Debtere ba'ad waa ba'ad voo nɔ 28
28
Pól dɨ mam bam Máltəlı̵́
1Kóó sə́d sú̵'ú̵ máa, pig woo vɔ́ ki vu̵ bee mam bam yȩ Máltə. 2Nán kaa woo vu̵ kɔ́d vɔ́ hȩn du̵u̵lı̵́ na'a; mam ka naŋ, ho̧o̧m ka ka̧' na'a máa, vu̵ káb vɔ́ vee gbo̧o̧ tóó, vu̵ fȩȩ vɔ́ 'waapád dáŋ́ woolı̵́. 3Pól la púg la' háá waa vu̵, bi ya 'yɛ́ vɛlı̵́, vaŋná bɨɨg tóó vee ka pigi máa, vúd ya nɔŋŋɔ sə́y mbaa nag woolı̵́.
4Sey nán kaa yȩ ku̵u̵ ho̧ la bɨɨg yȩ ka nɔŋ Pól sə́y mbaa nag woolı̵́ máa, vu̵ ó̧ń ya voolı̵́: “Nán yȩ, nán nɔm nɔɔnée gínú. Kóó a sɔ́d mam gbo̧o̧ yȩlȩ́ ó̧ si̧', Tayɨɨ wú̵ń gbɔnnɔ zá̧a̧d né.”
5A̧máa Pól mɛd bɨɨg pee gbɔ la vɛlı̵́. Hȩn tóó ndɔ́gɔnɔ waaná' aga né á̧ḿ. 6Nán pee vu̵ taa voo, nag Pól woo ban dɨ hú̵"ı̵́ɨ, tóó tée ba sı̵́ń há̧á̧ wá̧á̧ nɔɔ la yɔ. Vu̵ laa há̧á̧, vu̵ ho̧ hȩn tóó kɔ́nnɔ né, ma vu̵ tii ya̧g, vu̵ o̧ Pól ba tayɨɨ tóó nɔ.
7Ya yȩ, gbanaa mam bam yȩ dɨ dáŋ́ woolı̵́, yéé woo Puublíw. Fȩȩ vɔ́ kan zó̧ó̧ dȩ"ȩ́, dɔd vɔ́ woolı̵́ kíilí, vɔ́ ud wu̵lı̵́ bá' ta̧a̧nɔ́. 8A̧máa Puublíw ba' woo, yee gbo̧o̧ ba'a dɔ́gɔ, fó̧ó̧ woo pi á̧ḿ, ud mbaa hágá. Pól dɔ́ la lig woolı̵́, ɓá' Tayɨɨ yúú woolı̵́, ha'adu̵ nag yúlí, za̧a̧wo̧ wu̵lı̵́.
9Pig woolı̵́ máa, nán ho̧o̧ tóó vu̵ mam bammé wu̵lı̵́, vu̵ yaa; Pól za̧a̧ vu̵ á̧ḿ. 10Vu̵ dəm vɔ́ mba kɛb.
Sey kóó dɨ dɔ́lı̵́ nɛ́ŋ́ tóólı̵́ máa, vu̵ ba' vɔ́ kan hȩn gáá 'yȩ́m.
Pól ya̧ kaa gbaŋ Rómalȩ́
11Sȩȩ ta̧a̧nɔ́ ka ya̧a̧ máa, vɔ́ lúú kan nɛ́ŋ́ tóó ka yaa diga kaa gbaŋ Alegza̧ŋnderíilí máalȩ́, ká səə mbaa dɨ mam bam yȩlȩ́, moo ho̧o̧m kan sápéém á̧ḿ ká baa nam mam yȩ na'aná. Vu̵ bee yéé nɛ́ŋ́ yȩ woo “Tayɨɨ sa̧m vu̵ yu̵.” 12Ma vɔ́ la ya̧ kaa tóólı̵́, yéé kaa yȩ woo Sirakísdɨ; vɔ́ səə wu̵lı̵́ bá' ta̧a̧nɔ́. 13Vɔ́ duu lúú wu̵lı̵́, vɔ́ yóó duu ya̧g nɛ'ɛmé, vɔ́ la ya̧ kaa Regíolı̵́.
Ya̧g ka̧'a̧m woo máa, sápéém yaa ka' mam wázammé, ma vɔ́ lúú wu̵lı̵́.
Bá' idú woo máa, vɔ́ daa ya̧ la kaa Puuzóllı̵́. 14Kaa woo, vɔ́ maa nán kirtȩ́n tóó vu̵ wu̵lı̵́. Vu̵ hí̧í̧ oo səə kan bi alad dágá wu̵lı̵́ pȩ́ń, ma vɔ́ daa laa kaa gbaŋ Rómalȩ́. 15Nán kirtȩ́n ı̵́ Rómalȩ́ vu̵ ki sı̵́ yaalı̵́ vóó ú̵ á̧ḿ, ma vu̵ ya fȩȩ vɔ́, há̧á̧ lum Apíusdı̵́, kan kaa tóó ku̵u̵ beewu̵ yéé woo “Lig gáá ta̧a̧nɔ́” máalȩ́ á̧ḿ.
Sey Pól ka ho̧ vu̵ la ná' máa, dȩn Tayɨɨ nag, fó̧ó̧ sȩ́ńnɔ dɔg gəŋ́.
16Sey kóó ya̧ dɔg kaa gbaŋ Rómalȩ́ máa, vu̵ gbɔ Pól la mbaa ya tóólı̵́ kə́d. Só̧ó̧ze tóó tu̵gu̵ wu̵lı̵́.
Pól pa moo Tayɨɨ kaa gbaŋ Rómalȩ́
17Bá' ta̧a̧nɔ́ ka ya̧ máa, Pól bee ı̵́ nii Yúúda ku̵u̵ mbaa kaa gbaŋ Rómalȩ́ máa vu̵, yaan woolı̵́.
Sey ku̵u̵ sú̵g ya máa, Pól o̧d vu̵: “Nán míí vu̵, káń kɔ́n zig baa ví hȩn ɓı̵́d tóó né, káń lı̵́n hȩn dikab a ba ví yée voo né á̧ḿ yɛ nɔ si̧', vu̵ ma'an Yerúsalemmé, vu̵ dɔn nag nán Róma voolı̵́. 18Nán Róma ku̵u̵ vin moo máa, vu̵ hí̧í̧ bi kéé gbɔnnɔ́, moo vu̵ nugun moo tóó míílí̧, ka maan mí nɔɔné máa né. 19A̧máa nán Yúúda ku̵u̵ mbi zu̵u̵ nɔ́ɔ́ wu̵lı̵́ ba u̵u̵ gbɔn sá máa, mí pa̧ŋ moo woo yaan gbanii nán Róma voo woolı̵́, a̧máa mí doon vu̵ doolı̵́ɨ né. 20Moo woo nɔ ma, káń bee ví, bi mbad ví moo woo ú̵ yɛ nɔ. Mí gaŋ ɗág yɛ, moo hȩn zig Izraɛ́l ka mbaa laa pee woo nɔ.”
21Ma nán pee vu̵ hí̧i̧du̵: “Vɔ́ ho̧n ɗerwəl tóó yaan hág Yúúdalı̵́ né; nán tóó ba lúú ya pi ma, ba o̧d vɔ́ moo hȩn ɓı̵́d móó máa, pɛ́lı̵́ á̧ḿ. 22A̧máa vɔ́ hí̧í̧ bi ki moo taalı̵́ móó nɔ, moo vɔ́ gaa hi̧naa moo Tayɨɨ móó yȩ, nán Yúúda vu̵ sɛ́nnɔ né ya 'waapád.”
23Vu̵ gə́ń bá'.
Bá' woo ka ya̧ máa, dúú ɓu̵u̵lı̵́ na'a vu̵ la duu yaa lig dɔ́lı̵́ woolı̵́. Pól dəŋ vu̵ moo tú"í ya̧g ka̧'a̧mé, há̧á̧ ya̧ mɛn. Tíid vu̵ moo gbaŋ waalı̵́ Tayɨɨ woo, o̧d vu̵ u̵u̵ duu hȩn debtere Múúsa woo ka o̧ yúú Yesu woolı̵́ má nɔ, kan moo anábi voo á̧ḿ. 24Nán tóó vu̵ fȩȩ moo woo ka o̧ yȩ, a̧máa nán tóó vu̵ fȩȩ né.
25Ku̵u̵ bi daa lúú ka la ya̧g kə́kə́d máa, Pól o̧d vu̵ la moo yȩ: “Yigid Tayɨɨ woo ká o̧ moo yȩ́ńne, ma ká o̧d a ví yée vu̵ moo ya̧g anábi Esáya woolı̵́. 26Ká o̧:
‘A̧m laa zig yȩ woolı̵́, mɔ́ o̧ddu̵:
Víń baa ki moo yȩ, a̧máa wú̵ń dɔ́n ví tɔ́g né,
víń baa tə́gə, a̧máa víń ho̧ gaa né á̧ḿ,
27moo zig yȩ ŋgó̧ó̧ tɔ́g sú̵'ú̵,
yú tɔ́g woo,
sȩȩ nɔ́ɔ́ woo á̧ḿ,
moo ba ka bin ho̧,
ba ka bin ki,
ba ka bin 'yɛ́ zó̧ó̧ wu̵lı̵́, ba ka bin tii ya míílí̧,
ba ka míń za̧a̧ ho̧o̧ bii ú.’ ”
28Ma Pól duu ha' moo tóó, o̧: “I gaa la ú̵. Tayɨɨ ká ba'ad nán ı̵́ ku̵u̵ Yúúda pɛ́lı̵́ máa vu̵ yu̵ moo nán sənné yɛ. Vú̵ń ki voo ú̵.”
[ 29Sey Pól ka o̧ la moo yȩ ná' máa, nán Yúúda vu̵ fan moo sa̧a̧m voolı̵́ ɓu̵u̵lı̵́ na'a, vu̵ daa lúú.]
30Pól mbaa lig ka sú̵ú̵ ud wu̵lı̵́ yȩlȩ́, ve' idú. Baa fȩȩ nán ku̵u̵ yaawu̵ ho̧lȩ́ máa vu̵ 'waapád. 31Baa pa moo gbaŋ waalı̵́ Tayɨɨ woo kan zó̧ó̧ woo 'waapád; baa tú' moo yúú ı̵́ 'yɛ́lı̵́ Yesu Krístu woolı̵́ á̧ḿ. Nán tóó há'anɔ né.
S'ha seleccionat:
Debtere ba'ad waa ba'ad voo nɔ 28: DIINT
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Nouveau Testament en Dii © Bible Society of Cameroon, 2001.