JEREMIA 46
46
Ijip dünkheak Thiyusheak
1Trükshihbo dünkheaknü Atungpuh yu wukihbuh Jeremia kilim arü.
2Ijip kiulongthsüpuh Pharao Neko bonungrü azhihde, Ijip dünkheak, küpü Euphra ayung ki Karkemish ching lakhea tüsho küpü Josia tsührü Juda kiulongthsüpuh Jehoiakim kam phüyipü ching Babilon kiulongthsüpuh Nebukednezarnü akukkhea:
3Nüsa tsungbo thsakhamang tüsho keochihpü mikhuh yüang!
4Khorabo rhükang;
jurü kheak yükihang!
Treangkhümbe yihbah nüsa zhippung mükühang,
nüsa thsühbo phekhitang,
nüsa thirithsü zülu yihang!
5Tüshe tümüde arü trekhi inü ngücho?
Arübo rholode arüdo;
arü thirithsürübo kukabahdo tüsho niokheamde tsodo.
Arünü rholoa mükheah–
alala mühide atrebe lah!
Atungpuhnü thachoh.
6Athrirübo alihde mutsokhuk yungsho thirithsürünü mutsokhikhuk;
dukulim Euphra ayung ki arü jing mükhedo tüsho lungdo.
7Nile keto ki nangde ayungbo düchi arükhi ha she a?
8Nile nangde Ijip asürüchoh, ayungbo ke nangde abükchoh.
Ha tha, I asürüanü, inü alomi zhipdoanü,
inü kiutobo tüsho ju ching larübo thsümünimanü.
9Mikhuh yüang, O khorabo,
tüsho yingyingde alihang, O khora-lolungbebo!
Thirithsürübo mikhuh yüshang:
Tsung shuhrü Ethiopia tüsho Put, sanglüh hünkihrü Ludim,
10ju nimung ju Wuto Atungpuh T H RÜ NPU H royimkhi nimung,
api riribo kheak royimkhi nimung.
Reangmükeamyi khiungde nukshangnü amuyubah,
kethürimüri khiungde thiyih yungbah.
Tümüde Wuto Atungpuh Thrünpuhnü dukulim lomi ching Euphra ayung ki shuhmülanga jihpü shuhlah.
11Gilead lim wutuang, tüsho moli luang,
O Ijip atsangkhit tsührübe!
Akeangkeang ching nünü moli ahihdo ahorido;
nü thsungkheaknü athsüngu müla.
12Trükshihbonü nü achihkhi sodo tüsho nünü azhikhinü alomi milah;
tümüde thirithsürünü thirithsürü kheak jing mükhedo;
ane chido rüpde lungdo.
13Ijip lomi yanpü Babilon kiulongthsüpuh Nebukednezar arüpü dünkheak Atungpuhnü wukihbuh Jeremia ki asukkhi yu:
14Ijip ching thaang, tüsho Migdol ching zhiyukjang;
Memphis tüsho Tapanhes ching zhiyukjang;
Thaang, “ Nüsa zhippung mükühang tüsho thsakhamang,
tümüde nüsa mükamde nukshangnü amuyubah.”
15Tümüde nüsa thrünpuh Apis tsokhea?
Atungpuhnü api nima lungshih.
16Nüsa bonungrü jing mükhedo tüsho lungdo,
tüsho khülangnü püpürü ki tha,
“Arang, isanü isa mihtsürü tüsho isa zübe lomi lim,
athsümünim nukshang bahbah yüloanü.”
17Ijip kiulongthsüpuh Pharao kilim mung aso khülang jihang,
“Thiyu-tobuh shepünü anihbuh kim atsü lakphahkhea.”
18Atsütsü I lah, kiulongthsüpuhnü thachoh,
shepü mung Wuto Atungpuh la,
awungbo lung Tabor nangde tüsho keto yean Karmel nangde khülang arüchoh.
19Ramtso thsungkheaknü hah thsang,
nüsa Ijip ching larübo!
Tümüde Memphis ju abahkhi, athsümünim,
mihtsürü mülade akambah.
20Ijip a moshi drelü nangde lah tüshe dukulimnü amükeakbe mukhu anihbe azhihde arüchoh.
21Anihbenü amulokhi bonungrübo she moshi nunubo nangde athsükhukpü müla;
arübo she rholodo tüsho nungde tsodo, arübo müzhip;
tümüde arü kheak arü thsümütsü nimung,
arü thsümüchi kim akihdo.
22Anihbenü phuruto chinde atsokhi nangde düsheak thsüchoh;
tümüde anihbe riribo müküpde tsahchoh,
tüsho anihbe azhihde ayübo shuhbah sangdungbo kiushakrü nangde arüchoh.
23Arünü anihbe murung muhokhukbe lalashe akiukheambah,
Atungpuhnü thachoh,
tümütüsho arübo tangkhobo kheaknü khide hihdaklah;
arübo mükhebin.
24Ijip tsührübe achih ngübah;
anihbe dukulim mihtsürü kilim jihbah.
25Wuto Atungpuh , Israel Thrünpuhnü tha: Kheahang, inü Thebes#Ibri yunü, Yung. thrünpuh Amon, Pharao, tüsho Ijip le anihbe thrünpuhbo tüsho kiulongthsürübo, Pharao tüsho api kheak kinrü kheak thsümüchi handarübah. 26Inü arübo ju arü rhangdung yimrü, Babilon kiulongthsüpuh Nebukednezar tüsho api yo atorübo kilim jihbah. Ju dunglim awün nimungbo ching nangde Ijip ching mihtsürübo labah, Atungpuhnü thachoh.
Atungpuhnü Api Mihtsürü Khümkhitbah
27Tüshe nü thsungkheaknü, dütre I yamlarü Jakob,
tüsho mulong dünini O Israel;
tümüde limshu chingnü inü nü tüsho ramde ayükhi lomi chingnü nü tsührü khümkhitbah.
Jakob alodarübah tüsho mungtsü tüsho sühakhim labah,
tüsho shenü api mütreshih.
28Nü thsungkheak a, dütre, I yamlarü Jakob,
Atungpuhnü thachoh, tümüde I nü lung lah.
Inü nü yana yüshihkhi trükshih alala kheamshihbah,
tüshe inü nü a mükheamshih!
Inü nü alungki ching thsangdanbah tüsho inü shahde müthsümüchidüa nü muzojih.
S'ha seleccionat:
JEREMIA 46: YIMCBSI
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.