Jona 1
1
Jona aah yii Uwumbɔr aamɔb pu na
1Daalbaadaal, le Uwumbɔr nan len Amitai aajapɔɔn Jona chee tibɔr timina. 2U nan bui u ke, “Li cha kitisakpeŋ Ninefa ponn ni ki ti galn ki; m nyi kaanib aah kpa mbiin pu na.” 3Le Jona nan tee fii ki di toŋ nibaa wɔb ke u bɔr Uwumbɔr. U nan di buen Jopa aatiŋ ni la, nima chee le u ti kan buŋɔb bu cha Speenn aatiŋ ni na. U nan pan le ki koo bu ponn ni, biŋɔŋaab chee, ke bi buen Speenn aatiŋ ni, nin chee Uwumbɔr aan ki kan u na. 4Tɔ, Uwumbɔr nan cha libupɔɔl libaa dan nan lir nnyusakpem ngbaan pu, libuln ngbaan nan bir pam, le buŋɔb ngbaan nan ban bu wii ki muin. 5Ijawaan nan chuu biŋɔŋaab ngbaan, le bi mɔmɔk wii ki yin baawaa ki ban nterm. Bi nan nyan ŋitun ŋi bi bu ponn ni na mae ŋa nnyun ni ke bu taa ki li nyuun. N‑yoonn mue na, Jona nan dɔ bu ponn ni ki dɔ geen.
6Le biŋɔŋaab ngbaan aaninkpel nan ti kan u nima chee, le ki baa u ke, “Aa dɔ ŋani ba, aa dɔ geen la aa? Fii sil ki mee saawaal aan li ter timi. Nibaakan, li ga san timi kinimbaak ki gaa timi lii.”
7Biŋɔŋaab ngbaan nan bui tɔb ke, “Cha ti pul kipulk timi aakaal aah mɔk pu na man, ki lik ke ŋma ye unimbɔŋdaan u joo ni timi linimaln limina na.” Bi nan ŋa kina, le ki kan ke Jona le ye unimbɔŋdaan. 8Le bi bui u ke, “Tɔ, bui timi, ŋma aan ti ga galn tibɔr timina pu? Aa bi ŋani ba do chee na? Aa nyan ni lilatingbaln ni? Aado ye la chee? Aa ye lilanibol aanii?”
9Le Jona gar bi ke, “M ye Hiibru#1.9: Bi ki yin Israel yaab ke Hiibru yaab. aanii la. M dooni Uwumbɔr u ye paacham Aadindaan, ki naan kitiŋ, ni nnyusakpem na la.” 10Jona nan ki tuk bi ke u bi san bɔrni Uwumbɔr la.
Ijawaan nan chuu biŋɔŋaab ngbaan, le bi bui u ke, “Saah ŋa pu na aa ŋan kpala.” 11Kitaabuŋ ngbaan nan moo pɔɔk kpae la, le biŋɔŋaab ngbaan baa u ke, “Ti ga ŋa kinye aan kitaabuŋ ngbaan di cha?”
12Jona nan gar bi ke, “Di mi ŋa nnyusakpem ngbaan ni man, le mu ga doon suuna. M nyi ke ni ye maataani pu le ni nan koo kitaabuŋbiik kee ni.”
13Tɔ, biŋɔŋaab ngbaan nan tee pɔɔn bibaa ke bi di buŋɔb ngbaan buen ligbaal, le ki moo ŋaal bu mpɔɔn pu. Tɔ, kitaabuŋ nan moo kpae la, le baa ŋmaa buen nibaa chee. 14Kina pu le bi wii ki yin Uwumbɔr ke, “Uwumbɔr, ti mee si, taa daa titafal ki ku timi uja wee aamɔfal pu. Uwumbɔr, sin le tun nimina mɔmɔk; ni ye saatuln la,” 15le ki yoor Jona di mee ŋa nnyusakpem ngbaan ni. Libuul ngbaan ni le mu doon suuna. 16Nima le nan cha biŋɔŋaab ngbaan san Uwumbɔr ijawaan ki toor kitork tii u, ki puu tipuur tii u.
17Tɔ, Uwumbɔr nan cha ujan sakpiin ubaa chuu Jona di nab, le u nan bi ujan ngbaan aaponn ni, iwiin itaa ni tinyer titaa.
S'ha seleccionat:
Jona 1: xonB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©1998, 2014 Wycliffe Bible Translators, Inc. All rights reserved.