2 Koronti 2
2
1Di̱ne yiko, n ko we ni̱r mi̱nu mi ne mang ki̱la bwa di̱ chi̱ne, di̱ne ke n yo chimi̱nu wuka kaiyan ni̱re we. 2Ki̱kumang ka n yo chimi̱n kaiyan ni̱renge, n wure ka li̱ma ni̱r mi̱nu? N ti̱n bi̱bu mang yo chimi̱n kaiyan ni̱remu nangti̱ bi̱bu ta li̱ma ni̱r mi̱ni̱mu. 3Nang chi a yo mang mwal chimi̱ne lwangi̱n di̱du mang swan mi̱ni̱ne. Mang babu be mang ya chi̱nu n ti̱n bi̱bu ti̱li̱mai ni̱ri̱mu ki̱ni ki̱swi wu ka kai mi ni̱re. Di̱ne n yim ka mi̱n ma ti̱mi̱lane ta mi̱ladu. 4N mwal chimi̱n yinangu ta kiyangu, di̱ne m mi̱n m ma furi ki̱liki̱lin ki̱ni nwe riye wuduwe ki̱ni ti̱mweni. Mang fwabu di̱ne ke n yo chimi̱n kaiyang ni̱re aya ke ti̱yim tiko m mi̱la chi̱n.
Duku ki̱letiyang we wu a ma ki̱le
5Ka ni a ma ki̱le, a kaibu kana mi̱n mi̱nbi̱ ni̱ru, aya ni̱bu bunti̱ki̱mi kwang. Mang fwabi̱ bi̱bu ke n kuka chimi̱n ki̱rang. 6Ti̱welantu a ya ki̱n di̱ne ni̱bu nabwenitu a wura ki̱mi̱n. 7Ki̱ka̱ngu, ti̱du ki̱mi̱n, ti̱kum ki̱mi̱n ni̱ru, ti̱dudu ki̱n we yinangu kaiyan ni̱re ka be ki̱mi̱nedu ki̱ni yarengu.
8Di̱ne yiko, mi̱n wanna chi̱nu, ti̱yo ki̱n a swaan ko ti̱mi̱la ki̱ni chikku. 9M mwal chimi̱n lwangi̱n di̱du ke n da̱ng tiku changu n ti tiyangu ta ma nangangu ki̱ni ya̱m mi̱mangu. 10Kanang wuwule wu ta du ki̱mi̱n ki̱leti kiye, m mi̱n n du ki̱mi̱n ti̱n. Chi a yo mang du ki̱mi̱ne, di̱ne a kakku Yesu Masiya. 11Di̱ne ke n Setan a yadu wa̱rewe wu ka butu niye, di̱ne ni yim ki̱fi̱lti kiyi kwang.
Naba nangange we bwa̱ki̱ ki̱fwiyangu
12Yo mang be Toruwa di̱ne ke n fwa ya̱m bi̱li̱m Yesu Masiya, n Tewuduwe a ni da wu mang ma mi̱n nangange. 13Aya ni̱r mi̱ni a muten di̱ne mang yabu ke fate nangan mi n Titus we fiko. Di̱ne yiko, n ma siramu we fiko n suti̱ Makidoniya.
Chakku Ki̱lang a di̱Yesuwe
14Aya di̱wan a di̱Kwama, n ki̱n wu ki̱maka ni kwadu, ni chau ki̱la we di̱n Masiyane, ki̱ma nangangu ki̱ni chi̱ni, ni ma di̱mwar yingku Masiya nu ka bwa̱le di̱du ni̱bu ki̱nwedu yinang ki̱nung ki̱ki fi̱rfi̱range.
15Di̱ne n chi̱ni yinang ki̱nung ki̱ki fi̱rfi̱ra̱ng ki̱ku n Masiya a ni Kwama, ki̱ku a ti̱ran we bi̱bu ki̱ya yuki̱mu n ti̱n bi̱bu a wa̱re twiyakemu. 16We bi̱bu a wa̱re twiyakemu, fi̱rfi̱re wu yinang wu a bwange, wu ki̱bedu ki̱ni bwange: Aya we bi̱bu ki̱ya yuki̱mu, fi̱rfi̱re wu ti̱kuri, wu ki̱bedu ki̱ni ti̱kuriye. A neni a lwe ka da̱u tureng nangang ki̱ke we.
17N chi̱ni bi̱bu a newe yinang bi̱kamu ki̱ma di̱mwaru ke chi ya ri̱keku. Aya yo kwer Kwama a tume niye, ni̱n fwa ya̱mu ki̱ni bi̱yili̱m we kakku kangu, di̱ne n chi̱ni ni̱bu nangang Yesu Masiya.
S'ha seleccionat:
2 Koronti 2: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.