Lévitique 11
11
TIWAN TIN BI KÒÓYEE NÌ TIN BAA KÒÓYEE
Tiwaŋkuti tin bi kòóyee nì tin baa kòóyee
1Ti-Dindaan bí Mooyiisi nì Aarɔn yii 2bí tùkù Isirayeel yab yii#11.2 Bi kāntí tiwaŋkuti gbanti tiba Ditee 14.3-20.:
«Tiwaŋkuti tin kɔkɔ còom̄ kitiŋ puee poonee, tin ni ŋūǹ kí ŋmɔ́ee sɔ̀. 3Ni ŋūǹ kí ŋmɔ́ tiwaŋkuti tin tafuŋfukuti látì ní tì kpìkitī ki fàtīi ŋmóòyee. 4Ama tiwaŋkuti tin kpìkitī ki fàtīi ŋmóò àá ti-tafuŋfukuti látèe kansikinee,
- ni kòó ugutaamu, di sá yii u kpìkitī ki fàtīi ŋmóò, ama ní kaa cáá titafuŋfukul, ni kòó kuwaŋkuluu gbanti.
5- Ni kòó ujaŋgbeenapul, di sá yii u kpìkitī ki fàtīi ŋmóò, ama ní kaa cáá titafuŋfukul.
6- Ni kòó kiwuŋ, di sá yii u kpìkitī ki fàtīi ŋmóò, ama ní kaa cáá titafuŋfukul.
7- Ni kòó ugbeeti, di sá yii u-tafuŋfukuti látì, ama waa kpìkitī ki fàtīi ŋmóò.
8Ní taa ŋmɔ́ tiwaŋkuti gbanti nanti. Ní taa gbēē ti-waŋkpil, tí nīn sá-ni dikoobil.
9«Tin kɔkɔ kóò nnyiminee, án yaa sá kubɔɔuneeee, dimɔɔlineeee, ibunneeee, ni ŋūǹ kí ŋmɔ́ ijɔm in cáá ipɔkɔ nì ifeenee. 10Ama ní taa ŋmɔ́ tin kɔkɔ pée bí nnyimin, amɔɔ poon àá ibun poon kaa cáá ipɔkɔ nì ifeenee. 11Tí nīn sá-ni dikoobil. Ní taa ŋmɔ́ ti-nanti kí taa gbēē ti-waŋkpil. 12Ni kòó tin kɔkɔ pée bí nnyimin kaa cáá ifeenaaa, kaa cáá ipɔkɔee.
13«Inoon kansikinee, in ni kòó kaa máaǹ kí ŋmɔ́ee sèé: ukaalun nì ukaabu nì nnyimin kaaluŋwu, 14nì kikaaliŋkpaŋ nì kaajiiku nì u-buluku, 15digaliŋgaal nì di-buluku, 16taataa nì kitulinjakpatibooi nì ŋkpinni kpɔkpɔfiiu nì kaasaabi nì bi-buluku, 17ditulinjool nì jɔmbaaŋki nì unanjikaabu, 18nì kpɔkpɔfiibi bin sil fɔ̀kɔ̀ee nì kpɔkpɔfiibi bin cáá nnyɔlee nì ukpiŋkaabu, 19nì naakpaapiin nì kikpiŋkaabiki nì ki-buluku nì yikpitikooja nì kunanjiŋu.
20«Inaaki in kɔkɔ cáá iyakal inaa ki cáá ifeenee, ni kòó. 21Ama ni ŋūǹ kí ŋmɔ́ in cáá iyakal ki yùkufī kitiŋee, 22an dàkà yii inaakitoon nì i-buluku, ipɔɔm nì i-buluku, nì imaliŋgoon nì i-buluku. 23Ama kunaakibuluu kun kíǹ ki cáá ifeen nì iyakal inaayee, ni kòó.»
Tin kɔ̄ntí unil tijɔkɔndee
24«Tiwaŋkuti tiba kɔ̄ntí unil tijɔkɔndi. Un yaa gbēē ti-waŋkpilee kɔ́ tijɔkɔndi kí cáá sāā kujoou. 25Un di yaa tí yōoǹ ti-waŋkpilee kɔ́ tijɔkɔndi kí cáá sāā kujoou, ú fíntí u-wampeeŋkaati. 26Ni kòó tiwaŋkuti tin tafuŋfukuti kaa látì ní kaa kpìkitī kí fàtīí ŋmɔ́ee. 27Ni kòó tiwaŋkuti tin kɔkɔ cáá ataa anaa ki còom̄ ti-taaŋi poonee. Tì yaa kpíì ní ubɔ gbēē-tèe, udaan mun kɔ́ tijɔkɔndi kí cáá sāā kujoou. 28Un mun yaa túǹ ti-waŋkpilee kɔ́ tijɔkɔndi kí cáá sāā kujoou. Udaan ń fíntí tiwan tin u pēēyee, di sá yii ni kòó tiwaŋkuti gbanti.
29«Tiwaŋkuti tin kpátìi gbí kitiŋ puee, tin ni kòó ti-kansikinee sèé: tumbuŋku nì unapul nì dijikpal nì di-buluku, 30nì kijipatii nì jilkantoolii nì kaŋkampu nì ulɔ nì kunaatoou. 31Béémaan yii ni kòó tiwaŋkuti gbanti. Ubɔ yaa gbēē ti-waŋkpilee, udaan kɔ́ tijɔkɔndi kí cáá sāā kujoou. 32Tì yaa kpíì ní ki lítì tiba puee, an yaa sá ndɔ sambikaaa, tiwampeeŋkaalaaa, ŋgbanaaa, ditɔkɔlaaa, tin kamaa ní bi pée cáa tūǹ ditundee, tiwan gbanti kɔ́ tijɔkɔndi. Bí dū nnyim ki fíntí-tì ní tí sīĺ kí cáá sāā kujoou ní kí nyā tijɔkɔndin. 33Tiwaŋkuti gbanti kubɔ yaa kpíì ki jéetì ditansambilin àá diboolinee, tin kā poonee kɔkɔ kɔ́ tijɔkɔndi, bi máaǹ kí gbá kí wīī ditansambil àá dibool gbanti. 34An yaa sá nnyim di kā di-ni ní nnyimee kpáatì ki sītì tijin tin baa kòóyee puee, tijin gbanti mun kɔ́ tijɔkɔndi. An yaa tí sá nnyinnyɔkaam àá ndaam poon ní nnyim gbanti yaa kɔ́ee, báà mi yaa kā kun poonee, nnyim àá ndaam gbanti mun kɔ́ tijɔkɔndi. 35Tiwan tin kamaa ní tiwaŋkutee yaa kpíì ki gbēēyee kɔ́ tijɔkɔndi. An yaa sá dibubul àá ŋfan puee, see bí gbá kí wīī-ŋu, di sá yii ŋu mun kɔ́ tijɔkɔndi dee. 36Nì míǹ kɔkɔee, kuwaŋkuluu yaa jéetì nnyimbul àá dinyimbɔbil din poon ní nnyim dɔ̀ee ki kpíìyee, nnyim gbanti kaa kóò tijɔkɔndi. Ama un di yaa gbēē kuwaŋkuluu gbanti wuntee di kóò tijɔkɔndi. 37Diwaŋkpil gbanti dijandi diba yaa lítì ŋwambool puee, ŋwambool gbanti kaa kɔ́ tijɔkɔndi. 38Ama bi yaa wōoǹ ŋwambool ní diwaŋkpilee yaa gbēēyee, ŋwambool gbanti kɔ́ tijɔkɔndi.
39«Tiwaŋkuti tin ni jīǹee kubɔ yaa kpíì ní ubɔ gbēē-kuee, udaan kɔ́ tijɔkɔndi kí cáá sāā kujoou. 40Un di yaa ŋmɔ́ tinan gbantee máaǹ kí fíntí u-wampeeŋkaati, udaan kɔ́ tijɔkɔndi kí cáá sāā kujoou. Un mun di yaa yōoǹ diwaŋkpilee máaǹ kí fíntí u-wampeeŋkaati, udaan kɔ́ tijɔkɔndi kí cáá sāā kujoou.
41«Ni kòó ŋwambilimu mun kpátìi gbí kitiŋ pu ki fòotēe. Ní taa pée ŋmɔ́-tì. 42Ni kòó tin fù ti-pooŋi puee nì tin còom̄ ataa anaa àá ataa kupaau puee. Ní taa pée ŋmɔ́-tì. 43Ní taa dū tiwaŋkuti gbanti tiba kí kɔ́ǹ ni-ba tijɔkɔndi. Taa pée yàntīmaan tí kɔ́ǹ-ni tijɔkɔndi án nín làá ŋá pu ní ti-puee, ní kpántí bijɔkɔndambee. 44Di sá yii man di sá ni-Dindaan ni-Nimbɔtiu. Nín̄ bímaan circir, kun puee man bí circir ní. Taa yàntīmaan tiwan tin fòotī ki kpátìi gbí kitiŋ pu nee kansikin kubɔ ń kɔ́ǹ-ni tijɔkɔndi. 45Man di sá ni-Dindaan un nyántìń-ni Eejipiti tiŋkin kí nīn sá ni-Nimbɔtiuee. Míǹ puee nín̄ bímaan circir, kun puee man m-ba bí circir ní#11.45 B. 44-45: kpèè 19.2, 1 Peet 1.16..»
46Marab bin bi nìn síiǹ tiwaŋkuti nì inoon nì tiwan tin kɔkɔ fòotī ki kóò nnyiminee nì tin kɔkɔ kpátìi gbí kitiŋ puee dee. 47Marab gbanti di nìn yàntī bi gàntī tiwaŋkuti tin bi kòóyee nì tin baa kòóyee, nì tiwaŋkuti tin bi máaǹ kí jēe nì tin baa máaǹ kí jēe.
S'ha seleccionat:
Lévitique 11: BASSARDC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
BIBLE EN N'TCHAM (Bassar) © Alliance Biblique du Togo, 2013.