HECHOS 6
6
La yichꞌ leel juktul diakonoetik
1Te tiempo abi yipal ta bayalubel te hermanoetike. Te machꞌatik xkꞌopoj ta griego lijk yaꞌbiyanik te machꞌatik xkꞌopoj ta hebreoe. Ya yalik te griega meꞌba antstike ma kꞌuxutaybiluk lek yuꞌun makꞌ xꞌaꞌbot lek sweꞌelik te jujun kꞌaale. 2Te lajchaytul apostoletike la stsob sbaik sok te hermanoetike, y la yaltalanbe:
—Ma lekuk teme ya jkom jbatik ta yalel skꞌop Dios ta skaj spukel te weꞌelile. 3Jaꞌ yuꞌun, kermanotak, leaik jukebuk winketik ta awolilik te lek skꞌoplalike, sok te ay spꞌijil yoꞌtanike, sok te nojel ta yoꞌtanik te Chꞌul Espiritue. Yuꞌun jaꞌ me ya xkꞌot ta skuentaik te aꞌtel to. 4Yan te joꞌotike sigue me ya jkꞌopontik Dios y ta yalel te skꞌop Diose —xchiik.
5Y spisilik akuerdo a laj kꞌot y la stꞌujik te jꞌEsteban te ay xchꞌuunel yoꞌtan y nojel ta yoꞌtan te Chꞌul Espiritue, y sok te Felipee, sok te jProcoroe, sok jNicanor, sok jTimon, sok te jParmenase, sok jNicolas jtul talem ta Antioquia te ma juriyouk te kꞌajtajemix ta juriyoe. 6Te nax a la yikꞌik bael te ba ay te apostoletike, la skꞌoponbeyik Dios y la skajanbe skꞌabik ta sjolik.
7Te skꞌop Dios pujk bael, y te hermanoetike lom bayal yipal ta pꞌolel te ba Jerusalene. Asta bayal saserdoteetik yuꞌun juriyo la xchꞌuunik euk.
Chukot te jꞌEstebane
8Te jꞌEstebane aꞌbil spoder sok bendision yuꞌun te Diose, jich ya spas seña milagroetik ta stojol te jtejklume.
9Pero ay machꞌatik ay ta skuenta te sinagogae te sbiilinej te “Mosoetik te Kolemikix ta Libree”, sok ay machꞌatik talemik ta jtejklum Cirene sok ta Alejandria sok ta Cilicia sok ta jun estado yuꞌun Asia. Lijkik ta kꞌop sok te jꞌEstebane, 10pero ma juꞌ yuꞌunik te ya stsalik ta kꞌope. Porke jaꞌ ya yal te tut aꞌbil spꞌijil yoꞌtan yuꞌun te Chꞌul Espiritue. 11Jich a stojik palso testigoetik te ya yalik te la yaꞌibeyik sluwar te yipal ta stoyba-kꞌoptayel te jMoisese sok te Diose. 12Jich a slijkesbeyik slaꞌ-yoꞌtan a te jtejklume sok te moletike y sok te maestroetik yuꞌun te mantaliletike. Jich a skomon-tsakonik te jꞌEstebane, y la xjochik bael te ba tsobol te machꞌatik ay yaꞌtele. 13La spasik presentar te palso testigoetike, la yalik:
—Te winik to ma xlaj yoꞌtan ta sbol-kꞌoptayel te chꞌul templo to y ta sbol-kꞌoptayel te mantaliletike. 14Sok la kaꞌitik te tut ya yale te jaꞌ ya xba sjim te templo te Jesus te talem ta Nazarete. Y ya xba sjeltay te kostumbreetik te la yaꞌbotik jilel te jMoisese —xchiik.
15Te machꞌatik aylan yaꞌtele y spisil te machꞌatik te teꞌ nakajtik ae la skꞌelubey sit te jꞌEstebane. La yilbeyik te yelawe pajal yelaw sok te jtul chꞌul ángele.
S'ha seleccionat:
HECHOS 6: AMANNT
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Nuevo Testamento Tzeltal de Amatenango © Sociedad Bíblica de México, 2006.