2 Koronti 12
12
Chitu n Yesu a yung Bulus a dwakam bi̱yili̱mitu
1Kasi ki̱ku ngakku kwiyengu ki̱ni kwang ka di̱tangu, mang chau kakki ki̱n. Ki̱ka̱ngu, mang chakakku mang fwa chitu n Tewuduwe Yesu Masiya a wudumi n ti dwakam bi̱yili̱mitu n ti chi yaka fwede. 2N yim wuka naba bunti̱ke wu we swa̱ti̱ti kub chiri taana a sutu Fi̱ki̱m Kwamam a da̱u ki̱n a chun twiye#12:2 Twiye: Ki̱tule a yim twiye wiin, nang chi a yo a yi ko twiye wu kutane. Aya yikayu Kuti, ki̱ni twiye a la wiine we da̱ngku chiyangu. wu kutane, (mang yimbu ka ti̱tu a fwe bi̱yili̱me, ka kana dwakam bi̱yili̱m, kana Kwama a yim). 3N yim nii wu, Fi̱ki̱m Kwamam a da̱u a yikan twiye wu kutane kwang, ka ki̱ni bwi yiye ka a newe yiko, kana Kwama a yim. 4We bwa ko, n ki̱n a nwe yikai ya̱mi yiyu a ne nii ka fwade we. Duum bi̱bu nii a ti̱me a ne medu ka fwa ya̱m we dur ki̱ni̱m.
5Mang ngau kwiye ki̱ni nii wu, aya ne mang ngau kwiye ki̱ni dur mi̱nu, ka n ke a chi ki̱yung ki̱taku mange. 6Chitu mang ngan kwiyetu we nabwen, aya ne mang kadu nang di̱r ka n ngau kwiye, di̱ne mang fwa bi̱yili̱m. Aya a ne mang ngau kwiye di̱ne ke ni̱bu a yoya ni̱r we chitu n chi a ku ki̱ni nui chiye a nwe ti̱ni ki̱ni ki̱teli chiyengtu.
7Di̱ne ke n ngaddu kwiye ki̱ni chii n Kwama a wudu mang kuutu, kaang burang a be tai ki̱ku a le bwimiyu yinang ki̱selang ki̱ki yiki̱nang. Ti̱tu a kau yinang wuka ni wu n Setan a tume ko ke a be, a ni riyenge, di̱ne ke a dangi ngakku kwiyengu. 8M bi̱u Tewuduwe da yitta mi a chaki̱mi burang ki̱ku, 9Aya ki̱yaiyu ko, “Li̱me mi a lwen, di̱ne we ki̱taki̱ mwangu, ni ku dukan ki̱nu a duyen nabwen.” Di̱ne yiko, mang chakakku ki̱ni ngakku kwiyengu, ki̱ni ti̱mi̱lan, ki̱ni ki̱taku mangu ke dukan Masiya a swe ware n ti mi̱n. 10Di̱ne yiko n ke ki̱ni ki̱taku mangu, n ti ki̱suli̱le ni̱bu ki̱mamide n ti riye n ti fumaki̱ku n ti ki̱kumetiyu dangtidangti di̱ne Masiya. Di̱ne yo mang ki̱tane, yinu n ya dukwanu.
Ti̱kuran Bulusitu we ni̱bu bunti̱ki̱mu a Korontom
11Bwa di̱te n ma, aya n ti̱n nang ni̱bu ta yoyimu. N ti̱n nang ni̱bu a no dakan ka weriyimu. Kasi ki̱ku m mi̱n n ke ti̱kan chiyangu, a dakabu ni̱bu bi̱bu ti̱yalu ko “Fandubu bi̱duum,” chimu bi̱bu ka layu. 12N Kwama a ma chi ya̱r yiitu n ti chi ka̱ta̱kitu a fa̱la̱ng mang we tibe chi̱n, ferediye n ma nangangu ki̱ni bwanu. Chi ya̱r yiitu n ti chi ka̱ta̱kitu a yung ko n mi̱n Fandu wuyile. 13A wuwule wa̱re wu mang yung chi̱n mi n ti̱n ti̱newe yinang bi̱kamu ni̱bu bunti̱kaime? Ka di̱ne mang dang chi̱n mi ti̱makayuwe ki̱ni ka̱mbi̱ra? Ti̱dumi we ki̱taku mangu.
14N do bwi, mang ya chimi̱n siram ki̱tarang. A ne mang yo chimi̱n kaang tureng, di̱ne mi̱n bau chi̱nu n ke ka̱mbi̱r chi̱n. Nangki̱n a dakabu bwesi̱mu ka da̱u tureng seli̱bu chimu, bunge seli̱bu a da̱u tureng bwesi̱mangu. 15Mang nwe ta̱ma̱ng chiku chi mi̱ni ki̱ne, kasi no mang su dur mi̱n we, ke n maka chi̱n. Ti̱kitu mi̱laku ti̱ma midanga? Di̱ne mi̱n su mi̱laku changu ki̱laan fiko.
16Ta kedu ki̱ni mi̱n tiko, mang ma chimi̱nbu tureng. Aya wuka nii ka yidu ko n mi̱n ki̱ni seta yii, n swa̱ku chi̱n ki̱ni ti̱kwani. 17N sul chi̱n a wuka we bi̱bu mang tume a di̱chine ma? 18N wana Titus a ya ware n ti wuka ke chire naba bunti̱ke. Ta yidu tiko n Titus a sul chi̱na? Yoye m mi̱n n ti ki̱n nang yabu ka nangang ki kiinanga? Wa̱renu wu a newe wiina?
19Ti̱kamaduwe tiko we ki̱swi wu, ni̱n funti̱ka bwi nang so yiniyu we di̱ chi̱ne. N Kwama we, ni̱n yim ni̱n fwa bi̱yili̱mu a di̱n Masiyanu. Ti̱nti̱ne kasi no ni̱n ma ti̱ti̱le chi, kebi̱mi̱m bi̱bu mi̱n mi̱ladi̱m, ni̱n ma ke ti̱ya dwiyeku. 20Mi̱n ka̱ta̱du mi yo mang be bwa di̱chine, ke n yadu lakaki̱we di̱chine we kangu mi̱n baddu mang yan chi̱nangu, yinu n ti̱n ta ya lakaki̱we kangu ti̱baddu we mi̱nengu, mi̱n wulu mi ka yamang ya di̱kulang n ti ki̱fwini n ti ni̱r di̱yanni̱n n ti bakku durang n ti ti̱turan n ti ti̱fwaran n ti kuki̱ku durang n ti kulangkulange.
21Mi̱n wulu mi ke n ki̱la ti̱bwana di̱ chi̱ne we, Kwama mi ka yodu mang nwe dibwi we kakku changu. Mi wulu mi ke ki̱la n madu furi ki̱lin we di̱ne ni̱bu nabwen bi̱bu a no ki̱ma ki̱letimu. Kanang chikiye, bi̱bu a wobu ki̱ti̱m we yaritu n ti ki̱fi̱btiyu n ti duum dati yiyimi kwang.
S'ha seleccionat:
2 Koronti 12: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.