لوکا 8
8
گۆن ایسّایا جنێنانی همراهی
1رَندا، ایسّا شهر په شهر و مێتگ په مێتگَ تَرّت و په مردمان هُدائے بادشاهیئے مِستاگئے جاریَ جت. آییئے دوازدهێن کاسِد همراه اَتنت. 2لهتێن جنێن هم که ایسّایا آیانی جِنّ کَشّتگاَتنت و چه نادْراهیان دْراه کرتگاَتنت، گۆن آیان گۆن اَتنت. چه آیان یکّے مَریَم اَت، که مَگدَلینیاِشَ گوَشت و ایسّایا چه آییا هپت جِنّ کَشّتگاَت. 3دگه یکّے یوانه اَت که آییئے لۆگواجه هوزا، هیرودیس بادشاهئے کلاتئے کارندهانی مستر اَت. یکّے سوسَنه اَت و دگه باز جنێن اَتنت که چه وتی زَرّ و مالان ایسّا و آییئے مُریدان کُمکّ کنگا اَتنت.
تُهم چَنڈگئے مِسال
(مَتّا 13:1–17؛ مَرکاس 4:1–12)
4چه هر شهرا مردم ایسّائے کِرّا پێداک اَتنت. وهدے بازێن مردمے آتک و مُچّ بوت، ایسّایا په دَروَر#8:4 دروَر، بزان مَٹّ، مِسال، پئیم، ڈئول. و مِسال گۆن آیان گوَشت: 5”دِهکانے وتی تُهمانی چَنڈگا شت. تُهمانی چَنڈگئے وهدا کَمّے تُهم راهئے سرا رِتک که پالَپاش بوتنت و بالی مُرگان چِت و وارتنت. 6کمّے تُهم ڈَل و ڈۆکانی تها رِتک. آ رُستنت بله زوتّ گیمُّرت#8:6 گیمُّرگ، بزان هُشک تَرّگ، نپَسگیر بئیگ. و هُشک بوتنت، چێا که زمینا نَمب نێستاَت. 7کَمّے تُهم چِرِکّ و ڈَنگرانی تها رِتک، هۆریگا رُستنت بله چِرِکّان تُهم رُدَگا نهاِشتنت. 8اے دگه تُهم شَرّێن زمینا رِتکنت و شَرّ رُست و مزن بوتنت و سَد سَری#8:8 سَد سَری، بزان سَد برابر، سَد رندا، سَد همینچُک. هۆشگ و بَرِش کرت.“ اے مِسالئے گوَشگا رَند ایسّایا په بُرزتئواری گوَشت: ”هرکَسا په اِشکنگا گۆش پِر، بِشکنت.“
9ایسّائے مُریدان چه آییا اے مِسالئے مانا جُست کرت. 10آییا پَسّئو دات: ”هُدایا اے زانت شمارا داتگ که هُدائے بادشاهیئے رازان سرپد ببێت، بله په آ دگه مردمان هُشکێن دَروَر و مِسال اَنت، تانکه:
’آ بچارنت، بله مگندنت
بِشکننت، بله سَرپد مبنت.‘
11اے مِسالئے مانا اِش اِنت: تُهم هُدائے هبر اَنت. 12راهئے سرا رِتکگێن تُهمانی مانا هما مردم اَنت که هُدائے هبرانَ اِشکننت، بله شئیتانَ کئیت و چه آیانی دلا هُدائے هبران درَ کنت که چۆ مبیت آ باور بکننت و برَکّنت. 13ڈَل و ڈۆکێن زمینا رِتکگێن تُهمانی مانا هما مردم اَنت که هُدائے هبرانَ اِشکننت و په گَل و وشّیَ مَنّنت، بله هُدائے هبر آیانی دلا ریشّگ و وَنڈالَ#8:13 وَنڈال، بزان هُنڈال، ریشّگ و رۆتگ. نجننت. کَمّے وهدا وتی ایمانئے سرا اۆشتنت بله آزمائِش و چَکّاسئے وهدا پُشتا کِنزنت. 14چِرِکّ و ڈَنگرانی تها رِتکگێن تُهمانی مانا هما مردم اَنت که هُدائے هبران اِشکننت، بله زندئے جنجال و زَرّ و مال و ائیش و نۆشان مانَ گیشّنت و بَر و سَمرَ نئیارنت. 15بله شَرّێن زمینا رِتکگێن تُهمانی مانا هما مردم اَنت که هُدائے هبران گۆشَ دارنت و په سِتک و دل و پاکێن نیّتے آیانی سرا اَملَ کننت و په سبر بَر و سَمرَ کارنت.
چِراگئے مِسال
(مَرکاس 4:21–25)
16کَسے که چِراگا رۆکَ کنت، دَرپێئے چێرا چێریَ ندنت یا تَهتێئے چێرا اێریَ نکنت. رۆکێن چِراگا چِراگدانا اێرَ کننت، تانکه هرکَس که لۆگا کئیت، آییئے رُژنا بگندیت. 17چێا که هچّ چُشێن چێرێن چیزّے نێست که زاهر مبیت و هچّ چُشێن رازے نێست که زانگ و آشکار کنگ مبیت. 18پمێشکا شما هُژّار بێت و بزانێت که چِه پئیما اِشکنێت. کَسێا که چیزّے هست، آییا گێشتر دئیگَ بیت و کَسێا که نێست، بله گُمانَ کنت که هستی، چه آییا هما هم پَچ گِرگَ بیت.“
ایسّائے مات و برات
(مَتّا 12:46–50؛ مَرکاس 3:31–35)
19پدا ایسّائے مات و برات آییئے گِندگا آتکنت، بله چه مردمانی بازێن مُچّیا آییئے نزّیکّا آتکِش نکرت. 20ایسّااِش هال دات که ”تئیی مات و برات په تئیی گِندگا ڈنّا اۆشتاتگاَنت.“ 21ایسّایا درّاێنت: ”منی مات و برات هما اَنت که هُدائے هبران گۆشَ دارنت و آیانی سرا اَملَ کننت.“
توپّانئے اێرمۆش#8:22 اێرمۆش، بزان آرام، هامۆش. کنگ
(مَتّا 8:23–27؛ مَرکاس 4:35–41)
22یکّ رۆچے ایسّایا گۆن مُریدان گوَشت: ”بیاێت گوَرمئے آ دستا رئوێن.“ بۆجیگا سوار بوتنت و راه گپتنت. 23وهدے بۆجیگ رئوگا اَت، ایسّا واب کپت. اَناگت بۆجیگئے سرا سیهگواتێا سر کرت و توپّان بوت و بۆجیگ چه آپا پُرّ بئیگی اَت. آیانی زِند هَتَرئے تها اَت.
24مُرید ایسّائے گوَرا شتنت، چه وابا پاد کرت و گوَشتِش: ”واجه، او واجه! ما مِرگا اێن.“ آ چه وابا پاد آتک و توپّان و مستێن دریاای هَکّل داتنت. گوات کپت و توپّان اێرمۆش بوت. 25آییا گۆن وتی مُریدان گوَشت: ”شمئے ایمان کجا شت؟“ مُریدان چه اے اَجَبێن کارا تُرست و بَه منتنت و چه یکدومیا جُستِش گپت: ”اے چۆنێن مردمے که گواتا و آپا هُکمَ دنت و آ هم اِشیئے هُکما مَنّنت.“
جِنّیێئے دْرهبکشی
(مَتّا 8:28–32؛ مَرکاس 5:1–20)
26گڑا گِراسیانی#8:26 لهتێن دَزنبشتا آتکگ: ”گَداریانی“. اَنچُش بَند 37ئے تها. مُلکا رَستنت که جَلیلئے دَمگئے دێم په دێما مَزَنگوَرمئے آ دستا اِنت. 27وهدے ایسّا چه بۆجیگا اێر کپت و هُشکیا آتک، چه شهرئے مردمان یکّے که جِنّان گپتگاَت، گۆن آییا دُچار کپت.#8:27 دُچار کپگ، بزان ڈیکّ ورگ، یکدگرا گِندگ. چه بازێن وهدێا آییا پُچّ گوَرا نکرتگاَت و لۆگێا ننِشتگاَت، کبرستانا کپتگاَت. 28وهدے آییا ایسّا دیست، کوکّارے جتی، آییئے پادان کپت و گۆن بُرزتئواری گوَشتی: ”ایسّا، او بُرزێن ارشئے هُدائے چُکّ! ترا گۆن من چِه کار اِنت؟ چه تئو دَزبندیَ کنان که منا اَزاب مدئے.“ 29آییا پمێشکا چُش گوَشت که ایسّایا جِنّ هُکم داتگاَت که اے مردا یله بدئے. اے مرد پێسرا هم باز رَندا جِنّا گپتگاَت، مردمان آییئے دست و پاد په زمزیل مُهر بستگاَتنت و گِر و دار کرتگاَت، بله مردا زمزیل پرۆشتگاَتنت و جِنّا مرد کَشّان کرتگاَت و گیابانان برتگاَت. 30ایسّایا چه آییا جُست کرت: ”تئیی نام کئے اِنت؟“ آییا پَسّئو دات: ”منی نام لشکر اِنت،“ چێا که بازێن جِنّے آییئے بدنا پُترتگاَت. 31جِنّان ایسّا مِنّت کرت: ”مارا جُهلێن تَهتَرونئے#8:31 تَهتَرون، بزان جهندَم، دۆزه. چاتا رئوَگئے هُکما مدئے“.
32همۆدا کُهدێما هوکّانی مزنێن رمگے چَرگا اَت. جِنّان ایسّا مِنّت کرت: ”مارا بِلّ اے هوکّانی جسما پُترێن.“ ایسّایا اجازت داتنت. 33جِنّان آ مرد یله دات و هوکّانی جسما پُترتنت و هوکّانی رمگ چه کُهدێما جَهلگا تچان بوت و گوَرما کپت و مُرت.
34گۆن اے کارئے گندگا هوکّانی چارێنۆک تچانا شُتنت و شهر و مێتَگِش هال داتنت. 35مردم شتنت که چمِّ وت بگندنت. ایسّائے کِرّا آتکنت و هما مردِش دیست که جِنّان یله کرتگاَت. آ ایسّائے پادانی دێما نِشتگاَت، پُچّ و پۆشاکی گوَرا اَت و هۆش و سار اَت. نون مردمانی دلا تُرس کپت. 36آ که وت چَمدیستێن شاهد اَتنت، آ دگه مردمِش هال داتنت که اے جِنّی چۆنُکا دْراه بوتگ. 37گِراسیانی مُلکئے سجّهێن مردمان گۆن ایسّایا دَزبندی کرت که چه مئے مُلکا دَر آ و برئو، چێا که آیان سکّ تُرست. پمێشکا ایسّا بۆجیگا سوار بوت و شت.
38هما مردا که ایسّایا آییئے جِنّ کشّتگاَتنت، گۆن ایسّایا دَزبندی کرت که منا بر گۆن. بله ایسّایا آ مرد پِر تَرّێنت و گوَشتی: 39”لۆگا برئو و وتی مردمان هال دئے که هُدایا گۆن تئو چۆنێن کارے کرتگ.“ آ مرد شت و سرجمێن شهرا جاری جت که ایسّایا گۆن من چے کرتگ.
جنێنێئے دْرهبکشی و جنکّێئے زندگ کنگ
(مَتّا 9:18–26؛ مَرکاس 5:21–43)
40وهدے ایسّا پِر ترّت، رُمبے مردما وشّاتک کرت، چێا که سجّهێن آییئے رَهچار اَتنت. 41هما وهدا یائِروس نامێن مردے که کَنیسَهئے مستر اَت، ایسّائے کِرّا آتک، آییئے پادان کپت و مِنّتی کرت که منی لۆگا بیا. 42چێا که آییئے یکّێن جنکّ که اُمری دوازده سالئے کِساسا اَت، مَرکیگ اَت. وهدے ایسّا آییئے لۆگئے نێمگا رئوگا اَت، مردمانی مُچّی آییئے چَکّا کپان اَت.
43همۆدا یکّ جنێنے هستاَت که دوازده سال اَت آییئے هۆن پَچ اَت. هچکَسا هم آ دْراه کرت نکرتگاَت.#8:43 لهتێن دَزنبشتا هم آتکگ: آییا وتی سجّهێن زَرّ په وتی دئوا و درمانا هرچ کرتگاَتنت. 44هما جنێن ایسّائے پُشتی نێمگا آتک و آییئے کباهئے لَمبی دست جت و هما دمانا هۆنی بند بوت. 45گڑا ایسّایا گوَشت: ”کئیا منا دست جت؟“ وهدے هچکَسا نمَنِّت، پِتْرُسا گوَشت: ”واجه! مردمان ترا اَنگِرّ کرتگ#8:45 اَنگِرّ کنگ، بزان چَپّ و چاگِردا گِرَگ، پارسیئے محاصره. و تئیی چَکّا کپان اَنت.“ 46بله ایسّایا پدا گوَشت: ”اَلّما کَسێا منا دست پِر کرت، من مارت#8:46 مارگ، بزان سما بئیگ، زانگ، مَهسوس کنگ. که واک و توانے چه من در آتک.“
47وهدے جنێنا زانت که اے هبر چێر دئیگَ نبیت، لَرزانا آتک و ایسّائے پادان کپت. آییا سجّهێنانی دێما گوَشت که من چێا ایسّا دست جتگ و چۆن هما دمانا چه وتی نادْراهیا وَشّ بوتگان. 48ایسّایا گوَشت: ”او منی جنکّ! تئیی ایمانا ترا دْراه کرت، په وشّی و سلامتی برئو.“
49ایسّا اَنگت هبرا اَت که چه کَنیسَهئے مسترئے لۆگا مردمے آتک و یائِروسی هال دات که تئیی جنکّ مُرتگ و نون استادا گێشتر دلسیاه مکن. 50ایسّایا اے هبر اِشکت و گۆن یائِروسا گوَشتی: ”متُرس، بَسّ باور کن، تئیی جنکّ دْراهَ بیت.“
51وهدے ایسّا یائِروسئے لۆگا رَست، آییا پِتْرُس، یوهَنّا، آکوب و هما جنکّئے پت و ماتا اَبێد، دگه هچکَس همراهیئے اجازت ندات. 52سجّهێن مردم گرێوَگ و مۆتک آرگا اَتنت. بله آییا گوَشت: ”مگرێوێت. آ نمُرتگ، واب اِنت.“ 53آیان ایسّائے سرا کندت، چێا که زانتِش که جنکّ مُرتگ. 54ایسّایا جنکّئے دست گپت و گۆن بُرزێن تئوارے گوَشتی: ”او منی چُکّ! پاد آ.“ 55جنکّئے ساه پِر ترّت و آ هما دمانا پاد آتک. ایسّایا هُکم دات: ”چُکّا ورگ بدئیێت.“ 56چُکّئے مات و پت هئیران و هَبَکّه منتنت، بله ایسّایا کَڈّن کرتنت که اے هبرا گۆن هچکَسا مکنێت.
S'ha seleccionat:
لوکا 8: HPKB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2016-22 Wycliffe Bible Translators, Inc.