1 Koronti 14
14
Ki̱ti̱me yiiniye n ti wu a fa̱kuye
1Ti̱mu ni̱ru ti̱bau mi̱laku, ti̱mi̱la bakku ki̱ti̱nti yiyu a fa̱kui. Ka no ta mede, ti̱bau fa̱kutu. 2Di̱ne wu ki̱fwa ya̱m ki̱ni bene, a fwabu ya̱mu n ti ni̱bu ki̱fwadu n ti Kwama. Di̱ne a ne nii ki̱swaan chi ki̱fwadite we, di̱ne ki̱fwa chitu niyan swaanbi ki̱ni dukan fi̱ki̱m Kwaman. 3Aya wu ki̱ma fa̱kuiye, ki̱fwa ya̱mu n ti ni̱bu ke ni a ti kwir, a ya, a rub, ki̱kire ni̱bu mi̱nu. 4Nii ka fwa ya̱mu ki̱ni yiiniye, ki̱do yiki, aya wu ki̱ma fa̱kuiye ki̱do ni̱bu bunti̱ki̱m.
5Mi̱n baddu n kawure ka fwa ya̱mu ki̱ni yiini, aya n bau ta ma fa̱kuitu a la chi. Wu ki̱ma fa̱kuite a la wu ki̱fwa ya̱mu ki̱ni yiiniye ka n ke wuka ni ka fwa ni̱bu mi̱n chi n ki̱n a fwa ke a mu ni̱be.
6Kebu mi̱m, ka m be mi̱n fwa chimi̱n ya̱mu ki̱ni yiiniyu ta yimbiye, ti̱tu ka maka chi̱ni yire? Aya ka n wudu chimi̱n chi yaka fwedite, ka n fwa chi yingkiye, ka fa̱kuye ka miyake, n nang chi ka maka chi̱ne. 7A lakanbu n ti chi a ne ti̱kuri we, yinang kwa̱l n ti ki̱mili̱nki̱me. Ka ker ki̱nu a chirbe, ni ka yindi yire kangu ni̱bu ki̱ngadangu n ti kangu ki̱kudangu? 8Ka ni̱bu a kubu sum wu a kunne yinangu ni̱bu ki̱ kudange, n wure ka chire kunnu?
9We di̱chine yiko, ka ti̱fwa ya̱mu ki̱ni wuka yii wu ni̱bu a swaanbe, ni̱bu ka yim chi ti̱ fwade yire? A yung ya̱m bi̱bu a kau bi̱kusi̱m. 10Fwaku yiiniyangu we dangtidangti we ti̱ti̱nitu, ka nang wuwule ki̱ni ki̱kwi. 11Yinu ka mang swaanbu yiiye, n kau nabakuu we nii ki̱fwa ya̱me, n ki̱n wu ki̱fwa ya̱me, a kau nabakuu we di̱ mi̱ne ti̱n. 12We di̱chine yiko ti̱n, yo kwer ti̱mi̱ladu ta ya ki̱ti̱nti yiyu a Fi̱ki̱miye, ti̱funti̱ bwi ti̱ni dukanu a yiyu ka maka chi̱nu n ti̱n ni̱bu bunti̱ki̱mu.
13Di̱ne yiko, kanang wuwule niye wu ki̱fwa ya̱mu ki̱ni wuka yiiye, a twa̱ba̱ buni ke n ki̱n a ya ki̱ti̱me wu ka yung ni̱bu yii wu n ki̱n a fwaan ya̱me. 14Ka n twa̱ba̱ bunitu ki̱ni wuka yiiye, fi̱ki̱m mi̱mu ki̱ twa̱ba̱du, aya mang swaanbu chi mi̱n fwaditu.
15Yoye mang ma wureni? Mang twa̱ba̱ bunitu a fi̱ki̱m, aya mang madu ki̱ni ti̱kuran mita? Ma kau teni Kwamai we fi̱ki̱m mi̱mu, aya mang madu ki̱ni ti̱kuran mitu. 16Ka a newe yiko, ka n dela Kwama a kana fi̱ki̱me, yinu kanodu n ki̱n wu ki̱nwene, wu a nwebi̱ yii wuwe, we kedu ko “Amin na?” We di̱wanu mun madi̱nu, ka a yimbu chi mun fwadite, n chi ka bunmi̱n ti̱ni yire? 17Kasi ki̱ku mwang dela Kwama yinangangu, aya ni wu a kunbu ki̱ni chi.
18N Kwama a mabe di̱ne n la chi̱n ki̱ni fwaku ya̱mu ki̱ni yiiniyangu. 19Ki̱ni yiko we muraku ni̱bu bunti̱ki̱mangu, n ke mang fwa ti̱kwa̱li ya̱miti tunu ki̱ni ti̱kuran mitu ke m miya bi̱kam mi̱n n ti ki̱ku mang fwa ti̱kwa̱li yiitu kuniri kubu ki̱ni wuka yiiyangu.
20Kebu mi̱m, ti̱madu ti̱kurantuwe yinang bwesi̱m, aya we muli̱nu, ti̱kau yinang bwesi̱m, aya ti̱kabbi ki̱ni ti̱kurantu yinang seli̱bu.
21A mwal we ya̱m Tewuduwe ko,
“Mang fwa ya̱mu n ti rungko
ni̱bu ki̱fwa yiini dangtidangtimu,
ke a fwa ni̱bu mi̱mu mi̱n ya̱m.
N chi ka fwa chi mi̱nu
ki̱ni yikayu yiini,
aya a mwituwe ni̱bu mi̱mu a ne ka nweiyu.”
22Ti̱da̱ng fwaku ya̱ma̱ngu ki̱ni yiiniyangu n ke di̱mwal we ni̱bu bunti̱ki̱mu. Fa̱kutu di̱ne ni̱bu keku bi̱yili̱mang, n ke di̱ne ni̱bu bi̱bu a kebu bi̱yili̱mi̱mu. 23Di̱ne yiko ka ni̱bu bunti̱ki̱mu a muran, yinu n kawure ki̱fwa ya̱mu ki̱ni wuka yiiye, yinu bi̱kam bi̱bu a yimbu chitu ni̱bu ki̱maditi̱mu, ka bi̱bu ki̱si di̱yori̱m a lewe fiko, n chi a ne ka yidu ko, fangi̱mi ki̱ma ni̱bu bi̱ba?
24Aya ka n kawure ki̱ma fa̱kuitu, yinu wuka wu a bunti̱bu Kwama ka wu a yimbu chi ni̱bu ki̱maditu a lewenge, ya̱m kawure mu a ne twai ki̱nu, ka yo ki̱nu ka wo ki̱ti̱ma? 25Chi a ni̱r ki̱ne ka chiredu, we yiko n ki̱n ka chungdu ka sii Kwama ki̱ni ya̱mu ko, “Bi̱yili̱m Kwama we ware n ti chi̱n.”
Ni si Kwama yinangu a dakanang
26Yoye ni madi yire kebu mi̱m? Yo ta murane, wu ki̱dela Kwama ki̱ni teni, wu ki̱yung chi ni̱bu a fwa, wu chi a ki̱ke Kwama, wu ki̱fwa ya̱mu ki̱ni wuka yii, wu ki̱fwa chi naba yiiniye ki̱fwade, ti̱ma chitu a da we Fi̱ki̱m Kwamamitu. 27Bi̱bu ka fwa ya̱mi wuka yiimu a ladi bi̱ta we, ti̱nti̱ne wuka a nabu kuteng yo wuka a fwa a riye, wuka a yung ni̱bu chi naba yiiniye a fwaatu. 28Ka a ne ni ka yung ni̱bu chi naba yiiniye a fwaatu wenge, ka n wure wu a no fwa yiiye a fwaduwe tibe ni̱bu bunti̱ki̱me, a fwa ya̱mu a tibeko n ti Kwamako.
29Ni̱bu ki̱ma fa̱kumu, a ladi bita we, aya bi̱kam a swe chi n chi a fwaatu. 30Ka Kwama a wudu wuka we bi̱bu a sweswemu ya̱m bi̱be, wu a mwe fwaku ya̱ma̱nge a lemi̱n. 31N ti̱ni ki̱ni kwang ti̱ma fa̱kuitu ki̱ni ti̱kati̱tu, a lami̱nti̱ yo n kawure ka miya chi we, yinu n kawure ka kum ni̱ru we. 32Fi̱ki̱m fwaki̱mu a nani fa̱kubu. 33Di̱ne Kwama chire n ke wu ki̱yo kulangkulange, aya naba li̱mange we ni̱bu bunti̱ki̱mu.
34Ti̱dudu nati̱bu a yingledu muraku ni̱bu bunti̱kangu we ki̱ni didi̱kuni̱nu. A daka chimi̱nbi yiko, n chi a nabu kwartabu, yinangu a fwa we miyaku Musangu. 35Ka n chi ki̱baddu ka yim ti̱kan chiye, a bi̱u kwartabu chimu a loni. Di̱ne chi dibwi naye ka fwa ya̱mu we tibe ni̱bu bunti̱ki̱me.
36Ya̱m Kwamamu a mwe a di̱ chinenga, ka ya̱m Kwamamu a ya bwa di̱chine n ti̱ni ti̱kuna? 37Ka wuka ni ki̱kamadu ko n ki̱n fa̱ku we, ka ki̱kudu n Kwama a ni ki̱n wuka ki̱ti̱me wu a Fi̱ki̱me, a dakan ka swaanu ko, chi mi̱n mwal chimi̱nde, ki̱ni dukan Tewuduwe. 38Aya ka wuka a swa̱ba ya̱m bi̱be, a ne nii ka keti̱ ki̱ne we.
39Di̱ne yiko kebu mi̱m, ti̱kube fa̱kuitu, aya ti̱kodu fwaku ya̱ma̱ngu we ki̱ni yiiniyu. 40Kasi no ti̱ma ti̱ti̱le chi, ti̱ma der yinangu a ne kau burti̱kangu.
S'ha seleccionat:
1 Koronti 14: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.