Daniel 2
2
Raja Nebukadnezar mangtindo ngkita tau-tau liwa' tonggo
2:1-13
1Den sangbongi tonna taun mangpenduannamo Raja Nebukadnezar mangparenta, namangtindo. Ia joo tindona liwa' tangnapurapa' penawanna, arannai te'damo nakullei mamma' pole'. 2Iamo joo natambai ngasanni to topaissen-issen, tomangbaca-baca, sando sola tomacca mbattuananni apa jaji jao langi', la mbattuananni joo tindona. Ia tonna sike'deranmo to tomacca jio olona raja, 3mangkadami raja nakua, “Mangtindona' naliwa' tangnapurapa' penawangku', nasaba' madoangna' nnissenni apa battuananna.” 4Mebalii mpake basa Aram to tomacca battuananni apa jaji jao langi' nakua, “Oo puang, malambeh sunga'ki' te'da anggena! Tacuritanmokan joo tindota', kipamanassai apara to battuananna.” 5-6Mebalii raja nakua, “Mangkamo' nnala kara'tasan susi tee: Nang la kamu' mpauanna' joo tindoku' sola battuananna. Ia ke susi joo la kuben kamu' paraseng liwa' ballo sola kadianggasan la'da'. Apa ia ke te'da mipauanna', la dita'tak-ta'tak kamu', na ia to bolami la diro'pokan naditombon menjaji burauk. Jaji pauanmo' tee too joo tindoku' sola battuananna.” 7Mebali pole' omi to tomacca nakua, “La tapauanrakan jolo' joo tindota', kimane' mbattuanannii.” 8Nasa'dingna raja joo kadanna to tomacca, ta'pa mebalimi nakua, “Nang susimo tuu to kupikkiri' kumua nnala kamu' wattu, nasaba' miissen kumua mangkamo' nnala kara'tasan 9la disessa ngasan kamu' sangrupa pangsessa ke te'dai miissenni mpauanna' joo tindo. Mesa' kada kamu' nnuraga tarruhna' sola mpaningoanna', parannu kamu' kumua la kusullei to kara'tasanku'. Pauanmo' mai joo tindoku', kuissenni kumua macca una kamu' mbattuanannii.” 10Mebalii to tomacca mbattuananni apa jaji jao langi' nakua, “Lan sininna lino, te'da ia tau la nnissen tindo ke te'dai nadipauan jolo'. Na te'dapa ia naden mesa' raja, moi samatumbanna makuasa sola mala'bih mpeta'dai susi joo lako topaissen-issen, tomangbaca-baca sola tomacca mbattuananni apa jaji jao langi'. 11Gaja sussa ia tuu peta'danta'. Moi ia mesa' tau te'da ia ngkullei mpauanki' joo tindota' saliwanna dewata, apa te'daka ia namari'pih sola tolino.”
12Nasa'dingna raja to pebalinna to tomacca, ta'pa gaja gallimi, napangparentanmi la mpatei ngasanni to tomacca jio Babel. 13Nadipangpeissenan joo parenta, na sininna tomacca, moi Daniel sola to soba'na diangah too la dipatei.
Napangpekitanni Puang Allataala lako Daniel joo tindo sola apa battuananna
2:14-23
14Ia tonna male Ariokh kapala pangtakinna raja la mpatei to tomacca jio Babel, gaja matangngaran to Daniel, namangpikkiri' rampa', 15namane' mekutana kumua, ciapari anna pasun parenta raja liwa' maparrang. Napaumi Ariokh lako Daniel to apa mangka jaji.
16Ta'pa malei Daniel mangngolo lako raja, nameta'da nadiben jolo' wattu, la mpemanassaii battuananna joo tindo. 17Mangkai joo too polemi Daniel lako bolana napau ngasanni sininna to apa mangka jaji lako Hananya, Misael na Azarya. 18Nasuai Daniel to soba'na namassambajang lako Allataala jao suruga, dennaa upa' Namamase lako sola ngasanni, Napakitanni joo tindo te'dapa nadiissen, dikua na danggi' nadipatei, moi to tomacca laen jio tana Babel.
19Ia bang unamo joo bongi, Napangpekitanni Allataala lako Daniel lan mesa' pengkita to apa membuni lan joo tindo. Iamo joo na mpakala'bih Allataala jao suruga to Daniel 20nakua, “Pakala'bihhi Allataala tarruh-tarruh te'da anggena, nasaba' Iamo to mandalan pangpikkirisan-Na na makuasa. 21Iamo mpattantu sininna wattu. Ia toomo nnangka'i sola mpasoro'i to tomakuasa. Ia toomo mbenni kapaissenan sola kamapahangan lako tomacca. 22Iamo mpamanassai to apa mandalan na tangkaissenan. Naissen ngasan sininna to apa jaji lan kamalillinan. Natalimbungngi arrang to liwa' macora. 23Oo Allataala to nasompa tojoloku', kupuji-Ki', kupakala'bih too-Ki', nasaba' Tabenmo' kapaissenan sola kamawatangan. Tatarimami to peta'danki'. Na mangkamokan Tapakitan to apa la kipebalian raja.”
Napauanni Daniel to tindona raja sola battuananna
2:24-45
24Mangkai joo too, malemi Daniel sipangkada Ariokh to mangka disua la mpatei ngasanni to tomacca jio Babel. Nakua Daniel lako Ariokh, “Danggi' pateii to tomacca, solanna' mangngolo lako raja, nasaba' madoangna' mpauanni raja battuananna joo tindona.”
25Ta'pa malei Ariokh ssolan Daniel mangngolo lako Raja Nebukadnezar, na mangkada Ariokh lako raja nakua, “Nnampa'mo' sala mesa' to-Yehuda to dipali', wa'ding mpauanki' battuananna joo tindota'.” 26Mekutanai raja lako Daniel, to disanga too Beltsazar, nakua, “Wa'dingrokoka mpauanna' to apa kukita lan tindoku' sola battuananna?” 27Mebalii Daniel nakua, “Tabe' puang, te'da tau ngkullei mpauanki' to apa susi joo, moi tomacca, tomangbaca-baca, topaissen-issen ba'tu topakita-kita. 28Apa Allataala jao suruga mpamanassai to sininna apa tangnaissen tau, na Iamo mangka mpangpekitanni lako kita' to apa la jaji tee wattu la dioloi lako. Susimi tee to tindo sola pengkita, to takita tontamamma'.
29Ia tontamamma' unapa, tapangtindoanni to wattu la dioloi lako. Allataala mpamanassai to sininna apa tangnaissen tau, napangpekitanni lako kita' to apa la jaji. 30Ia tee apa tangkaissenan, mangkamo dipamanassa lako aku', te'da to kumua la'bih maccana' na tolaen, apa dikua antawa'ding nnissenni battuananna joo tindota', antapahang tooi to apa tapikkiri'.
31Susimi tee to pengkita takita: Den mesa' tau-tau jio olota'. Ia joo patung liwa' tonggo, cumbia'-bia' na melajatan. 32Ia to ulunna bulawan massang, na ia to babara'na sola takeahna salaka, na ia to awakkana sola pondokkona tambaga. 33Ia to upanna bassi na ia to ajena bassi sirau litak pitti'. 34Ia tontakita unapi, ta'pa den mesa' batu liwa' tonggo tilu'bak moi na te'da tau rrumbui, naro'pokkii to ajena joo patung to bassi sirau litak na ancuru'. 35Wattu ia bang unamo joo nata'pa ro'pok joo patung, namenjaji bassi titombon, litak pitti', tambaga, salaka, na bulawan to maninnangmo susi au iarika sowok jio to' dinii massambak resa',#2:35 jio to' dinii massambak resa', Lan basa Ibrani: jio to' dinii massambak gandum ke pealloanni. Battuananna pealloan manda ia namassambak gandum to tau jio tana Israel. napasisarambuanni angin na moi ngenanna te'damo dikita. Apa ia joo batu rro'pokanni joo patung, menjajii buntu gaja tonggo na mponnoi sininna lino.
36Susimi joo tindota', na ia tee too la kupamanassanmiki' to battuananna. 37Tomala'bihku' Raja Nebukadnezar, kita'mo raja mala'bih jio mai sininna raja. Nabenmiki' Allataala jao suruga tee kaparentan, kakuasan, kamawatangan sola kamala'biran. 38Allataala mpupenjajiki' ngkuasai sininna tolino, takuasai too olok-olok na manuk-manuk. Kita'mo to dipangpasusii joo ulu patung jio mai bulawan. 39Apa ia tonna te'damo tamangparenta, la den pole' omi tomangparenta laen, apa te'damo napada kamawatanganna kaparentanta'. Sitarruhna ollong omi to kaparentan mangpentallun, iamo na pangpekitan joo tambaga jio patung, to la ngkuasai sininna lino. 40Mangkai joo too la ollong omi to kaparentan mangpennappa' to mawatang susi bassi. Susi bassi, mawatang mpokan ba'tu nnancuru' sininna apa, susi toomi joo to kaparentan mangpennappa' la nnancuru'i joo tallu kaparentan jolona. 41Ia to ajena sola jarinna joo patung to jio mai litak pitti', na bassi pira', mpangpekitanni to kumua undinna joo kaparentan la titawa-tawa. Den too kamawatanganna joo kaparentan susi bassi, nasaba' ia to litak pitti' dipasirau bassi. 42Ia to jari-jarinna to dikabua' jio mai bassi dipasirau litak pitti', mpangpekitanni to kumua, la den kaparentan pira' mawatang na den too to malamma. 43Kasirauanna bassi na litak pitti', mesa' too tanda to kumua ia joo kaparentan nnangah lalan la mpemawatangngi kalena, iamo na la mpasibalii to pada bati'na, apa te'da assele'na joo akkattana, susi unai to bassi te'da nasikalamma' litak pitti'.
44-45Mangkamo takita to batu lan tindota', to kumua te'da ia tau rrumbui, na tilu'bak jao mai buntu, nabasai nasisarambuan joo patung to dikabua' jio mai bassi, tambaga, litak pitti', salaka na bulawan. Battuananna: ia tonna mangparenta unapa to raja, ia to Allataala jao suruga la mpaden kaparentan tatta' te'da anggena, na te'da lalo ia to bangsa la ntaloi. Kaparentan iamo joo la nnancuru'i joo appa' kaparentan. Napangpeissenanni Allataala Tomala'bih lako kita' to apa la dioloi lako. Ia joo tindo wa'ding dikatappa'i, na ia to battuananna kupau tongan.”
Daniel ntarima sarona jio mai Raja Nebukadnezar
2:46-49
46Suju'mi Raja Nebukadnezar massompa jio olona Daniel, napangparentan tooi anna passompan gandum to tau na ntunu dupa mpakala'bih Daniel. 47Mangkadami raja lako Daniel nakua, “Nang la'bih makuasa to Allataala musompa, na ia to puang iarika raja laen. Ia toomo to mpamanassai to sininna apa tangkaissenan. Kuissenni joo, nasaba' napangpeissenanmo lako iko to apa la jaji.” 48Mangkai joo too, napaendekmi raja to pangka'na Daniel naben tooi buda paraseng to kaminang maballo. Daniel menjaji tomakuasa lan sininna propinsi Babel, na ngkapalai toopa sininna tomacca lan istana. 49Apa napeta'dai Daniel, naben tooi raja lako Sadrakh, Mesakh na Abednego to kaparentan lan propinsi Babel, anna balii mangparenta, na ia to Daniel torro ia lan istana.
S'ha seleccionat:
Daniel 2: mvpAD
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
© Wycliffe Bible Translators, Inc. All rights reserved.