2 Koronti 1
1
Di̱siir Bulusi̱n
1M mi̱n Bulus wu n Kwama a sutu ki̱ni ki̱ke ko, fandu Yesu Masiya n ti ke chi̱re n Timoti. A tum we kan Kwamanu a koriti n ti bi̱suturi̱m ba Akayami kwang.
2Li̱mangu n ti li̱me wu ki̱bedu a di̱Kwama Te n ti Tewuduwe Yesu Masiya a swe ware n ti chi̱n.
M Bulus a ni di̱wan a di̱Kwama
3Delaku n ti̱u Kwama Te, n ki̱n wu Te Tewuduwe Yesu Masiya, Te wu ki̱ni nabwe ki̱bune, Kwama wu ki̱kum nimi̱n ni̱re kasi no a bi̱bi̱le duum kaiyan ni̱re. 4N Ki̱n ki̱kum ni̱mi̱n ni̱tu we riye chire kwang, ke n chi̱ni ni kum bi̱kam mi̱n ti̱n a kasi no bi̱bi̱le duum riyem, ki̱ni duum kunku ni̱ramu niyang ya a di̱Kwamamu. 5A dakan ni yindu ko yinangu ni nwe ne riye di̱ne Masiyangu, we yiko ni yati̱ ne kunki̱ ni̱rangu a di̱Masiya. 6Kasi no ni̱n nwe riye, ni̱n nwedu ke a kau chi ta kum ni̱re we, ke ti̱ ya yuku we kunku ni̱tu chi̱ntu we bunti̱ki̱ku. Ka ni̱n kum ni̱tu ni̱nte, ni̱tu chi̱ntu ti̱n ka ya kunku yinangu ta ya dukanu ta ma bwanu ki̱ni riye wu ni̱n nwede wu. 7Nang ka̱ta̱bi̱ chi ko bayim di̱ne chi̱ne, ni̱n yim ko tiyangu ta nwe riye yinang ni̱ni yangu, ta yati̱ kumki̱ ni̱rangu ni̱n yadangu.
8Kebu, nang babu ta kau ki̱dubu we duum riyemu nang nwe a ti̱m Asiyamu, di̱ne riye a lala, nang yobu ni̱ru ko nang ma ti̱kuri. 9We bi̱yili̱mu, a ma yinangu bwa a tu a be ni̱mi̱neng. Aya ti̱tu a fwe yiko, ko ke ni̱n ti we di̱Kwama wu ki̱kukku bi̱bwari̱me n ke funti̱ku bwiniyang chirengu. 10N Kwama a chakku ni we wu ne bwa, ka yuni ti̱nu, ti̱nti̱ne ni yo ni̱ru ko ka chakakku ki̱ni li̱me wu a ne dunidu. 11Yinangu ti̱maka ni̱nu ki̱ni twa̱ba̱ bunengu. Nang tiyangu ni̱bu nabwen ka wanna Kwama di̱ne ni̱nangu, n Kwama ka yo ni mi̱n delaku di̱ne n ki̱n a yiu twa̱ba̱ku ni̱bangu nabwen di̱ne ni̱nne.
M Bulus a kwiya siramu a do ka yadi̱mu
12Chi ki̱yo ni̱mi̱n ri̱kake, ni̱n yim we ni̱tu ni̱ntu ni ma fiswe wu wuyile we ti̱ti̱nitu ki̱ni ni̱ri di̱n kangu n Kwama ki̱badangu. Tiyangu ta yim fiswe nang ma n ti chi̱ne. Mang medu mang yidu mi ni̱n ma ti̱chitu wu we bi̱yili̱m Kwamamu. Ni̱n ma ti̱tu di̱ne li̱me Kwama n ke di̱ne yingku ti̱ti̱ni ti̱tu.
13Lwangi̱n miti kwa̱rikwa̱ri, a ne chi a fwa a laiye we, a ne chi neta swaane we. N yo ni̱ru ta swaan ni̱nnu wuka di ka la fi. 14Kasi no ta swaanbu ni̱n yinang we ki̱ka̱ngu, yo n Tewuduwe Yesu ka ki̱lawede, ta ngau kwiye ki̱ni ni̱n yinangu ni̱n ngau kwiye ki̱ni chi̱nangu.
15Di̱ne mang yim swaanki̱ changu n ti keku bi̱yili̱mang change, no n do mang ki̱la bwa a di̱chine ke ti̱ya delaku da yurau ti̱n. 16No n do mang tau bwa di̱ chi̱ne, yo kano mi̱n yika Makidoniya, yinu mang tatte fiko we yo mang ki̱lade ke ti̱sumi dukanu mang yaan bale Yafudiya. 17Ti̱kamadu n do yayu wu mang yimbu chitu mi̱n madita? Ka ti̱kamadu n ma ki̱ni da niya? Wu mang ki̱ladu mang yidu mi, “ngo,” n ti “Ngangonga”?
18Yinangu n Kwama ki̱fwa bi̱yili̱mi kwadangu, we yiko ti̱n, ni̱n fwa chimi̱n ya̱m bi̱yili̱m, n ke bi̱bu ka fwadu ko, “ngo ka ngango” 19Di̱ne n Yesu Masiya Bwe Kwama wu ni̱n mwa chi̱nu, m mi̱n n ti Sila n ti Timotiye n ke wu ki̱ kama ya̱me ka “Ngo ka ngango.” Ya̱m ki̱mu ngo ka bi̱yili̱m. 20Di̱ne n Kwama a rii bwa̱ki̱ kangu a mangi kwang a di̱ki̱ne. Nang chi a yo di ni ma “Amin” ki̱ni di̱n Yesunitu ke a ri̱ka di̱n Kwamanu.
21N Kwama nang wu a ni ni̱n n ti chi̱n runni wu ki̱ri̱nge we di̱n Masiya Yesunu, n ki̱n nang wu a suti chiniye ke ni kau ni̱bu ki̱m. 22A yo nimi̱n di̱mwalu ka swaani̱du ko n chi̱ni m bi̱ki̱ni̱mu ka nang chikiye Fi̱ki̱m Kwamam, a ni chi̱ni Fi̱ki̱mi li̱mang we ni̱tu chi̱retu ke ni swaan chitu yaka madu a bwa kakketu.
23N Kwama ka timiti̱nuwe bi̱yili̱mu mi̱n fwa chimi̱ndi̱mu, chi a yo mang bunti̱bu Korinti di̱ne ke n wela chi̱nuwe nabwen. 24Ti̱tu a yungbu ko ni̱n baddu nang yung chi̱nu yinangu ta ma nangang ki̱ni keku bi̱yili̱mang changangu, ni̱n yim ti̱tiki̱ri̱ng we a keku bi̱yili̱mang changu. We yiko, ni ya yayu ware ke ti̱ma furi mwe mwen.
S'ha seleccionat:
2 Koronti 1: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.