Kada Bulawan 31
31
Pangpangngajah lako Raja Lemuel
1Susi tee to naajaranni indona Lemuel, to napau pole' Lemuel, raja jio Masa,
2“Ee anakku', to kupellao doangan naden kujajian.
Apara tuu mupugauk anakku'?
3Danggi' lalo mupaboro-boro kamawatanganmu
ba'tu mpake sala wattummu sibawa-bawa baine.
Budamo raja nasolangngi baine sala kedo.
4Ee Lemuel, ingaranni! Te'da na sipato' to raja mpubiasan mangngiso' anggoro'
iarika tomangparenta ngkadoangngi pangngiso' mepamalango.
5Danggi' napangngiso' melangoan, na te'damo naingaranni to atoran,
na te'damo namaruruh mpugaukki to sipato'na lako todipandasa.
6Iara ben pangngiso' melangoan to tolalanynya',
na tomasussa penawanna.
7Ake'mo namangngiso' dikua nakalupaii to kamakaasi-asianna
na te'damo naingaranni to sussana.
8Pangkadanni to sininna totangnakulle mpangkadan kalena.
Pangngewanni to sipato'na natarima tomasussa.
9Pangkadananni to todipandasa sola tokaasi-asi,
ra'tah maruruhhi to kara-karana,
benni to sipato'na natarima.”
Baine kemuanemo to macca
10Masussa diampa' to baine macca nnurusu' repokkona,
la'bih keangga' na paramata.
11Nakatappa'i muanena,
nakebarakka' to muanena.
12Melo penawanna lako muanena,
te'da naden namangpanggaukan gaja' ratu lako matena.
13Marajin nnangah rami#31:13 rami: Mesa' tananan to wa'ding dikabua' bannang. Dialloi jolo' mane' disosoi, diarru' na jaji bannang, na dikabua' jala, ulang na sumbu. sola bulu bembala',
na maringngan lima njamai.
14Nnangahhi kande nabawai lako bolana,
susi kappala' wai mbawa kande jio mai kampong mambela.
15Malillin unapa nami'cokmo mpasadian kande tau llan bolana,
napada mpabarakkannii jaman pangjamana baine.
16Nnallii padang to nakabudai,
na assele' limanna natanannii anggoro' to bara'bahna.
17Mpemandikkii sa'wakkana
na mpemawatangngi limanna mangjama.
18Na naissen kumua ia to assele'na napusaro,
mandalan bongipi namane' paja mangjama.
19Ntoe gintiran
naunuhhi to bannang tama padati.
20Malaboh lako tokaasi-asi
nakabudai mangpangbengan lako tomakario-rio.
21Te'da namalaja' ke wattu macakke',
nasaba' napasadian jolomo baju makamban to repokkona.
22Ia kalena ngkabua' ampahna jio mai bulu bembala',
ia to pakeanna sigaja kassing dikabua' jio mai kaen lenan makudara'.
23Todiangga' to muanena
llan kasirempunan tomatua-tua llan kampong.
24Ngkabua'i pakean jio mai kaen lenan nabalukki,
nggaragai pessaqwak nabalukki lako pangdangkang.
25Kamawatangan sola kamala'biran butung napubaju,
na te'da napuselangngi to wattu la naoloi lako.
26Ia to kadanna mepamacca,
mangkada malamma ke mangngajahhii.
27Marajin mangjama,
na gaja mparinawa jaman llan tananan dapohna.
28Nakuanni anakkana kumua, “Tomasannang tee indoki',”
napujii muanena.
29Nakua muanena, “Buda baine to macca,
apa te'da ncau' maccako.”
30Ia to lindo macanning wa'ding bang mepakena,
na ia to kamaloloan te'da bua'na,
apa ia to baine ngkalaja' ngkasiri' Puang Allataala,
nang la sipato' dipuji.
31Benni balahna to sininna panggaukan melona,
ake' na panggaukan melona nadipakala'bih jio ngenan kasirempunan!
S'ha seleccionat:
Kada Bulawan 31: mvpAD
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
© Wycliffe Bible Translators, Inc. All rights reserved.