2 Koronti 3
3
Ni̱bu nanga bi̱bu a bwa̱ki̱ ki̱fwiyam
1Yoye ni mwe na ni wer dutu chireta? Ka ni bau bi̱kam ni̱bi ka mwal lwangi̱n werki̱n we di̱chniya? 2N ti̱n nang lwangi̱nu n ni̱nni ki̱ni̱nu, di̱du ni̱bu a mwal a ni̱tu ni̱nni̱mu, ke n kawure a ku a ki ti̱n. 3N Ti̱n ti̱yung dur chi̱nu tiko n ti̱n lwangi̱n Masiya we nangi̱n chi̱ntu. Ni̱bu a mwalbi chi mwalki aya ki̱ni Fi̱ki̱m Kwamam wukure. A mwalbu a wule kwame aya a ni̱tu ni̱bi.
4Ni̱n fwa ying di̱ne ni̱n yo ni̱ru we Kwama a di̱n Yesu Masiya. 5N ke ko a ne nang medu nang ma chiti wauwadu ki̱diya kwaditu n ni̱n ni̱fwane. Dukan ni̱nu n ti chakku ki̱langu ki̱bedu a di̱Kwama. 6N ki̱n Nang wu a yo niyang me niyang ti we bwa̱ki̱ ki̱fwiyange. Wu a bunti̱bu a yilangu ni̱bu a mwalange, aya a bunti̱n Fi̱ki̱m Kwamame, yilang ki̱mwali̱langu nang chi a be ki̱ni bwa aya Fi̱ki̱mu ki̱bedu ki̱ni ti̱kuri.
7Ni̱bu a mwal Miyaku Musagu a wule kwame, dwiyen Kwamatu a fwe we fiko we yoko a yaki̱ nide, kasi ki̱ku wa̱liwa̱liye a ka̱be Musa a tibu kengu, a yii yinangu a yo ni̱bu Yisrelamu a mebu a da̱ngbu nukongu. Ka yilangu ki̱bedu ki̱ni bwangu a kau ki̱ni di̱kwan n ti dwiyene, 8yinu nabwe dwiyene wu a Fi̱ki̱m Kwamame ka kadi yire? 9Ka chi ki̱yo bwatu a be ki̱ni ri̱kakiye, a mwintuwe ti̱tuki̱bedu ki̱ni yile Kwamatu ka su ti̱tu kutan.
10Bi̱yili̱m, ri̱kaku a bwa̱ki̱ ki̱ka̱ra̱ngu a dwiyen we ki̱ka̱ngu, ka ni swe ki̱n n ti bwa̱ki̱ ki̱fwiyange. 11Yinu ka ti̱tu ki̱sudusuduwetu ki̱ni dwiyene, ka kadi yire n ti ti̱tu ki̱diya kwaditu.
12Di̱ne n ni̱n ki̱ni duum yo ni̱rem bi̱be, nang chi a yo nang ya dukane. 13N Ni̱n newe yinang Musa, wu a yinge kabu ko ki̱ni kwa̱du, ko ke ni̱bu Yisrelamu a kudu dwiyen ti̱tu ka riduriyetu we. 14Aya ni̱tu ni̱bitu we ki̱ngki̱ng, di̱ne lanta di ti̱kan chi we wu ki̱dang chi swaanku bi̱yili̱mange, yo ni̱bu ki̱ki bwa̱ki̱ ki̱ka̱ra̱ng si̱re we lanta ki̱ka̱ng ni̱bu a chaki̱bu, ni̱bu a yimbu chaki̱du ka n ke bunti̱ki̱ Masiyange.
15A lanta dii, ka ni̱bu ki̱ki taki̱da Musa, ki̱madu yinangu ti̱kan chi a yinge kabi̱ni chiyang. 16Aya yo ni a be bwa Tewuduwe, ti̱dui ti̱tu ki̱wora ti̱nu. 17N Tewuduwe ki̱ma nangangu we ni̱tu chi̱retu ki̱ni dukan Fi̱ki̱mi̱n, fi Fi̱ki̱m Tewuduwe wemi̱ne, nang fi da wemi̱ne.
18N chi̱ni bi̱bu kabi̱ni chireyu a yingebiyu, ki̱yiye wu a dwiyen Tewuduwe yinang mwe ni da̱ngi̱n ka̱be, ti̱nti̱ne ki̱sute nidu ni kadu yinang ki̱n. Suteki̱ku ni̱bu ma ni mi̱nangu ki̱rike ri̱kaki̱ku a chire a bwa di̱Tewuduwe, wu n ki̱n Fi̱ki̱me.
S'ha seleccionat:
2 Koronti 3: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.