NÁN RÓMA VɄ Moo dənée
Moo dənée
Ve' ku̵u̵ ya̧a̧ waaná' pig nɔm Yesu Krístu woolı̵́ kan nímní woo nɔmmé á̧ḿ máa, nán Yúúda ı̵́ tóó ku̵u̵ duu Yesu máa vu̵, kɔ́ ı̵́ Akíla vu̵ kan Prisíl wɔgɔ (i ho̧ debtere ba'ad waa ba'ad voo nɔ 18:2), vu̵ dəŋ moo to̧o̧ 'maŋ tú"í kaa gbaŋ gbanii woolı̵́ kaa Rómalȩ́ (i ho̧ moo dəné moo to̧o̧ 'maŋ voo vu̵ yu̵). Sey woolı̵́ nán kirtȩ́n ká vu̵ dəŋ sú̵ggı̵́ Rómalȩ́ sú̵'ú̵. A̧máa Pól ká dɨ woo moo tú"í hág Siiríilí, kan hág Gɛrɛ́ggı̵́, kan hág Aazíi Minéelȩ́; vu̵ bee ya woo wu̵ 'ya̧'a̧ yɛ Turkíi Aazíi. Tayɨɨ ká ba' Pól ba a laa woo “há̧á̧ hág sí̧'í̧dí.” Moo woo nɔ Pól o̧ bi laan Rómalȩ́ dágá né, ndíga bi duu la há̧á̧ hág Ɛspá̧yyə̧lȩ́ pȩ́ń á̧ḿ. Ba gaa né tow ká a kɔ́ ba'ad sí̧'í̧d máa yȩ ó̧ tɛ́ nɔ. A̧máa ka dɨ hȩn gáá woo mbɔ́ggı̵́ máa, bíńda ɗerwəl yɛ ba' la, “ı̵́ víí kíí dɨ Rómalȩ́ yȩ” (1:7), tú' ba bíńda pú̵ nán kirtȩ́n ı̵́ kaa yȩlȩ́ yȩ vu̵ yu̵, nán ı̵́ ku̵u̵ baa sú̵g kan Prisíl kan Akíla máa vu̵ yu̵ (i ho̧ 16:3-5).
Yúú ɗerwəl yȩlȩ́, Pól nuŋ hi̧naa a tú'ud nán kirtȩ́n ku̵u̵ mbaa wu̵lı̵́ yȩ vu̵, moo bi taa nɛ́nná yúú ba'ad bii ba kii kɔ́ sa̧a̧m nán ba ku̵u̵ nán Yúúda pɛ́lı̵́ yȩ voolı̵́lá? Ɗerwəl woo yȩ tú' hȩn tóó ba pɛn wu̵lı̵́ hágá né. Ba ki ví moo woo vu̵ wu̵lı̵́ 'waapád kɔ́ ı̵́ aga ka yee o̧ wɔgɔ o̧: “Moo to̧o̧ 'maŋ máa, wu̵ néélȩ́ Tayɨɨ woo, ka bi səd nán zó̧ó̧ 'yɛ́lı̵́ vu̵ wu̵lı̵́ má nɔ. Dəŋ nán Yúúda voolı̵́, ma laa nán ı̵́ ku̵u̵ Yúúda pɛ́lı̵́ máa voolı̵́ á̧ḿ” (1:16).
Hȩn təəlı̵́ sa̧a̧m nán Yúúda voolı̵́, kan ı̵́ ku̵u̵ Yúúda pɛ́lı̵́ máa (hȩn kaa vi wu̵lı̵́ máa, ba hí̧í̧ bi gaa mbaalı̵́ nán ku̵u̵ Yúúda pɛ́lı̵́ ma ku̵u̵ tii kirtȩ́n yȩ, vu̵ kɔ́ née kan dooká nán Yúúda voolá?), hȩn woo ká təəd kirtȩ́n ı̵́ tíŋ́ máa vu̵ mbaa ná'. Ba duu nuŋ ví moo vilí yȩ vu̵ debtere Pól woo tóó vu̵lı̵́ á̧ḿ, kɔ́ ı̵́ ɗerwəl woo ka ba'ad nán Galád vu̵ máa wɔgɔ. Pól sə̧' moo o̧ moo to̧o̧ 'maŋ ba kii pa moo woo yɛ, ba moo nán 'waapád voo nɔ, ba səgən nán tóó né sá̧ḿ (1:16). Duu tii o̧ nɛ́nná Tayɨɨ ba səd nán ı̵́ ba ka ti sú̵'ú̵ máalá̧, kóó ba a mbaa nɛ́nná, moo ba ka 'yɛ́ zó̧ó̧ Tayɨɨ woolı̵́ sú̵'ú̵ má nɔ (dəŋ 1:18 há̧á̧ a 'wáa 8:39 woolı̵́).
Pig woo máa, Pól duu za' moo ı̵́ tóó, hú' waa Izraɛ́l tóó ba vu̵n dɨ Krístu malȩ́ȩ. Duu o̧ hȩn malȩ́ ı̵́ yo̧go̧ máa, ban lı̵́n ba'ad Tayɨɨ woo né, a̧máa zó̧ó̧ nán Tayɨɨ woo ba wú̵ńnɔ si̧' sí̧'í̧d woo (sapíitər 9 kan 10 kan). 11). 'Ya̧'a̧ yɛ hȩn du̵u̵ Tayɨɨ ka kɔ́d nán ı̵́ ku̵u̵ nán Yúúda pɛ́lı̵́ yúú ya̧g du̵lı̵́ woolı̵́ yȩ, tii sı̵́ bee woo ú̵, moo há̧á̧ ba u̵u̵ tii nán 'maŋ yȩ́ńná (dəŋ 12:1 há̧á̧ a 'wáa 15:13 woolı̵́).
Sí̧'í̧d woo máa, Pól o̧ moo gáá woo, moo dɔggı̵́ Rómalȩ́. 'Waa ɗerwəl woo bindigo kan hȩn vá"ı̵́ dáń woo vu̵ wu̵lı̵́ á̧ḿ (dəŋ 15:14 há̧á̧ a 'wáa 16:27 woolı̵́).
Nán ı̵́ ku̵u̵ soo moo tú"í dȩ"ȩ́ na'a yúú zó̧ó̧ nán Tayɨɨ ka pú̵ nán vu̵ yȩlȩ́, kan Yesu Krístu á̧ḿ yȩ, vú̵ń nuŋŋɔ ɗerwəl Pól woolı̵́ yɛlı̵́. Moo taalı̵́ Tayɨɨ woo kan na"ȩ́ woo yȩ, vú̵ń kɔ́ nán yȩ vu̵ ɓá' á̧ḿ (11:33-36). Báń zigid ví nán yȩ vu̵ zó̧ó̧ do' dágá, moo vu̵ á̧ḿ, u̵u̵ kɔ́d Tayɨɨ ba'ad yȩ́ń kɔ́ ı̵́ kaa dɨddu̵ ví kɔ́lı̵́ yɛ wɔgɔ.
S'ha seleccionat:
NÁN RÓMA VɄ Moo dənée: DIINT
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Nouveau Testament en Dii © Bible Society of Cameroon, 2001.