زَبور 1
1
زَبورئے ائولی کتاب
زَبور 1—41
پهرێزکار و بدکارانی راه
1بَهتاور هما اِنت
که بدکارانی شئور و سَلاهئے سرا نرئوت،
گُنهکارانی رهسرا نه‌اۆشتیت و
ریشکند کنۆکانی دیوانا ننِندیت،
2هما که واهگی گۆن هُداوندئے تالیما اِنت و
رۆچ و شپ آییئے تالیمئے سرا پِکرَ کنت.
3آ هما درچکئے پئیما اِنت
که رُمبۆکێن جۆسرێئے کِرّا کِشَگ بوتگ و
مۆسمئے سرا نیبگَ دنت و
تاکی نگیمّرنت،
هرچے هم که کنت کامیابَ بیت.
4بله بدکار چُش نه‌اَنت،
آ هما پُگ و پَلارانی پئیما اَنت که گواتِشَ رۆپیت و بارت.
5گڑا بزان که بدکاران، په دادرسیا#1:5 دادرسی، بزان هَکّێن پئیسَله، هما شئور که چه دادگاهانَ کئیت، داوَری. اۆشتگئے واک و توان نێست و
گُنهکار پهرێزکارانی دیوانا هۆر بوتَ نکننت.
6که هُداوند پهرێزکارانی راهئے نگهپان اِنت،
بله بدکارانی راه تباهی و بێگواهی اِنت.
S'ha seleccionat:
زَبور 1: HPKB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2016-22 Wycliffe Bible Translators, Inc.