जाण लिया सै के माणसां कै खात्तर आनन्द करण अर जिन्दगी भर भलाई करण के सिवाए, और किमे भी आच्छा न्ही; 13अर यो भी परमेसवर का दान सै के माणस खावै-पीवै अर अपणी सारी मेहनत म्ह सुखी रहवै। 14मै जाणु सूं के जो किमे परमेसवर करै सै वो सदा टिक्या रहवैगा; ना तो उस म्ह किमे बढ़ाया जा सकै सै अर ना किमे घटाया जा सकै सै; परमेसवर इसा इस करकै करै सै के लोग उसका भय मान्नै। 15जो कुछ होया वो इसतै पैहल्या भी हो चुक्या; जो होणआळा सै, वो हो भी चुक्या सै; अर परमेसवर बीत्ती होई बात नै फेर पूच्छै सै।
अन्याय का हावी होणा
16फेर मन्नै सूरज कै नीच्चै के देख्या के न्याय की जगहां म्ह दुष्टता होवै सै, अर धार्मिकता की जगहां म्ह भी दुष्टता होवै सै। 17मन्नै मन म्ह कह्या, “परमेसवर धर्मी अर दुष्ट दोनुवां का न्याय करैगा,” क्यूँके उसके ओड़ै एक-एक बात कै बारे म्ह अर एक-एक काम का बखत सै। 18मन्नै मन म्ह कह्या, “यो इस करकै होवै सै के परमेसवर माणसां नै परखै अर वो देख सकै के वे पशुआं बरगे सैं।” 19क्यूँके जिसी माणसां की उसीए पशुआं की भी हालत होवै सै; दोनुवां की वोए हालत होवै सै, जिस तरियां एक मरै उसे तरियां ए दूसरा भी मरै सै। सारया की साँस एक जिसी सै, अर माणस पशु तै किमे बढ़कै न्ही; सारा किमे बेकार सै। 20सारे एक जगहां म्ह जावै सैं; सारे माट्टी तै बणे सैं, अर सारे माट्टी म्ह फेर मिल जावै सैं। 21के माणस का जी उप्पर की ओड़ चढ़ै सै अर पशुआं का जी नीच्चै की ओड़ जाकै माट्टी म्ह मिल जावै सै? यो कौण जाणै सै? 22आखर मन्नै यो देख्या के इसतै घणा किमे आच्छा न्ही के माणस अपणे काम्मां म्ह राज्जी रहवै, क्यूँके उसका भाग योए सै; कौण उसके बाद आण आळी बात्तां नै देक्खण कै खात्तर उस ताहीं बोहड़ा ल्यावैगा?
S'ha seleccionat:
सभोपदेशक 3: BGC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.