Deutéronome 6
6
«Nín̄ néeń ti-Dindaan a-Nimbɔtiu»
1Marab nì abɔkpaa nì akoobil ŋin ti-Dindaan ni-Nimbɔtiu tīī-mi ḿ dūú dàkà-ni ni yaa láa dūtì Jɔɔdan buŋŋu ki fōō kitiŋ ki kíǹ ki yèe, ní nīn ŋúb́ ki ŋáań kii bi nín bí yii ní ŋá puee dee. 2Án nín làá ŋá pu ní nimbi nì ni-jipɔmbi nì ni-naantiibi ń dāá fàŋkì ti-Dindaan ni-Nimbɔtiu kí nīn tɔ́ u-bɔkpaaŋi kɔkɔ nì u-marab bin m tīī-ni nee iwiin in kɔkɔ ni cáá kí kàl̄ kitiŋ puee. Míǹ ní ni-maŋfal wiiŋyi làá fɔ̀kɔn̄. 3An puee, Isirayeel yab, pīlifìmaan marab gbanti kí nīn tɔ́-bi, kí ŋá bi nín bí yii ní ŋá puee. Ni yaa ŋá mimmee, án làá bútí-ni, ní ní bùtī tikpil kitiŋ kin poon nnaabiim nì tisiil#6.3 Kpèè Disa 3.8. còol̄ee, kii ti-Dindaan ni-baabi Nimbɔtiu nín pōoǹ-ni puee.
4Pīlifìmaan Isirayeel yab, ti-Dindaan di sá ti-Nimbɔtiu, ti-Dindaan sá ubaanti ní#6.4 Kpèè Dikà 15.37, Maar 12.29.. 5Á nīn néeń ti-Dindaan a-Nimbɔtiu nì a-pɔbil kɔkɔ nì a-naŋki kɔkɔ nì a-pɔŋŋu kɔkɔ#6.5 Kpèè Maat 22.37, Maar 12.30, Luuki 10.27.. 6Á dū marab bin m tīī-si díǹ nee kí kpāafì a-pɔbilin. 7Á dū-bi kí cóoĺ a-biyaamu. A yaa kā a-dumpuɔɔɔ, a yaa tàkā nsan pu ki còom̄ ki cáaa, a yaa tí dɔ̄ɔɔ, a yaa tí yúɔɔɔ, bí nīn kā a-nyɔkɔn. 8Á ŋmà-bi kí dūú fìn̄ a-ŋal nì a-yigbeel án nīn sá-si kudaaŋŋu. 9Á ŋmà-bi kí nákań a-punyɔmmu pu nì a-tiŋki punuubi pu#6.9 Kitiŋ punuubi: taapu sá yii ŋyunti gbanti Paleesitiini tiŋkinee, bi nìn māā digundi ní kí tū kitiŋ ní digundi gbanti nìn cáá mpunyɔmu nì punuubi bin bi pìintí unannanli ń taa ŋmā kí kɔ́ee..
Isirayeel ń taa súntí u-Nimbɔtiu pu
10Ti-Dindaan ni-Nimbɔtiu làá dāá cáá-ni kí kɔ́ǹ kitiŋ kin ní u nìn pūtì ki pōoǹ ni-naanjab Abraam nì Isaaki nì Jaakɔb#6.10 Kpèè Diny 12.7, 26.3, 28.13. yii u làá dūú tīī-nee poon. Kitiŋ gbanti cáá ntimu mun sá ŋkpaamu ki ŋān̄ naa máńee. 11Kitiŋ gbanti gíti cáá adiin ŋin poon naa síiǹ tiba ama ní tigaajawan kɔkɔ nì ti-bulifi gbée, lɔkɔb bin naa gbìn̄ee, fiinyi nì ɔliifi sufii in naa cóoǹee kɔkɔ bí niin. Ni làá dāá jī ní kí díkí. 12Ama ní nīn nyíǹ ni-ba kí taa súntí ti-Dindaan un nyántìń-ni Eejipiti tiŋki kin poon ni nìn sá iyumbuee pu. 13Nín̄ fàŋkímaan ti-Dindaan ni-Nimbɔtiu. Úǹ baba ní ni máaǹ kí jāam̀#6.13 Kpèè Maat 4.10, Luuki 4.8., ní úǹ baba yindi mun ní ni máaǹ kí pùtī. 14Ní taa tòotī awaa ŋin anibul ŋin māntìi tú-nee tòotēe. 15Kun puee ti-Dindaan ni-Nimbɔtiu un bí ni-kansikinee sá ipoompoon Nimbɔtiu ní. Ni yaa ŋá mimmee, see ú gíí ni-pu diŋuul kí kpɔ̀ kí céetí-ni kitiŋ pu. 16Ní taa cɔ̄ŋkì ti-Dindaan ni-Nimbɔtiu kii ni nín nìn cɔ́ŋkì-u Maasa#6.16 Kpèè Disa 17.1-7, Maat 4.7, Luuki 4.12. puee. 17Nín̄ ŋúb́maan ti-Dindaan ni-Nimbɔtiu marab nì u-bɔkpaaŋi nì u-koobiliŋ ŋin u tīī-nee tiŋan. 18Nimbee, ŋámaan tin kítì ki ŋān̄ ti-Dindaan nimbiinee. Ni yaa ŋá mimmee, ní an bútí-ni ní ní ŋmā kí fōō kitimmɔntii kin u pōoǹ kí tīī ni-naanjabee kí nīn kíǹ ki yì. 19Ni làá jà ni-nannanliibi kii ti-Dindaan nín lī puee.
20Fool boon, ni-biyaamu yaa láa bālifì-ni yii: «Ba pu ní ti-Dindaan ti-Nimbɔtiu tīī-ni abɔkpaa nì akoobil nì marab nee dee?» 21Ní dāá kíí-bi yii: «Ti nìn sá iyumbu ní Faaroo ŋaan Eejipiti tiŋkin, ní ti-Dindaan dū mpɔŋkpaan ki nyántìń-ti niin. 22Ti-nimbiin niin ní ti-Dindaan dàkā Faaroo nì u-dicaŋku nì u-nib kɔkɔ u-daanti nì u-tuŋkpaaŋŋi, ní ki kɔ́ǹ-bi digìŋ́kpaandin. 23Ama ní timbee, u nyántìń-ti niin ki cáań-ti doo ki dū kitiŋ kin u nìn pōoǹ kí tīī ti-naanjabee ki tīī-ti. 24Ti-Dindaan nìn kpáafì-ti yii tí nīn tɔ́ u-bɔkpaaŋi kí nīn fàŋkí úǹ ti-Dindaan ti-Nimbɔtiu ní án bútí-ti tikɔkɔ poon, ní tí nīn bí dimaŋfalin kii an nín bí pu ki tīī-ti díǹ pu nee. 25Tin ti máaǹ kí ŋá ní kí nīn kítì ti-Dindaan ti-Nimbɔtiu nimbiinee di sá tí nīn ŋúb́ marab nee kɔkɔ, kí ŋá kii bi nín bí yii tí ŋá puee.»
S'ha seleccionat:
Deutéronome 6: BASSARDC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
BIBLE EN N'TCHAM (Bassar) © Alliance Biblique du Togo, 2013.