1 Koronti 13
13
Mi̱laku
1Kasi no m me fwaku ya̱ma̱ngu ki̱ni yiini ni̱biyu n ti yiini ni̱bu ti̱tumbi̱ri Kwamamu, aya ka m mi̱n n newe ki̱ni mi̱lake, n kau yinang sum wu ki̱ni ka ker ka ki̱ka̱ngang ki̱ku ki̱ni ka nabwe dire. 2Kasi no mi̱n ma fa̱kui mi̱n swaanti̱ kasi no ti̱ti̱le chi ti̱lairi, yinu m mi̱n ki̱ni yingki̱ki kwang, kasi no mi̱n ki̱ni keku bi̱yili̱mangu yinang yinang, wu kasi kunni mang yidu mi a chimi̱ne, ka a mwintuwe n ne mi̱laku wenge, m mi̱n n ke chi. 3Ko no mang ni kasi no ti̱ti̱le ti̱tu mi̱ni ki̱niti kwang, kasi no mang ni bwi miyu ni̱bu ka twidu a ki̱rang, a ne kaang ta̱ma̱ng we ka mi̱n n newe ki̱ni mi̱lake.
4Mi̱laku ki̱yo bwanu n ti kwa̱mbi̱r, a ne ki̱fwini we mi̱laki̱ku. Mi̱laki̱ku a ne ki̱duli we, a ne kuki̱ku durang we. 5Mi̱laki̱ku a kebu kulangkulange, ki̱nwe ki̱bune, a kebu wu ki̱mi̱la ka yikiye, a kebu chi ti̱yingeri, a kebu takku ni a ni̱rangu. 6Mi̱laku a kebu muli̱nu, aya a ke ka bi̱yili̱m. 7Mi̱laki̱ku ki̱ tau bwanu we yotiyu a li̱mbiyu, ki̱yo keku bi̱yili̱mang, ki̱yo yoni̱re we kasi no ti̱ti̱le, ki̱yo muku ni̱rang kasi no yire.
8Mi̱laki̱ku a riburiye ki̱diya kwadu. Aya fa̱kutu ka riduriye, fwaku yiiniyangu be ka sudu, yingki̱ku ka ridu. 9Ki̱ka̱ngu yingku chirengu a newe nabwe, fa̱kuitu ti̱n a newe nabwen. 10Yo di swan kute ka bede, ki̱ti̱nti yi kwang ka twiyadu.
11Ki̱dangu m mi̱n a no bwesi̱nangu, mi̱n fwa ya̱mu, mi̱n mati̱ ti̱kurantu yinang bweti̱re. Aya yo mang dwiyene, n du da bwesi̱me. 12Chitu ni̱n kudu ki̱ka̱ngitu yinang ki̱wulang ki̱ku ni̱n dang ka̱beko a mwe. We diko be ni kudu kabu n ti kabu. Ki̱ka̱ngu yingki̱ mangu a newe di̱bi̱l. Aya we diko mang swaani siin yinangu n Kwama ki̱swaan mi̱nangu.
13Ki̱ka̱ngu kwa̱li̱n chi̱n di̱di yittanu a swe. Kanang chikiye, keku bi̱yili̱mang, yo ni̱re, n ti mi̱laku, aya mi̱laku a la chiti kwang.
S'ha seleccionat:
1 Koronti 13: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.