Versets bíblics populars de Romanos 8

Comparteix

Mapa kꞌawa pꞌanɨ Tachi Akꞌõrepa pia uchiapiitꞌee jõmaweda ne–inaa pꞌasaru ichi kꞌinia iru pꞌanɨɨrãmaa. Mãga ooitꞌee ichiata mãɨrã jɨrɨda perã Cristode ijãadamerã.

Cristopa tachi mãgá kꞌinia iru bapari perã, mɨchi tꞌãripa mɨa nãga ijãa bɨ. Ãyaa wãda–e iru juadeepa piuruta pɨjida maa–e pɨrã mia jõnɨ pɨjida na eujãde pꞌanɨ misa. Cristo juadeepa tachi ãyaa wãpida–e pai angeleerãpa, netuaraarãpa, na pꞌekꞌau eujãdepemaarã waibɨarãpa pida. Apidaapa mãgá wãpida–e pai ne–inaa ɨ̃rapema wa tꞌẽepema ewari cherude. Ɨtꞌɨpɨara wãruta pɨjida pajãde maa–e pɨrã edupɨara wãruta pɨjida eujã ekꞌari maa–e pɨrã tꞌɨmɨpɨara wãruta pɨjida na pꞌekꞌau eujãde, ãyaa wãda–e pai iru juadeepa. Mɨa mãga jara bɨ wẽ–e perã ne–inaa tachi ãyaa wãpiitꞌee Tachi Akꞌõre juadeepa Tachi Waibɨa, Jesucristopa, tachi kꞌinia iru bapari perã.

Mãgá choodai Tachi Akꞌõre Jaurepa tachi kꞌaripapari perã, audú kꞌĩsia paraa pꞌanadakꞌãri maa–e pɨrã tachi tꞌãride juatau wẽe pɨkꞌa pꞌanadakꞌãri. Mãga pꞌanɨde tachi kꞌĩradoopa pꞌoyaa ɨtꞌaa tꞌɨ̃da–e pakꞌãri Akꞌõremaa, iru Jaurepa enenee nɨ̃bɨ tachi pari ĩyapaa bɨdepai, pedee wẽe.

Kꞌĩsiadakꞌãri jõmaweda Tachi Akꞌõrepa ooparide tachi ijãapataarã kꞌaripaitꞌee, ¿kꞌãata waa jaradaima? Tachi Akꞌõrepa tachi mãgá kꞌaripapari pɨrã, ¿kꞌaipa tachi kꞌachia ooima?

Ma jõma jara aupadade kꞌĩsiadakꞌãri, tachia kꞌawa pꞌanɨ Tachi Akꞌõrepa Jesucristo ome araa pꞌanɨɨrã atuapi–e paitꞌee.

Ma awara chi oo kꞌinia pꞌanapataarãpa ãchi pꞌekꞌau kꞌachia ooyaa bɨ kꞌapꞌɨapa oopi bɨkꞌa o kꞌachia jɨrɨpata. Mãgá atuadaitꞌee. Mamĩda chi oo kꞌinia pꞌanapataarãpa Akꞌõre Jaurepa oopi bɨkꞌa, kꞌãiwee pꞌanapata Akꞌõre kꞌĩrapite, iru ode pꞌanadairã mãikꞌaapa ɨtꞌaa wãdaitꞌee perã.

Kꞌachia beerãpa tachi ijãapataarã atꞌãri mãgá iru pꞌanɨ mĩda, tachia ne–inaa jõmaade ãchi pꞌoyaapata, tachi kꞌinia iru baparipa kꞌaripapari perã.

Mɨchi tꞌãride mɨa nãga kꞌawa bɨ. Na pꞌekꞌau eujãde pꞌanɨ misa, tachi makꞌɨara miada–e pꞌanɨ kꞌĩsiadakꞌãri jõma Tachi Akꞌõrepa tachimaa unupiitꞌee ichi kꞌĩra wãree eujãde.

Mãga–e pɨrã, ¿kꞌaipa tachi ãyaa ataima Cristo juadeepa, irua tachi kꞌinia–ee iru bamerã? Mãgá ãyaa wãda–e pai nepɨrade baairuta pɨjida maa–e pɨrã audú kꞌĩsia jõnɨ pɨjida maa–e pɨrã awaraarãpa tachi kꞌachia ooruta pɨjida Cristode ijãapata perã maa–e pɨrã jarrapisia jõnɨ pɨjida maa–e pɨrã pꞌaru wẽe pꞌanɨ kꞌaurepa chupɨria chitoonɨ pɨjida maa–e pɨrã awaraarãpa tachi jɨrɨruta pɨjida miapidaitꞌee wa peedaitꞌee. ¡Ne–inaa apidaapa tachi ãyaa wãpida–e Cristo juadeepa!

Mãpai Tachi Akꞌõrepa tachi ijãapataarã tꞌãride iru bɨ kꞌawapari perã, ũripari ichi Jaurepa jara kꞌinia bɨ tachi kꞌapꞌɨa pari. Ichi Jaurepa ichita iidipari irua kꞌinia bɨkꞌa.

Jõmaweda Tachi Akꞌõre Jaurepa pꞌanapi bɨkꞌa pꞌanapataarã Tachi Akꞌõre warrarã.

Chi oo kꞌinia pꞌanapataarãpa ãchi pꞌekꞌau kꞌachia ooyaa bɨ kꞌapꞌɨapa oopi bɨkꞌa, mãga oopata jɨrɨpata perã ãchia oo kꞌinia pꞌanɨ aupai. Mamĩda chi oo kꞌinia pꞌanapataarãpa Tachi Akꞌõre Jaurepa oopi bɨkꞌa, mãga oopata jɨrɨpata perã Tachi Akꞌõrepa kꞌinia bɨ.

Tachi Akꞌõrepa wãakꞌa–e paji pɨrã ichi Warra piupikꞌãri tachi pari, audupɨara wãakꞌa–e paitꞌee ne–inaa awaraa ichia jara bɨ teeitꞌee tachi Cristode ijãapataarãmaa.

Mãga jaradai Akꞌõre Jaurepa tachi tꞌãrimaa kꞌawapipari perã wãara Tachi Akꞌõre warrarã. Mãgá Tachi Akꞌõre warrarã pꞌanadairã, iru pꞌanadaitꞌee jõmaweda irua kꞌĩsia iru bɨ ichideerã–itꞌee ɨtꞌari pꞌananadakꞌãri. Ne–inaa iru pꞌanadaitꞌee iru Warra Cristopa iru bɨkꞌa. Iru na eujãde bɨ misa, ijãadakꞌaa beerãpa iru jɨrɨpachida miapidaitꞌee. Mãgá tachi aukꞌa jɨrɨpata. Mapa ɨtꞌari panadakꞌãri, Tachi Akꞌõrepa tachi Cristokꞌa papiitꞌee, aukꞌa iru kꞌĩra wãreede pꞌanapataadamerã.

Mãgee oo kꞌinia pꞌanapataarãpa ãchi pꞌekꞌau kꞌachia ooyaa bɨ kꞌapꞌɨapa oopi bɨkꞌa Tachi Akꞌõre kꞌĩra unuamaa iru pꞌanapata. Mapa oo kꞌiniadakꞌaa iru ũraa pꞌãdade jara bɨkꞌa. Wãara mãgá pꞌoyaa oodakꞌaa, Akꞌõre Jaure wẽe pꞌanadairã.

Na pꞌekꞌau eujãde mãgá mia jõnɨ jida, o–ĩa nɨ pꞌanɨ iru ewari waibɨa ewate. Jõma ne–inaa Tachi Akꞌõrepa ooda jida nɨmaa bɨ irua akꞌɨpimerã ichi warrarã Cristo cheru ewaride.

Kꞌawa pꞌanɨ Tachi Akꞌõrepa ooda jõmaweda atꞌãri mia nɨ̃bɨ, wẽra mia nɨ̃baparikꞌa ichi warra ewaa tꞌoitꞌee pakꞌãri.