Daniel 1
1
Raja Nebukadnezar mpilei ba'tu pira-pira kallolona to-Yahudi la mangjama lan istanana
1:1-21
1Ia tonna tallungtaunmo Raja Yoyakim mangparenta jio tana Yehuda, malemi mangrari raja Babel disanga Nebukadnezar sola surudadunna, natalimbungngi to kota Yerusalem.#2Raja-raja 24:1; 2Tawarikh 36:5-7 2Naeloranni Puang Allataala ntaloi to Raja Yoyakim, narampai pira' to parewanan makarama' to dipake massompa lan Bola Puang Allataala. Ia to tonatalo Raja Nebukadnezar, napali'i lako Babel#1:2 Babel iamo kota nomoro' mesa' jio tana Babilonia to disanga too tana Sinear., na ia joo parewanan dipake massompa mangka narampa, nabawai lako bola dewata to nasompa naannai jio ngenan to dinii nnanna parewanan makarama'.#2Raja-raja 20:17-18, 24:10-16; 2Tawarikh 36:10; Yesaya 39:7-8
3Massuami Raja Nebukadnezar lako kapala istana disanga Aspenas, anna pileii ba'tu pira-pira to kallolo jio mai bangsa Israel to dipali', la bati' raja iarika bati' puang. 4Iamo to kallolo te'da caccana, melo rupanna, mandalan pangtangngaranna, macca na buda kapaissenanna dikua anna sipato' mangjama lan istana raja. Massua toomi raja, anna ajahhi Aspenas pangnguki' sola basana to-Babel. 5Napattantumo raja to kande la nakande to kallolo to naala bang una raja jio mai kande, to biasa nakande, sola anggoro' to biasa naiso' raja. Nang la diajahhi tallung taun namane' wa'ding mangjama lan istana.
6Ia to kallolo, den appa' bati' to-Yehuda, iamo to Daniel, Hananya, Misael na Azarya. 7Apa nasulleii kapala istana to sanganna Daniel menjaji Beltsazar, Hananya menjaji Sadrakh, Misael menjaji Mesakh, na Azarya menjaji Abednego. 8Ia to Daniel cia'i la kasalan lako Puang Allataala natumang kandena sola anggoro'na raja, sanga ia joo kande sola anggoro' mangkamo dipake massompa lako dewata. Iamo joo, nameta'da lako Aspenas napasadianni kande laen. 9Pangtulung-Na Allataala, na ia to Daniel napakamoja' Aspenas sola nakamasei too. 10Apa mangkadai to Aspenas lako Daniel nakua, “Malaja'na' lako raja, saba' napattantumo raja to la mikande sola miiso', na ia ke nakita kamu' raja na te'da namakassing tongan to pangkaleanmi susi to kallolo laenna, nang la aku' napatei.”
11Mangkai joo too malemi Daniel la sipangkada to tonasua Aspenas la mparakai Daniel sola joo tallu soba'na iamo to Hananya, Misael na Azarya. 12Mangkadami Daniel nakua, “Cobamokan jolo' sangpulo allona, na camme utan bangmo mibenkan kikande sola wai diiso'. 13Ia ke mangkami joo sangpulo allona, paressamokan na mipasikitai pangkaleanki' na pangkaleanna to kallolo laenna, to ngkande bang una kande to biasa nakande raja. Mimane' mpattantui apa to la mipugauk lako kami' tee kaunanmi.” 14Natarimami joo tomangparaka, napugaukki susi to peta'danna Daniel. 15Ia tonna liwa'mo sangpulo allona naparessami tee tomangparaka to kallolo nakitai kumua la'bih makassing to pangkaleanna Daniel sola soba'na na ia to kallolo laenna tongkande bang kande to biasa nakande raja. 16Jaji, ia joo tomangparaka te'damo nabenni to kande napattantumo raja la nakande Daniel sola soba'na, apa ia manda joo camme utan nabenni. 17Allataala mbarakka'ii kapaissenan joo appa' kallolo anna macca nnissenni to mangrupa-rupa pangnguki' na mandalan pangtangngaranna lan sininna pangngajaran to diajaranni. Apa ia to Daniel Nabarakka'i pole'pa Allataala kapaissenan la mbattuananni tindo sola mpamanassa pengkita.
18Ia tonna ganna'mo tallung taun to napattantu Raja Nebukadnezar dinii nnajahhii tee sininna kallolo, nasolan ngasanmi Aspenas la male mangngolo lako Raja Nebukadnezar. 19Lan kasipangkada-kadanna raja sola joo sininna kallolo, nanii nnissenni kumua ia to Daniel, Hananya, Misael na Azarya la'bih macca na ia to kallolo laenna, arannai dipilei tee kallolo appa' mangjama lan istana raja. 20Tuli mekutana raja lako tee kallolo appa', ke denni passalan to la mparallui pangtimbangan sola pangtangngaran mandalan. Arannai naissen raja kumua manglokkon pessangpulo la'bih melo to pangngampa'na joo Daniel sola soba'na na ia to pangngampa'na topaissen-issen na tomangbaca-baca lan sininna kaparentanna.
21Mangjama unapi Daniel lan istanana raja ratu lako nadete' wattunna Raja Koresh mangpamula mangparenta.
S'ha seleccionat:
Daniel 1: mvpAD
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
© Wycliffe Bible Translators, Inc. All rights reserved.