Amos 9
9
Uwumbɔr aabɔjil
1M nan kan Uwumbɔr si gbɔk kitork aabimbiln, le ki tii waamɔboln ke: “Faa man Maadichal aagon mpɔɔn pu aan kaadipimoor deŋ. Gbaa wii ŋi aan ŋi lir binib ngbaan aayil pu man. M ga ku binib bi gur na butɔb ni la. Ubaa aan san ŋmar; ubaa kina aan ŋmar. Hali bi yaa gbii ibuu ki koo kitekpiitiŋ ni kan, m ga chuu bi. 2Hali bi yaa jon buen paacham kan, m ga sunn ni bi kitiŋ. 3Bi yaa jon ti kal Kamel aajool paab kan, m ga ban kan bi ki chuu bi. Bi yaa koo nnyusakpem aataab ki ti bɔr mi kan, m ga cha nnyusakpem ponn ni aapeewanbiik juu bi. 4Baadim yaa chuu bi kunn bido kan, m ga cha bi ku bi. M ban m kuln bi la, maa ban m ter bi.”
5Tidindaan Uwumbɔr Mpɔɔnsakpiindaan yaa meeh kitiŋ kan,
ki deŋni la,
le binib bimɔk bi nima na wii ikpowiil.
Dulnyaa mɔmɔk fii ki lir ke Nail Aamɔɔsakpeln aah fii ki lir pu na la.
6Uwumbɔr maa waadichal paacham la,
le ki cha kitaapaak bi kitiŋ aapaacham,
le ki joo nnyusakpem aanyun kpir kitiŋ pu.
Waayimbil le ye Uwumbɔr.
7Uwumbɔr len ke, “Israel aanib, m gee Kus aanib ke maah gee nimi pu na la. Maah nan nyan ni nimi Ijipt aatiŋ ni pu na, kina le m nan di Filistia yaab nyan ni Krete aatiŋ ni, ki nyan Siria yaab mu Kir aatiŋ ni. 8Min Uwumbɔr Mpɔɔndaan ka ki lik titunwanbir sakpenn ti Israel aanaan mue tun na, ki ga doo mu dulnyaa wee ni. Maan tee ku biyaabitiib doo.
9“M ga tii maamɔboln ki cha Israel aanib deŋ ke baah bi yak n‑yon le kiyayak ponn ni na. Ŋinibol mɔmɔk ponn ni, m ga yak bi, ki nyan binib bi kaa bi tibaa ni na. 10Titunwanbirdam bi ŋmal maanib ni na ga kpoi butɔb ni, binib bi mɔmɔk len ke, ‘Uwumbɔr aan cha kinimbɔŋ duun ni timi’ na ga kpoi.”
Baah ga ki gir maa Israel aatiŋ pu na
11Uwumbɔr ki len ke, “Nwiin mubaa choo, buyoonn m ga ki gir maa Ubɔrkpaan David aanaan mu bi ke lidichal li ber doo na. M ga ki gir fiin mu. M ga ki fiin mu siin ke mu aah nan bi pu n‑yaayoonn na. 12Le Israel yaab ga jan ki gaa Edom aatiŋ ki gur na, ni ntim mumɔk nan puun ye maatim na.” Uwumbɔr u ga cha nimina ŋa na le len kina.#9.11-12: Lik Lituln 15.16-18.
13Uwumbɔr le ki len ke,
“N‑yoonn choo, buyoonn tijikaar ga ŋa mala mala
ki jer baah ga ŋmaa chee pu na,
le ndaan aasubil ga lu mala mala
ki jer baah ga ŋmaa ŋaa ndaan pu na.
Ŋijoo ni ŋigongon paab ga kpaln ikpaakon ŋmeen la.
14Le m ga giin ni maanib baatiŋ ni,
le bi ga ki gir maa baatim mu nan ber doo na ki koo mu ni.
Bi ga ŋum ndaan aasubil aasui ki nyu ŋaadaan,
ki ga ko ikpaakon ki ji yaajikaar.
15M ga giin bi kaan, maah tii bi kitiŋ ki na pu,
le ubaa aan ki ŋmaa daa nyan bi ki ni daalbaadaal.”
Nidindaan Uwumbɔr le len kina.
S'ha seleccionat:
Amos 9: xonB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©1998, 2014 Wycliffe Bible Translators, Inc. All rights reserved.