2 Koronti 13
13
Ki̱kure m Bulus a swanmi̱ne
1Ki̱ku ka kau ki̱tarang yinangu mi̱n ya bwa di̱chi̱nengu, yinangu bi̱mwali̱li̱mu ya̱m Kwamam a fwa ko, “Ya̱mu a ni̱bi burau ka bi̱tangemu a tituwemu ki̱ni ki̱kwi.” 2We beki̱ki̱robang mangu, n ngau ki̱kure we bi̱bu a ki̱tani̱mu n ti bi̱kamu ni̱bi kwang mi a du ki̱letiyu. Ki̱ka̱ngu mang newe ware n ti chi̱nangu, mi̱n ngatti̱ ki̱kure we ki̱da di̱ne ka n yange a ne ni wu ka swidu we ti̱welantewe.
3Ka ti̱badu ta yindu tiko m Masiya ki̱fwa chi mi̱ne ya̱me a di̱mi̱ne, ta yindi ying. M Masiya a ki̱tabu we tibe chi̱n n ti ki̱ki yikongu a yung dukan ki̱nu we tibe chi̱n. 4Kasi ki̱ku ni̱bu a kuka ki̱n a kwalan dukanengu, aya ki̱ni yiko, ki̱ni ti̱kuritu a dukan Kwaman. N ni̱n ti̱n ni̱n newe ki̱ni dukan, aya we nanga ki̱ku nang madu a tibe chi̱nangu, n ni̱nni ki̱ni ti̱kuri a dukan Kwaman.
5Ti̱swa̱ka̱ dutu chi̱ntu n ti̱ni ki̱ni kwang ke ti̱yim ka we ti̱bunti̱ Yesu Masiya ki̱ni keku bi̱yili̱mang, ti̱nang swa̱ka̱ dutu chi̱ntu. Yoye ta yimbu tiko m Masiya we n ti chi̱na? Bi̱yili̱m n we, ka ta ki̱tabu a wuka bale we swa̱ka̱ke. 6Mi̱n yo ni̱ru ta kedu tiko nang ki̱tabu, yinu n Kwama a ke ni̱mi̱n ti̱n.
7We fi nang yungbu ko ni̱n tu ni̱n chau ki̱la. Ni̱n twa̱ba̱ bunitu we di̱Kwama ko a maka chi̱n ti̱ledu bwila we, aya ti̱ma chitu a dakanitu, kasi ki̱ku ni̱bu ka kudu yinangu nang ki̱tanang. 8Nangki̱n nang bunti̱ kuteng bi̱yili̱mang, a ne nang medu nang bunti̱ chi ki̱katadu n ti bi̱yili̱mitu. 9Ni̱n ma ti̱mi̱lan ka ni̱n newe ki̱ni dukane, aya n ti̱ni ki̱ni dukanu. Ti̱nti̱ne ni̱n twa̱ba̱ chimi̱nu ko Kwama a yo wa̱ri chiyu a ya der. 10Nang chi a yo mang mwal chimi̱n lwangi̱n di̱du yo m mi̱n mang newe n ti chi̱ne, di̱ne ka n benge, ke n yo chimi̱nu riye we ya̱m maku nangangu ki̱ni dukan di̱du n Tewuduwe a niyinu, dukan mukku ni̱bu bunti̱ki̱mang n ke di̱du ka yo ni̱bumi̱n yaren.
Ya̱mu m Bulus a swammi̱ni̱m
11Mang swan ya̱mmi̱mi ying, kebi̱mi̱m, n Kwama a lanni wuka di li̱mang. Ti̱funti̱ bwi we fi swe di̱mbi̱li̱me, ti̱ nwe ya̱m mi̱mu, ti̱ke ki̱ni yichiyu, ti̱mi̱la yichiyu. Nang ki̱swi n Kwama a mi̱lan ni̱be n ti wu a li̱mange we n ti ching.
12Ti̱sii yichiyu ki̱ni kwarkaki̱ki ki̱yilang. 13Nibu bunti̱ki̱m Yesu mi kwang ki̱sii chi̱n tedu.
14Li̱me Tewuduwe Yesu Masiya, mi̱laku Kwamangu, n ti kunkaku fi̱ki̱m Kwamam a swe ware n ti chi̱n kwang.
S'ha seleccionat:
2 Koronti 13: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.