Ezekiel 23
23
1Naawen yaa biisi ale mi ayen, 2<<Saalɔ biiga, nipok ale ta lieba baye. 3Ba le jam diem paala la, ba ya cheŋ Ejipiti. Ba yaa chim nidoa yaalisa dula. Ba yaa basi ate ba a tiri ba ale a yik ba biisa. 4Le kpagni yuei jam ale Oyola, nwala yuei jam ale Oyoliba. Ka mi ale jam soa ba a biak nidoabilisa ale nipokbilisa. Oyola chim ka Samaria alege Oyoliba a chim Jerusalem.
5<<Samaria ale jam diem ka mi pok diila, wa yaa goa ale nidoa yonta. Wa jam ta ka kɔrisa nna yegayega ale wa nɔŋtaŋa. Wa nɔŋtaŋa a nyini ka Assiria. Assiria demma jam ka tugurik tɔŋdɔba a 6jo garuk sobta. Ba jam ka tɛŋka kpaga ale tugurik tɔŋdɔba kpaga ba meena jam ka nuru naliŋsa a do wusuma. 7Samaria yaa chim nidoa yaalik a te Assiria nidoama meena ale chim nuruba dek la. Wa yaa daŋ wadek ale waai meena bɔgta ate wa a yaali la. 8Wa yaa deri kasim ta wa nidoa yaalika nyeka ate wa piilim Ejipiti la. Wa le jam diem paala la, wa goa ale ka nidoaba ate ba tiri tiri wa bisaŋa.
9<<Mi yaa basi wa te wa nɔŋtaŋa Assiria demma ate wa a yaali nna yegayega la. 10Ba yaa yeeri wa gattaŋa alege wa chaboala a pai wa bisaŋa ale wa liema a ta cheŋ. A yaa ko wa ale gebik. Nipooba jigi meena yaa biisi ba le namsi wa diila.
11<<Wa suoku Jerusalem yaa nya dii ale nye la, alege wa ŋman gaam wa suoku Samaria ale a yaali nidoama diila. 12Wa mɛ a yaali a Assiria demma, baai ale ka tɛŋka kpaga ale tugurik tɔŋdɔba kpaga ale tugurik tɔŋdɔba a jo garuk naliŋsa la. Ba tugurik tɔŋdɔba kpaga, nuru naliŋsa a do wusuma. 13Mi yaa nya ayen ba nɔi bayewa ka bunyi. Ba meena ka nidoa yaalisa.
14<<Alege Jerusalem a diem nye wieŋa chaab a gum du. Wa nya ka ŋanta ate Kaldiya demma a nye a basi siak nyiŋ. Ba jam ka ŋanmɔnta, 15a bobi chiak gbana ba chaasa ale vili ŋanta ba zuima. Ba meena a nye ase ka wusuma torokoba kpaga la. 16Wa le nya ba la, wa jam a yaali wa goa ale ba kama a yaa tom nuruba ba jigi Kaldiya. 17Babilon nuruma yaa jam goa ale wa a taŋ wa. Kula ŋaaŋnyiŋ wa yaa basi. 18Alege wa kasim a yaali wa nidoama peeli peeli ate waai meena seba. Ate mi yaa cheem ŋaaŋ te wa, wa nyeka nyiŋ ase wa suoku la. 19Alege wa yaa teeri diipo ate wa paala a chim nidoa yaalik a bo Ejipiti la, a yaa ŋmasi jo nidoa yaalik po yega. 20Ba a yaali ka nidoa baai ate nipok kɔrisa a dan ta ba, ba a nye ase duŋsa la. 21Ku ka dila dek fi mɛ jigi ate fi a yaali ayen fi a nye waba tii ate fi jam a nye Ejipiti la. Nuruma de a tiri fu kama ale ŋmɛ fi biisaŋa.
22<<Dila nyiŋ, Jerusalem, Nyɔnɔwa Naawen ale biisi diila ale nna. Fi jiak kama ale fi nɔŋtaŋa. Yɔgyɔgla de m le basi ate ba sue a puuri ale fu ate ba siti jiŋŋa meena. 23Nuruba ale nyini Babilon ale Kaldiya meena ale Pekod ale Soa ale Koa a siti fu. Assiria demma meena ale siti fu. Tugurik tɔŋdɔba kpaga naliŋsa, baai ale chim nuru kpienta ale baai ale a do wusuma ale siti fu. 24Nuru bala ale siti ni ale tugurik tɔŋdɔ boari ale ba kpaliŋ kɔlima, ale wusuma torokoba. Ba le gilim ni ale ŋan baai ale a chɔgsi pɛ la ŋan fiisa ale ŋan kpienta ale zuk china. M le te ba suik ate ba namsi ni. Ba le te ni ka badek namsika. 25Ate ni seba m sui puurika ale tua diila ase ba ale a namsi ni ale sui. Ba le gebi ni nyueŋa ale ni tueŋa. Ate nama baai ale tali la ba le ko ni ale gebik. Ba le ta ni nidoabilisaŋa ale ni liema a cheŋ. Baai ale a tali la, bolim ale dɛ ba. 26Ba le yeeri ni gattaŋa abe ba zu ni ŋannalinsaŋa ate ni ta a su la. 27M le kpeglim biem buui meena ate ni jam bo Ejipiti a nye la ate ni kan ŋman yaali yaase ni teeri Ejipiti wie.
28<<Dila la Nyɔnɔwa Naawen ale biisi diila ale nna. Ayen ni yaa jiak ale ni nɔŋtaŋa kama. Alege m ni pai ni te ka nuru baai ate ni kisa. 29Ba le nye ale ni ale kisika, abe ba pai jaab meena ate ni tom nya la, abe ba basi ni kinla ale chaboala. Waai meena ale seba waba tii ate ni nye la. Ni nidoama bobi goomu, 30ale ta kude jam ni zuk. Fi goa ale tɛŋ yonsa a yaa daŋ fidek ale ba bɔgtaŋa kaabka. 31Fi nye ka wie ŋaai dek ate fi suoku nye la, dila nyiŋ fi le nam ase wa le nam diila. Fi le nyu ŋan tuasa ale beerik.
32<<Nyɔnɔwa Naawen ale biisi diila ale nna. Ayen fi le nyu beerik kaai ate fi suoku nyu la. Beerika dɛ abe limisa kama ale lagri. Waai meena ale nye fu la, dii nyiŋla, beerika sueri kama. 33Ka le nye ate fi buk kama ase daam fi nyu la abe nye nna niniga niniga. Ka ŋɔriŋka ale kaasuŋ beerik. Ka fi suoku Samaria beerik. 34Fi le nyu jaab meena ale bo ka po. Fi le saam a pai sa fi biisaŋa. Mi Nyɔnɔwa Naawen ale weeni.
35<<Dila nyiŋ Nyɔnɔwa Naawen ale biisi diila ale nna. Ayen fi baŋ mi wari kama alege cheem ŋaaŋ a te mi. M le namsi fu nuruma bobi goomu nyiŋ.>>
36<<Naawen yaa weeni mi ayen, <<Saalɔ biiga, fi le bo Samaria ale Jerusalem buusa? 37Ba kaasi kama ale kaboŋsaŋa nyeka ale ba nuruma ko ka. Ba maa nye ka kaboŋsa ale ba bɔgtaŋa. Ba pai ka ti bisaŋa kaab, a pai sɛ bolim po a te bɔgta ase ŋandiinta la. 38Ba nye mi mɛ dek ka dila. Ba basi kama ate mi yenni an nala. Ba kan zuli m Vuusum Daaŋa. 39Ba pai ba bisaŋa a kaab bɔgta. Dila po mɛ ba deri jo m yenni po an kan zuli mu. Ba le nye dii m yenni po la ale la.
40<<Ba tom kama ayen nuruba a nyini niŋ a jam, ate nuruma ba ale tom la ŋaaŋnyiŋ ba jam. Nipooma bayewa ale ka suata la a so nyiŋsa a magsi ba, ale yaali ŋanta a sa ba nina ale su kpana. 41Ba yaa kali gaduok naluŋ zuk, ate jazaanimu a za gaduokku tɛŋ. Ba yaa pai mi ŋan baai nyum ale masa la ale m kpaamu a zaani du.
42<<Nuru boari baai ale kaa wom biik la yaa nuem tɛŋka po. Nuru chaalinsa yaa tigsi chaab, ate ba ta da bugrisa a nyini gɔnni po jam. Ate ba pai chɔrin ŋaai ale a nyaksi a su nipooma ale ka suata la nisima ale vuk ba naam zutɔk naliŋsa. 43Ate mi yaa weeni waai ale jiak ale wa kaboŋsa nyeka la, basi ate ba diem bobi wa a goa. Wa da jaab jaaboa alege ka nidoa yaalik. 44Ba kasim a cheŋ wa jigi kama ase ba le a cheŋ nidoa yaalik jigi diila. Dila nyiŋ ba kasim a cheŋ Samaria ale Jerusalem jigi kama. Ba ka baai ale ta chivie. 45Alege nuru baai ale nye a magsi la ale namsi ba ase ba ale a namsi nipok baai ale maari a nye kaboŋsa ale a ko nuruba diila. Boan nyiŋŋa, ba nye kaasi kama ale ba kaboŋsa ale nuruma ko ka.
46<<Nyɔnɔwa Naawen ale biisi diila ale nna, ta nuru boari a jam jigi yeŋ, ate ba siti Samaria ale Jerusalem a yik ba a pai te ate ba nyigsi ba abe ba zu ba. 47Basi ate nuru boanni a yuk ba ale tana a ko, abe ba che ba ale gebisa a lɔnsi. Basi ate ba ko ba bisaŋa ale ba liema abe ba ju ba yeeŋa.
48<<Dila m yaa le kpegli nidoaba bobi goom tɛŋka po. Ate ku kaam nipooba meena ate ba kan goa ale nidoaba ase nama la. 49M le namsi ni nidoama bobi goomu ale bɔgtaŋa kaabka nyiŋ. Ate ni seba ayen Mi ale Nyɔnɔwa Naawen.>>
S'ha seleccionat:
Ezekiel 23: BWU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Ghana Institute of Linguistics, Literacy and Bible Translation