Matayo 26
26
Can ma neko Yesu
(Mar 14:1-2; Luk 22:1-2; Yoh 11:45-53)
1Munyo Yesu ocowo waco gigipiny me je, owaco ri jofonjirok pere ni, 2#Wok 12:1-27“Wiŋeyo ni ka ndelo ario orumo, Kalima ma Kadho bino tundo, aka ibino ketho Wod Dhano i cingi joma jolaguro go kwoŋ musalaba.”
3Gikenyo jotel pa jocway ri Were i wi migam kodi jotel pa ji jocokere i diedipo pa jadwoŋ pa jocway ri Were i wi migam m'ilwoŋo ni Kaifas, 4aka jocano mako Yesu nyaliŋliŋ jowoneki go. 5“Wakiri watim gime i ndelo madwoŋ, rupiri ji jonyalo cako woy.”
Iwiro Yesu gi mo i Bethania
(Mar 14:3-9; Yoh 12:1-8)
6Munyo Yesu oyido nitie Bethania i ot pa Simon jadhowo, 7#Luk 7:37-38dhako moro obino bonge kodi cupa mo ma welo kendo maŋwe kur, to konjo i wiye, kama go onwaŋo obed'iye dhower. 8To munyo jofonjirok joneno ameno, joramere, to jowaco ni, “Onyeki mo me raŋo? 9Kole gime d'onyal kitana pesa madit, t'imiyo jocandi!” 10To Yesu, paka oŋeyo gime, owaco rijo ni, “Wikwinyo dhakodwoŋ me rango. Kole go ee otimo ran gimaber tektek. 11#Cik 15:11Winitie gi jocandi noknok, to wikilabedo kodan noknok. 12Kole go okonjo mo me kwoŋan ma yiko gine delkwoŋ m'ikidho yiko i kaliel. 13Adieri awaco riwin, kamoro je ma Wac Manyen Maber me ofonj'iye i piny gipi, gima go otimo me ibino waco ma poyo go.”
Yuda yeyo camo sereko ri Yesu
(Mar 14:10-11; Luk 22:3-6)
14Gikenyo acel kwoŋ jofonjirok apar g'ario, m'ilwoŋo ni Yuda Iskariot okidho bongi jotel pa jocway ri Were i wi migam, 15#Zek 11:12to penjo ni, “Wibino miyan aŋo ka aketho Yesu i cingi win?” To jokwano rigo pesa ma nusu feza piero adek to jomiyo go. 16Wok i hongo no Yuda odwaro royo ma nyalere ma ketho Yesu i cingi jo.
Yesu camo Kalima ma Kadho gi Jofonjirok pere
(Mar 14:12-21; Luk 22:7-13,21-23; Yoh 13:21-30)
17I ndelo marapena ma kalima ma mugat ma buthow, jofonjirok jobino bongi Yesu to jopenjo go ni, “Imito ni wayiki rin Kalima ma Kadho gi kune?” 18To waco rijo ni, “Kidhi win i tindi i peco pa nyatoro wiwaci rigo ni, ‘Jafonji waco ni, hongo paran otundo; alacamo kalima ma Kadho kodi jofonjirok paran i ot perin.’ ” 19Jofonjirok jotimo paka Yesu owaco rijo to joyiko Kalima ma Kadho. 20Munyo hongo m'othieno otundo, Yesu kodi jofonjirok pere apar g'ario jobedo piny cemo. 21Aka munyo jocemo Yesu owaco ni, “Adieri awaco riwin, acel kwoŋ win bino camo ran sereko.” 22Jofonjirok jodhier swa to jocako penjo go, acel acele ni, “Rwoth, iwacan?” 23#Zab 41:10Yesu odwoko ni, “Ŋat'opilo cemo i sen acel kodan ama bino camo ran sereko. 24Wod Dhano bino tho paka Ndiko Maleŋ waco, to kidamba bino bedo ri ŋati m'ocami rigo sereko! D'ober loyo bedi cango k'onywol go!” 25Gikenyo Yuda, jacami sereko, oluwo malo ni, “Adieri Jafonji, meno miti ikiwacan?” To Yesu dwoko ni, “Eno iwon iwaco.”
Cemo pa Rwoth M'othieno
(Mar 14:22-26; Luk 22:14-20; 1 Kor 11:23-25)
26Munyo jocemo, Yesu okwanyo mugat, to miyo silwany to turo, to poko jofonjirok pere munyo waco ni, “Kwany win wicam; me delkwoŋ.” 27To kwanyo agwata, aka munyo otieko miyo silwany, omiyo jo munyo waco ni, 28#Wok 24:8; Yer 31:31-34“Madhi win giman'iye, wijoje; rupiri vini me obedo remo paran ma ridho cikirok manyen ma Were otimo gi ji pere, m'ooy ri ji mathoth ma cwako reco. 29Awaco riwin, akibino madho vini me kendo cuka ndelo m'anomadh'iye vini manyen gi win i Ker pa Baba.” 30Aka munyo jotieko wero wer ma pako Were, jowok woko to jokidho i got Oliv.
Yesu tuco kwedirok pa Petero
(Mar 14:27-31; Luk 22:31-34; Yoh 13:36-38)
31 #
Zek 13:7
Gikenyo Yesu owaco rijo ni, “Wijoje wibino ringo to wiweyan wor ma konon, kole ndiko waco ni, ‘Abino neko jakwath to rombo tiakere woko.’ 32#Mat 28:16To k'atieko cerino, abino telo kidho riwin Galili.” 33Petero owaco rigo kamaler ni, “Kada joje joweyin, an akibino weyin.” 34Yesu owaco rigo ni, “Adieri awaco rin, wor ma konon won me, mafodi wod gweno k'okoko, ibino kwedere kwoŋan didek.” 35Petero odwoko go ni, “Kada bedi ni aripo tho kodin, ak'okwedere kwoŋin.” Aka meno apaka jofonjirok man je bende jowaco.
Yesu kwayo i Gethsemane
(Mar 14:32-42; Luk 22:39-46)
36Gikenyo Yesu okidho gi jo kama ilwoŋo ni Gethsemane, to waco ri jofonjirok pere ni, “Bedi win ka, fodi akidho ye gicen kwayo. 37Go okwanyo Petero kodi wot Zebedayo jario. Gikenyo cunye ocako ramo to bedo gi rem. 38Aka owaco rijo ni, ‘Cunyan raman tektek, pa kidho nekan. Bedi win ka, aka wibedi waŋ win kodan.’ 39Aka munyo go omedere yumalo nyaka mathin, opodho gi nyime to kwayo. To waco ni, ‘Baba, ka nyalere, weyi agwata me woeye bongan. To weyi wobedi paka iyenyo makiweno paka an ayenyo.’ ” 40Yesu ogik bongi jofonjirok pere to nwaŋo jonindo, to waco ri Petero ni, “Adieri wikinyalo bedo waŋ win kodan kada nyaka ma sawa acel won? 41Bedi win waŋ win wikway aka ŋey wikiri widonji i karatem. Cuny win yenyo, to del ama nyap.” 42Odoko madirio, oeye to kidho kwayo. To waco ni, “Baba, ka agwata me kilaeye kwoŋan m'akimadho, weyi gim'iyenyo wotimere.” 43Go odoko odwoko to nwaŋo jonindo, rupiri nindo oyido dit swa i waŋ jo. 44Munyo oweyo jo kenyo, oeye kendo to kidho kwayo mar'adek, gi wac acel no won. 45Gikenyo go ogik bongi jofonjirok pere, to waco ni, “fodi winindo aninda wiywomere? Hongo onyo otundo m'ibino cam'iye ri Wod Dhano sereko t'ibolo go i cingi joreco. 46Ay win wakadhi! Jacami ran sereko eno otieko rikere cegin.”
Imako Yesu
(Mar 14:43-50; Luk 22:47-53; Yoh 18:3-12)
47Munyo go fodi luwo, Yuda, acel kwoŋ jofonjirok apar g'ario otundo. Go oyido nitie gi dwol ji madwoŋ ma jotiŋo abor kodi abirin, aka jowok bongi jotel pa jocway ri Were i wi migam kodi jotel pa Joyuda. 48Jacami sereko oyido otieko cano gi dwol ji no ranyuth ni, “Ŋat'anocwiy lembe meno a ŋata wiyenyo; kendo ama wimaki.” 49Yuda otundo to kidho tirtir bongi Yesu to waco ni, “Siem wobedi kodin, Jafonji.” To cwiyo lembe. 50Yesu odwoko go ni, “Jawodhan, tim gim'okelin ka ayin.” Gikenyo jobino to jomako Yesu jowokadhi gine. 51Ŋat'acel m'onwaŋo nitie gi Yesu oyuyo abor to toŋo ithi ŋeca pa jadwoŋ pa jocway ri Were i wi migam to codo woko. 52To Yesu owaco rigo ni, “Dwoki abor perin i ode, kole ji je ma jooro abor jobino tho g'abor. 53Wikuya nike d'anyalo kwayo Baba ni womiyan kony, piyo piyo no to go dhiro ran lwak jomalaika ma lwenyo apar g'ario. 54K'ameno onyo Ndiko Maleŋ ma waco ni gime ripo wotimere otundi nedi i kare?”
55 #
Luk 19:47; 21:37 Gikenyo Yesu oluwo kodi dwol ji no ni, “Oyido ripo ni wibin kodi abirin makan, paŋini a jakwo? Kole ndelo je abedo i Ot pa Were afonjo, to wikimakan. 56To gime je otimere ŋey gima jotuci wac Were jondiko wotundi.” Gikenyo jofonjirok je joweyo go to joringo.
Yesu ruwaŋ jopido
(Mar 14:53-65; Luk 22:54-55,63-71; Yoh 18:13-14,19-24)
57Joma jomako Yesu jotero go i ot pa Kaifas, jadwoŋ pa jocway ri Were i wi migam, kama jondiko kodi jotel pa ji oyido jocoker'iye. 58Petero oluwo go gi bor tundo i diedipo ma ot pa jadwoŋ pa jocway ri Were i wi migam. Go odonjo i diedipo to bedo piny kodi jokur kareno mito neno paka gimoro je obedi. 59Jatel pa jocway ri Were i wi migam kodi jopido jotemo rango gir'anena ma twodo kwoŋ Yesu, ma d'omiyo woneki go; 60to jok'onwaŋo atoŋa moro, kada jomathoth jotemo nyayo wac ma twodo kwoŋe. Rumacen j'ario jocungo, 61#Yoh 2:19to jowaco ni, “Ŋati me owaco ni, ‘Anyalo turo woko Ot pa Were me to agero man i ndelo adek.’ ”
62Jadwoŋ pa jocway ri Were i wi migam ocungo to penjo Yesu ni, “Ingoye gi radwok kwoŋ wac m'okel kwoŋin me?” 63To Yesu oliŋaliŋa. Jadwoŋ pa jocway ri Were i wi migam odoko oluwo gine ni, “I nyingi Were makwo, pama onyo akethin i kwoŋirok; waci riwan k'inen ibedo Kristo, Wod Were.” 64#Dan 7:13Yesu odwoko go ni, “Ato eno iwaco. To awaco riwin ni rumacen wibino neno Wod Dhano munyo obedo yu cingi Jameni je maracuc, odoko wibino neno ka bino i pondeponde ma polo.” 65#Jolevi 24:16Ro wac me jadwoŋ pa jocway ri Were i wi migam oyeco nangin pere to waco ni, “Me luwo gima k'otire kwoŋ Were! Mar'aŋo ma wayenyo jokony man kendo? Eno witieko winjo wac pere mareco! 66Wiparo nedi?” Jodwoko ni, “Banja oloyo go, aka go ripo tho.”
67 #
Isa 50:6
Gikenyo joŋulo i waŋe law to jogoyo go. Joman jogoyo lembe g'adhoŋ kareno jowaco ni, 68“Tuci riwan, Kristo! Tuci riwan ŋat'ogoyin!”
Petero kwedere kwoŋ Yesu
(Mar 14:66-72; Luk 22:56-62; Yoh 18:15-18,25-27)
69Petero onwaŋo obedo piny i diedipo, to acel kwoŋ jotic manyir mapa jatel pa jocway ri Were i wi migam obino bonge to waco ni, “Ibende oyido initie gi Yesu Jagalili.” 70To go okwero i waŋ joje ni, “Akuya gim'iluwo kwoŋe.” 71To ay to kidho dho waŋkac ma diedipo. Jatic manyako man oneno go kenyo to waco ri ji man kenyo ni, “Jame oyido nitie gi Yesu Janazareth.” 72Petero odoko okwero ni, “Akwoŋere, akuya ran jalo!” 73Munyo hongo okadho macek, ji m'oyido jocungo kenyo jobino bongi Petero to jowaco ni, “Adieri in acel kwoŋ jo. Odoko paka in iluwo wodhin awodha kamaler!” 74Gikenyo Petero ocako kwedirok gi kwoŋirok ni, “Akuya ran jalo!” I hongo no won to wod gweno koko. 75Gikenyo Petero opoyo wac pa Yesu ni, “Kafodi wod gweno k'okoko, ibino kwedere kwoŋan didek.” Riameno go owok woko to ywak malith swa.
S'ha seleccionat:
Matayo 26: DHOPE
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Dhopadhola DC Bible © Bible Society of Uganda, 2018.