Obadia 1
1
1Tidindaan Uwumbɔr aah di tibɔr ti tuk waabɔnabr Obadia, ki joo cha Edom aatiŋ wɔb na sɔ.
Uwumbɔr ga daa Edom yaab aatafal
Uwumbɔr tun waabɔnabr ŋitimbol mɔmɔk chee,
le ti ŋun waabɔr ti u tuk u na ke,
“Gor nibaa man.
Cha ti buen ti to Edom yaab butɔb man.”
2Uwumbɔr bui Edom yaab ke, “M ga ŋa nimi bigiim,
unibɔn mɔmɔk ga lik nimi fam.
3Nimi aagaak le ŋmann nimi.
Nimi aatiyil pɔɔ ke litakpal na la,
le nido bi ŋijoo ŋi fɔk na pu,
le ni bui nibaa ke,
‘Ŋma ga ŋmaa daa ker timi lii ni taab?’
4Hali ni yaa di nimi aadichal ti maa paachapaacham
ke likaagiil aadir na,
aan ŋi daa ke iŋmabi na kan,
m ga ŋmaa daa ker nimi lii ni taab.
5Binaayukb yaa dan kinyeek bi nan su tiwan kan,
bi yoor tiwan ni bi ban na baanja la.
Bipiib mu yaa peei ikpa kan,
bi peei le ki gur ngem.
Le nimi aadim ma ku doo nimi kookoo.
6Esɔ#1.6: Esɔ nan ye Edom yaab aayaaja la. aayaabitiib, binib sun nimi aawangol mɔmɔk a.
7Nimi aamaantɔtiib ŋmann nimi la;
le bi jenn nyan nimi,
nimi aatiŋ ponn ni.
Binib bi nan ye nijɔtiib na le nyaŋ nimi butɔb ni
dandana wee na.
Nijɔtiib bi nan ji ni chee tijikaar na
le ŋmann nimi koon gaawɔb ni;
bi baa le ke, ‘Baalan mu bi kpa na bi la?’
8Nwiin mundaal m ga daa Edom yaab aatafal na,
m ga ku bilandam mɔmɔk aan baalan mɔmɔk doo.
9Temann aajab bi jaa kijaak na ga san ijawaan pam,
le baatiŋ Edom aatɔb aajab mɔmɔk ga kpoi.
Budabu pu Uwumbɔr ga daa Edom yaab aatafal na
10“Naah ŋa pu ki sun ninaabitiib,
bi ye Jakob#1.10: Jakob nan ye Israel yaab aayaaja, le ukpel Esɔ mu nan ye Edom yaab aayaaja. aayaabitiib na aawan, ki ku bi na,
kina le binib ga lik nimi fam ki kuln nimi.
11Nwiin mundaal aan baadim nan koo ni baatiŋ ni ki bii baawan na,
ni nan si nima kaa gar tibaa.
Ni bir ke biwɔwɔm bi nan yoor Jerusalem aatiŋ aawangol di buen ki ti yakr na la.
12Naa ŋan ke ni ba li mɔɔni
buyoonn ninaabitiib Juda yaab kan mpombiin na.
Nwiin mundaal bi nan kuln baatiŋ na,
naa ba ga nan li kpa mpopiin liyaadaal ngbaan.
Naa ŋan ke buyoonn bi nan bi tibɔbir ni na, nimi li bi laa.
13Naa ba ga nan koo maanib aatiŋ ni ki ti lik bi fam,
ki su baawangol nwiin mundaal bi bi tibɔbir ni na.
14Naa ba ga nan li si isayakr
ki chur binib bi nan san ke bi ŋmar na,
kaa ba ga di bi tii baadim,
nwiin mundaal bi nan bi tibɔr ni na.
Uwumbɔr ga ji ŋitimbol tibɔr
15“Nwiin ngbaan peen ni, bundaal aan min Uwumbɔr
ga ji ŋitimbol mɔmɔk tibɔr na peen ni.
Edom yaab, naah ŋa pu na,
kina le ni ga kan.
Naah tii pu na,
kina le bi ga giin tii nimi.
16Maanib nan kan ntafadaan mu bir na
maajool#1.16: “maajool li bi chain na” le ye Sionn aajool. li bi chain na pu.
Binib bimɔk bi ki mann goln na
ga kan ntafadaan mu jer kina na.
Bi ga kan ntafadaan, le ki lil, kaan ki gir ni.
Israel yaab aah nyaŋ kijaak pu na
17“Sionn aajool na pu le binib bibaa ga ŋmar,
le lijool ngbaan pu ga kpaln miyaan.
Jakob aayaabitiib ga gaa baatiŋ ki ye baatiŋ ibamɔn ni na.
18Jakob ni Josef aanib ga li naahn mmii la;
bi ga doo Esɔ aanib ke mmii aah wu kinaakook pu na la.
Esɔ aanib ponn ni ubaa aan ŋmar.
Min Uwumbɔr le len kina.
19Binib ga nyan ni Juda aawilir aaŋangii wɔb
le ki nan gaa Edom aatiŋ;
le binib bi bi liwilir wɔb aagongon ni na ga gaa Filistia yaab aatiŋ,
Israel yaab mu ga gaa Efraim ni Samaria aatim,
le Benjaminn aanib ga gaa Gilead aatiŋ.
20Israel yaab bi binib nan chur bi buen kitiyayaŋ ni
ki cha baatiŋ liwipuul aaŋangan wɔb na
ga ki gir nan gaa Fonisia aatiŋ
ki ti saa Sarefaf aatiŋ ni ŋŋangan wɔb.
Jerusalem yaab bi binib nan chur bi tinaagbiir
ki di bi buen Sadis aatiŋ ni na
le ga gaa ntim mu bi Juda aaŋangii wɔb na.
21Jerusalem yaab bi ga nyaŋ baadim mɔmɔk na
ga tak Edom yaab ki nyaŋ bi.
Le Uwumbɔr uma ubaa ga li ye Ubɔrkpaan.”
S'ha seleccionat:
Obadia 1: xonB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©1998, 2014 Wycliffe Bible Translators, Inc. All rights reserved.