Romanos 11
11
Tachi Akꞌõrepa Israel pidaarã jɨrɨtꞌerada
1Israel pidaarã mãgá pꞌanadapꞌedaa perã, ¿Tachi Akꞌõrepa ichi eperãarã yiaraa iru bɨkꞌã? ¡Mãga–e! ¡Mɨta Israel pida, Abrahamdeepa uchiada, Benjamín ëreerãdepema! Tachi Akꞌõrepa mɨ yiaraa–e bɨ. 2Irua Israel pidaarã naaweda jɨrɨtꞌeraji ichi eperãarã papiitꞌee. ¿Ɨ̃rá sãga ãchi yiaraa iru baima? ¿Kꞌirãpa pꞌanɨ–ekꞌã Akꞌõre Ũraa pꞌãdade jara bɨ iru pedee jarapari Elías itꞌaideepa? Israel pidaarã ãpɨte mãgɨpa Tachi Akꞌõremaa jaraji:
3‘Akꞌõre, tai poro waibɨarãpa pɨ pedee jarapataarã peepachida. Ichiaba pɨa altar oopida ãrikꞌoojida. Mɨ aupai pɨde ijãapari mãikꞌaapa ɨ̃rá mɨ jida jɨrɨ pꞌanɨ peedaitꞌee.’ (1 Reyes 19.10, 14)
4Mamĩda Tachi Akꞌõrepa Eliamaa pꞌanauji:
‘Mɨ jua ekꞌari eperãarã siete mil iru bɨ, atꞌãri mɨmaa aupai ɨtꞌaa tꞌɨ̃pata. Pɨkꞌa, ãra jida bedabaidakꞌaa jã ne–inaa juapa ooda Baal kꞌĩrapite.’ (1 Reyes 19.18)
5Tachi Akꞌõrepa ichi eperãarã ũkꞌuru ichi jua ekꞌari iru badakꞌa Elías na pꞌekꞌau eujãde bakꞌãri, aukꞌa ɨ̃rapema Cristode ijãa pꞌanɨɨrã jɨrɨtꞌeraji ichi jua ekꞌari iru bapariitꞌee. Mãga oopari ãchi kꞌinia iru bapari perã. 6Maperãpɨ ma ijãapataarã jɨrɨtꞌeraji. Eperãarã jɨrɨtꞌerada paara ãchia ne–inaa oopata kꞌaurepa, ãchia Tachi Akꞌõremaa jɨrɨtꞌerapikꞌajida ma ne–inaa oo pꞌanɨ pari. Mamĩda mãga–e. Irua ãchi jɨrɨtꞌerapari ãchi kꞌinia iru bapari perã.
7Mãgara ¿kꞌãata kꞌĩsiadaima Israelde? Jõmaweda Israel pidaarãpa unuda–e paji ãchia jɨrɨdapꞌedaa. Jɨrɨpachida Tachi Akꞌõrepa ãchi pia akꞌɨmerã, pꞌekꞌau kꞌachia wẽe. Mamĩda ũkꞌurupai, chi Tachi Akꞌõrepa jɨrɨtꞌeradaarã Cristode ijãadamerã, wãara mãga pꞌaneejida iru kꞌĩrapite. Jõdee chi apemaarã kꞌɨɨrɨ kꞌisua pꞌaneepachida. 8Mapa Akꞌõre Ũraa pꞌãdade jara bɨ:
‘Tachi Akꞌõrépata ãchi tꞌãri chaareepiji. Tau iru pꞌanajida mĩda, unuda–e paji Tachi Akꞌõrepa ãchimaa unupida. Ichiaba kꞌɨɨrɨ iru pꞌanajida mĩda, ũrida–e paji Tachi Akꞌõrepa ãchimaa jarapida. Atꞌãri mãga pꞌanapata.’ (Deuteronomio 29.4)
9Ichiaba Akꞌõre Ũraa pꞌãdade Rey David itꞌaideepa jara bɨ:
‘Akꞌõre Waibɨa, pɨ eperãarãpa kꞌĩsiapata Akꞌõre ewari ɨa pꞌanɨpapai pɨa ãchi pia akꞌɨpariitꞌee. Mãga kꞌĩsia pꞌanadairã, taawa pɨa ãchi kꞌachiade baaipii mãikꞌaapa miapii. 10Ichita ne–inaa oopata pɨ–itꞌee ãchia kꞌĩsia pꞌanɨkꞌa, pɨa wãara oopi kꞌinia bɨ kꞌãyaara. Maperã taawa pɨa ãchi tau pꞌãriu pɨkꞌapii ununaadamerã pɨa oo bɨ mãikꞌaapa ãchi eburukꞌukꞌua pɨkꞌadaidamerã ãchia ne–inaa kꞌachia oopata kꞌaurepa.’ (Salmos 69.22-23)
Tachi Akꞌõrepa judio–eerã kꞌaripada
11Waya iidiitꞌee: ¿Tachi Akꞌõrepa ichi eperãarã yiaraa iru bɨkꞌã? ¡Mãga–e! Wãara ijãada–e pada perã Tachi Akꞌõrepa kꞌinia badakꞌa, kꞌachiade baaijida. Mamĩda ãchia mãgá ijãada–e pada kꞌaurepa judio–eerã Cristode ijãa pꞌaneejida mãikꞌaapa Akꞌõre ode tꞌĩujida. Akꞌõrepa mãgá judio–eerã o kꞌachiadeepa kꞌaripa ataji. Mãga ooji judiorãpa mãɨrã ijãa pꞌanɨ unudakꞌãri, aukꞌa Cristode ijãadamerã mãikꞌaapa ichi ode tꞌĩudamerã. 12Judiorã Cristode ijãadaamaa pꞌanadapꞌedaa perã, na pꞌekꞌau eujãdepemaarãpa kꞌawaadai Cristopa ooda eperãarã kꞌaripaitꞌee mãikꞌaapa judio–eerãpa iru pꞌanadai jõma Tachi Akꞌõrepa kꞌĩsia iru bɨ Cristode ijãapataarã–itꞌee. Judiorãpa aukꞌa Cristode ijãadakꞌãri, ijãapataarã jõmaweda audupɨara o–ĩa pꞌanadaitꞌee.
13Ɨ̃rá parã judio–eerãmaa ne–inaa jaraitꞌee. Tachi Akꞌõrepa mɨ jɨrɨtꞌeraji parã judio–eerãmaa jarateemerã irua pedee pia jara pëida Cristode. Mɨ o–ĩa bɨ ma–itꞌee Akꞌõrepa mɨ jɨrɨtꞌerada perã. 14Na mimia oo bɨpa Tachi Akꞌõre–itꞌee, kꞌinia bɨ mɨchi aukꞌaarãpa parã ijãapata unudakꞌãri, aukꞌa Cristode ijãadamerã mãikꞌaapa Akꞌõre ode tꞌĩudamerã. 15Mamĩda Cristode ijãada–e pꞌanadapꞌedaa perã, na pꞌekꞌau eujãdepemaarã awaraarãpa irude ijãadai mãikꞌaapa tꞌãri aukꞌa pꞌanapataadai Tachi Akꞌõre ome. Tachi Akꞌõrepa ma judiorã atꞌãri pꞌoyaa pia akꞌɨ–e, mãga ijãada–e pꞌanadairã. Mamĩda ijãadakꞌãripɨ, Akꞌõrepa ãchi pia akꞌɨpariitꞌee. Akꞌõrepa chokꞌai pꞌirabaipidaarãkꞌa pꞌanadaitꞌee.
16Kꞌĩsiadáma nãgɨde. Judiorãpa trigo naapɨara ewadakꞌãri, mãgɨ́ awara bɨpata aɨdee masa oodapꞌeda, pan oodaitꞌee Tachi Akꞌõre–itꞌee. Mamĩda Akꞌõrepa trigo jõmaweda waripipari perã, wãara ma masa jõmaweda ichi–itꞌee. Mãga pɨkꞌa Tachi Akꞌõrepa judiorã chonaarãwedapema Abraham awara bɨji ichi–itꞌee, Abrahampa ijãa bada perã irua jarada. Mamĩda wãara Abrahamdeepa uchiadapꞌedaarã jõmaweda ichi–itꞌee, mãga ijãadakꞌãri.
17Abraham pakꞌuru kꞌarrakꞌa bɨ judiorã–itꞌee. Mamĩda olivo bɨɨrɨ uupataarãpa chi jua tꞌɨapꞌepatakꞌa ma pakꞌuru pipɨara chaumerã, mãga pɨkꞌa Tachi Akꞌõrepa Israel pidaarã ũkꞌuru tꞌɨapꞌe pɨkꞌaji, Cristode ijãadaamaa pꞌanadapꞌedaa perã. Mãpai pakꞌuru akꞌɨpataarãpa ma pakꞌuru jua tꞌɨapꞌedapꞌedaamãi awaraa pakꞌuru jua tꞌɨ bɨpatakꞌa mãgee jida chaumerã, mãga pɨkꞌa Tachi Akꞌõrepa parã judio–eerã tꞌɨ pɨkꞌa bɨji judiorã kꞌãyaara, Cristode ijãapata perã. 18Tachi Akꞌõrepa parã judio–eerã ome mãgá ooji mĩda, kꞌĩsiadaikꞌaraa bɨ parã pipɨara pꞌanɨ judiorã kꞌãyaara. Ãra parã naaweda ma pakꞌuru kꞌarradepema juakꞌa pꞌanajida. Ma pakꞌuru kꞌarrakꞌa bɨ chokꞌai–e bɨ parã, chi jua tꞌɨ pɨkꞌa bɨda kꞌaurepa. Parã chokꞌai pꞌanɨ ma pakꞌuru kꞌarrakꞌa bɨ kꞌaurepa. Judiorã kꞌaurepata parãpa Tachi Akꞌõre kꞌawa pꞌanɨ.
19Parãdepemapa jarai: “Mamĩda Tachi Akꞌõrepa mɨ tꞌɨ pɨkꞌa bɨji ma kꞌarrakꞌa bɨde judiorã kꞌãyaara.” 20Pia bɨ. Mamĩda kꞌirãpáji Akꞌõrepa ma judiorã tꞌɨapꞌe pɨkꞌaji Cristode ijãadaamaa pꞌanadapꞌedaa perã. Pɨ Cristode ijãapari perãta, tꞌɨ pɨkꞌa bɨji. Audua bai kꞌãyaara, jĩpꞌa Tachi Akꞌõre waaweeipia bɨ. 21Tachi Akꞌõrepa ichi eperãarã tꞌɨapꞌe pɨkꞌaji pɨrã Cristode ijãadaamaa pꞌanadapꞌedaa perã, audupɨara parã tꞌɨapꞌe pɨkꞌaitꞌee ijãa amaadaruta pɨrã. 22Tachi Akꞌõre tꞌãri pia bapari Cristode ijãapataarã ome. Mamĩda Cristode ijãadaamaa pꞌanɨɨrã pia akꞌɨ–e. Maperã pɨ ijãa beeru pɨrã, tꞌãri pia bapariitꞌee pɨ ome. Mamĩda ijãa amaaru pɨrã, waa pia akꞌɨ–e. Pɨ tꞌɨapꞌe pɨkꞌaitꞌee ijãadakꞌaa beerã ome ooparikꞌa. 23Jõdee, naaweda Cristode ijãadaamaa pꞌanadapꞌedaarãpa ijãaruta pɨrã, Tachi Akꞌõrepa ãchi pia akꞌɨitꞌee Cristodeerã akꞌɨparikꞌa. Ãra waya tꞌɨ pɨkꞌa bɨitꞌee ãra naaweda pꞌanadapꞌedaakꞌa. Mãga ooi Tachi Akꞌõre–itꞌee ne–inaa audú chaaree wẽ–e perã. 24Irua pɨ, judio–ee bɨta, o kꞌachiadeepa kꞌaripa ataru pɨrã Cristode ijãapari perã, audupɨara judiorã mãgá kꞌaripaitꞌee, Cristode ijãadakꞌãri. Mãga ooitꞌee ãchi uchiadapꞌedaa perã irua eperã jɨrɨtꞌerada Abrahamdeepa.
Tachi Akꞌõrepa Israel pidaarã kꞌaripaitꞌee
25Ɨ̃pemaarã Cristo kꞌaurepa, ɨ̃rá mɨa parã judio–eerãmaa ne–inaa awaraarãpa waide kꞌawadakꞌaa kꞌawapi kꞌinia bɨ, kꞌĩsianaadamerã judiorã kꞌãyaara pipɨara pꞌanɨ. Tachi Akꞌõrepa Israel pidaarã ũkꞌuru kꞌɨɨrɨ kꞌisuapiji judio–eerãpa irua jara pëida pia ũridapꞌeda, Cristode ijãadamerã mãikꞌaapa Tachi Akꞌõre ode tꞌĩudamerã. Mamĩda ichita mãga–e paitꞌee. Jĩpꞌa mãga pꞌasaitꞌee ijãarutamaa jõma judio–eerã irua kꞌĩsia iru bɨ ijãadamerã. 26Ma tꞌẽepai, Israel pidaarã chokꞌara aukꞌa Cristode ijãadaitꞌee mãikꞌaapa Akꞌõrepa ãra o kꞌachiadeepa kꞌaripa ataitꞌee, iru ũraa pꞌãdade jara bɨkꞌa:
‘Tachi Kꞌaripapari uchiaitꞌee Israel pidaarã tꞌãideepa, Sión pꞌuurudeepa. Jacobdeepa uchiadapꞌedaarã o kꞌachiadeepa kꞌaripa ataitꞌee. 27Maapai mɨa jaradakꞌa Jacobmaa, ichideerã pia ooitꞌee ãchi pꞌekꞌau kꞌachia wẽpapikꞌãri.’ (Isaías 59.20-21)
28Parã judio–eerã kꞌaurepa ɨ̃rá Tachi Akꞌõrepa Israel pidaarã yiaraa iru bɨ, ãchi ijãada–e pꞌanadairã irua pedee pia jara pëida Cristo kꞌapꞌɨa pari. Mamĩda Akꞌõrepa naaweda Israel pidaarã jɨrɨtꞌeraji. Mapa atꞌãri ãchi kꞌinia iru bapari mãikꞌaapa pia akꞌɨ bapari. Mãga oopari mãga ooitꞌeeda ada perã ãchi chonaarãmaa. 29Tachi Akꞌõrépata ichita oopari ichia jara bɨkꞌa. Mapa ichi eperãarã atabëi–e paitꞌee. Ichita ãchi pia akꞌɨ bapariitꞌee ichia jaradakꞌa ãchi chonaarãmaa. 30Naaweda parã judio–eerãpa oodaamaa pꞌanapachida Tachi Akꞌõrepa jara bɨkꞌa. Mamĩda judiorã Akꞌõre Waibɨapa ichi Warra pëidade ijãadaamaa pꞌanadapꞌedaa perã, Tachi Akꞌõrepa parã judio–eerã chupɨria kꞌawaaji. 31Ɨ̃rapema judiorã atꞌãri oodaamaa pꞌanapata Akꞌõrepa jara bɨkꞌa. Mamĩda Tachi Akꞌõrepa parã judio–eerã chupɨria kꞌawaadakꞌa Cristode ijãadakꞌãri, aukꞌa chupɨria kꞌawaaitꞌee judiorã, mãgá ijãadakꞌãri. 32Tachi Akꞌõrepa na pꞌekꞌau eujãdepemaarã judiorã mãikꞌaapa judio–eerã ichiakꞌau bɨji ãchia oo kꞌiniata oodamerã. Mãga ooji akꞌɨpiitꞌee ichia chupɨria kꞌawaapari pꞌekꞌau kꞌachia oopataarã, judiorã, judio–eerã paara.
Pedee pia jarada Tachi Akꞌõrede
33¡Wãara Tachi Akꞌõre kꞌĩsia kꞌawaa bapari! Jõmaweda pia oopari ichia ne–inaa jõma kꞌawapari perã. Tachi eperãarãpa kꞌawada–e irua kꞌĩsia iru bɨ. Ichiaba kꞌawada–e sãgapꞌeda irua eperãarãmaa ne–inaa oopipari.
34¿Akꞌõre Ũraa pꞌãdade nãga jara bɨ–ekꞌã? ‘¿Kꞌaipa kꞌawaaima Tachi Akꞌõre kꞌĩsia mãikꞌaapa kꞌaipa iru ũraaima? Iruata ne–inaa jõma kꞌawapari.’ (Isaías 40.13)
35‘¿Kꞌaipa ne–inaa teeima Tachi Akꞌõremaa, irua jõdee ma pari ne–inaa awara teemerã?’ (Job 41.11)
36Eperãpa mãgá pꞌoyaa tee–e, Tachi Akꞌõre juadeepa ne–inaa jõmaweda uchiapari perã. Ichiata ne–inaa jõmaweda akꞌɨ bapari. Ne–inaa jõmaweda nɨ̃bɨ ichi–itꞌee. Mapa ichita jaradaipia bɨ: “Akꞌõre, ¡pɨ jõmaarã kꞌãyaara waibɨara bɨ! ¡Amén!”
S'ha seleccionat:
Romanos 11: sjaB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©2005, 2010, 2015 Wycliffe Bible Translators, Inc. All rights reserved.