Filemon 1
1
1Kuom Filemon, osiepwa kendo jatich wadwa:
An Paulo, ng’at motue nikech Yesu Kristo, ema andiko baruani gi owadwa Timotheo. Wandikoni kaachiel gi kanyakla mar jo-Kristo malemo e odi. 2#Kol 4.17.Bende wandiko ni nyaminwa Afia kod Arkipo jalweny wadwa. 3Ng’wono gi kue moa kuom Nyasaye Wuonwa gi Ruodhwa Yesu Kristo obed kodu.
Hera kod yie mar Filemon
4Agoyo ni Nyasaye erokamano pile ka aluongo nyinge e lemona, 5nikech awinjo wach yie ma in-go kod hera ma iherogo Ruoth Yesu, kaachiel gi jo-Nyasaye duto. 6Akwayo Nyasaye ni, kaka ilando ni jomoko yie ma in-go, waduto wamed ng’eyo malong’o gueth mogundho ma wan-go nikech wayie kuom Kristo.
7Owadwa, kane awinjo ni hera ma iherogo jo-Nyasaye oseduogo chunygi, ne amor ahinya, kendo an bende chunya noduogo.
Paulo kwayo Filemon kuom wach Onesimo
8Kuom mano, kata obedo ni an-gi ratiro kuom Kristo mar chuni timo gima onego itim, 9to akwayi mana gi muolo nikech hera ma waherorego. An Paulo ng’at moti, bende ma koroni otue nikech Yesu Kristo, 10#Kol 4.9.asayi kuom wach nyathina Onesimo, mane odoko wuoda ka an e od tuech ka. 11Onesimo#1.11 v.11 — Tiend nying’ mar Onesimo en Jakony. yandi ok konyi, to koro okonyowa ahinya, in kaachiel kod an. 12Aduoge iri, kata obedo ni ochalo ringra awuon kamano! 13Da ahero mondo obed koda ka okonya kaeri, e kinde ma anie tuech nikech Injili ni. 14To ok adwar chuni mondo ikonya, to daher mondo ikonya mana kuom ng’wononi. Kuom mano, ok anatim gimoro ka ok iyiego. 15Kamoro nyalo bet ni Onesimo nowuok kuomi kuom ndalo manok, mondo chieng’ moro oduog iri ubed kode nyaka chieng’. 16To koro ok oduog mana kaka misumba kende, to oduogo ka ng’ama oloyo misumba, nikech osedoko owadu ma ihero kuom Kristo. An owuon ahere, to in ema ibiro here moloyo, nikech ibiro here kaka dhano, kendo ibiro here kaka owadu kuom Ruoth!
17Omiyo, ka ikwano ni an kod in wan e achiel kuom yie, to rwak Onesimo kaka dirwaka. 18Ka osetimoni gimoro marach, kata ka en gi gopi moro to kwan mano ka gima an ema an gi gopi. 19Koro andiko wechegi gi lweta awuon, ka asingora niya, “An Paulo, abiro chuli,” ka ok aparoni ni gopa ma in-go en mana ngimani iwuon! 20Par wachno owadwa! Adwaro ni mondo itimna ng’wono kuom Ruoth e wachni. Duog chunya kaka ja-Kristo wadwa.
21Andikoni ka ang’eyo ni ibiro timo gima asewacho, kata moloyo mano. 22To bende, ikna kar bet, nimar ageno ni Nyasaye biro winjo kwayou uduto, mi oduoga iru.
Mos mogik
23 #
Kol 1.7; 4.12. Epafra, motuewago nikech Kristo Yesu, omosi. 24#Joote 12.12, 25; 13.13; 15.37-39; Kol 4.10; Joote 19.29; 27.2; Kol 4.10; Kol 4.14; 2 Timo 4.10; Kol 4.14; 2 Timo 4.11.Mariko gi Aristarko gi Dema kod Luka, ma gin jotich wetena, bende jomosi.
25Ng’wono mar Ruoth Yesu Kristo obed kodu.
S'ha seleccionat:
Filemon 1: DHO15
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Dholuo DC Bible © Bible Society of Kenya and Bible Society of Tanzania, 1976.