دَرگوَز 40
40
تَمبوئے مِکّ کنگ
1هُداوندا گۆن موسّایا گوَشت: 2”ائولی ماهئے ائولی رۆچا تَمبوا، بزان شاهدیئے تَمبوا مِکّ کن. 3شاهدیئے پێتیا تَمبوئے تها اێر کن و پردها پێتیئے دێما لۆنجان کن که پێتی چێر و اَندێم ببیت. 4ٹێبَلا تۆکا بر و سامانان ٹێبَلئے سرا په رِد و بند اێر کن. چِراگدانا تۆکا بر و چراگانی پِر کن. 5بۆسۆچیئے تلاهێن کُربانجاها شاهدیئے پێتیئے دێم په دێما اێر کن و تَمبوئے دپئے پردها پِر کن.
6سۆچَگی کُربانیگانی کُربانجاها تَمبوئے دێما، بزان شاهدیئے تَمبوئے دێما اێر کن و 7تْرَشتا شاهدیئے تَمبو و کُربانجاهئے نیاما اێر کن و آپی مان کن. 8تَمبوئے چپّ و چاگردا پێشگاهئے پردهان مِکّ کن و پێشگاهئے دپئے پردها پِر کن.
9پِر مُشَگی رۆگن بزور و تَمبو و تَمبوئے تَهئے سجّهێن سامانان پِر مُش و وَپْکِش کن که پاک ببنت. 10سۆچَگی کُربانیگانی کُربانجاها و کُربانجاهئے سجّهێن سامانان هم رۆگن پِر مُش و کُربانجاها وَپْک کن که سکّ پاک ببیت. 11تْرَشت و تْرَشتئے پادَگا هم رۆگن پِر مُش و وَپْکِش کن.
12هارون و هارونئے مردێن‌چُکّان شاهدیئے تَمبوئے دپا بیار و آیانی جانا بشۆد. 13پاکێن گُدان هارونئے گوَرا دئے، رۆگنی پِر مُش و وَپکی کن که دینی پێشوا ببیت و منی هِزمتا بکنت. 14هارونئے چُکّان بیار و جامَگانِش گوَرا دئے و 15اَنچۆ که تئو آیانی پت رۆگن پِر مُشتگ، آیانی جندا هم رۆگن پِر مُش که دینی پێشوا ببنت و منی هِزمتا بکننت. گۆن رۆگن پِر مُشگا آیان دینی پێشواییَ رسیت و اے پێشوایی اَبدمانَ بیت، نَسلانی نَسل.“ 16موسّایا سجّهێن کار هما پئیما کرتنت که هُداوندا هُکم داتگ‌اَت.
17چه مِسرا در آیگئے دومی سالئے ائولی ماهئے ائولی رۆچا تَمبو مِکّ کنگ بوت. 18موسّایا تَمبو مِکّ کرت، بُنهِشتی اێر کرتنت، تَهتَگی جَتنت، گوَربَستی مان تَرّێنتنت و مِنُکی مِکّ کرتنت. 19موسّایا پرده شاهدیئے تَمبوئے سرا داتنت و سرپۆشی پردهانی سرا پَچ کرتنت، هما پئیما که هُداوندا موسّا هُکم داتگ‌اَت.
20شاهدیئے دوێن وانِکی زرت و پێتیا کرتنت، گوَرباسکی پێتیا پِر کرتنت و کَپارَتئے سرپۆشی پێتیئے سرا دات. 21پێتی‌ای تَمبوئے تۆکا برت و پردهی پێتیئے دێما درَتک و پێتی‌ای چێر و اَندێم کرت، هما پئیما که هُداوندا موسّا هُکم داتگ‌اَت.
22ٹێبَلی شاهدیئے تَمبوئے تها، تَمبوئے شمالی نێمگا، چه پردها ڈَنّ اێر کرت 23و نگنی هُداوندئے بارگاها ٹێبَلئے سرا اێر کرتنت، هما پئیما که هُداوندا موسّا هُکم داتگ‌اَت.
24چِراگدانی شاهدیئے تَمبوئے تها، ٹێبَلئے دێم په دێما، تَمبوئے جنوبی نێمگا اێر کرت و 25همۆدا هُداوندئے بارگاها چراگی چِراگدانا پِر کرتنت، هما پئیما که هُداوندا موسّا هُکم داتگ‌اَت.
26تلاهئے بۆسۆچی کُربانجاهی شاهدیئے تَمبوئے تها، پردهئے دێما اێر کرت و 27کُربانجاهئے سرا وشبۆێن سۆچُکی‌ای چێر سۆتک، هما پئیما که هُداوندا موسّا هُکم داتگ‌اَت.
28تَمبوئے دپئے پردهی پِر کرت. 29سۆچَگی کُربانیگئے کُربانجاهی زرت و شاهدیئے تَمبوئے دێما اێر کرت و آییئے سرا سۆچَگی کُربانیگ و دانئے کُربانیگی پێش کرت، هما پئیما که هُداوندا موسّا هُکم داتگ‌اَت.
30بْرنجێن تْرَشتی شاهدیئے تَمبو و کُربانجاهئے نیاما اێر کرت و شۆدگی آپی مان کرت. 31موسّا، هارون و هارونئے چُکّان همے آپ زرتنت و وتی دست و پاد شُشتنت. 32هر وهدا که شاهدیئے تَمبوا یا کُربانجاهئے نزّیکّا شتنت، وتا شُشتِش، هما پئیما که هُداوندا موسّا هُکم داتگ‌اَت.
33موسّایا تَمبو و کُربانجاهئے چَپّ و چاگردا پێشگاهئے پرده مِکّ کرتنت و پێشگاهئے دَپئے پردهی پِر کرت. اے پئیما موسّایا کار سَرجم کرت.
هُداوندئے شان و شئوکت
34جمبرا شاهدیئے تَمبو سرپۆش کرت و تَمبو چه هُداوندئے شان و شئوکتا سَررێچ بوت. 35موسّایا شاهدیئے تَمبوئے تها شت نکرت که تَمبو جمبرا گپتگ‌اَت و چه هُداوندئے شان و شئوکتا سَررێچ اَت.
36وتی سجّهێن سَپران، اِسراییلی هما وهدا رهادگَ بوتنت که جمبر چه تَمبوئے سرا چستَ بوت، 37بله تانکه جمبر چستَ نبوت، آ رهادگَ نبوتنت. تان جمبرئے چِست بئیگئے رۆچا همۆدا نِشتنت. 38سجّهێن سَپران، اِسراییلیانَ دیست که رۆچا هُداوندئے جمبر تَمبوئے سرا اِنت و شپا جمبرئے تها آسے رۆک اِنت.
S'ha seleccionat:
دَرگوَز 40: HPKB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2016-22 Wycliffe Bible Translators, Inc.