लूका 13
13
अपने पापौं सै मन फिराऔ या नास होओ
1उस टैम बहाँ खड़े भए कुछ लोगौ नै ईसु सै उन गलील देस मै रैहनै बारे लोगौ के बारे मै चरचा करी, जो पीलातुस नै मरवा डारे हे, जो उस टैम परमेसर के ताँई बलि चढ़ा रए हे। 2जौ सुनकै ईसु नै उनसै कैई, “तुम का सोचो हौ, कै जे गलीली लोग बाकी दूसरे सब गलीली लोगौं सै जादा पापी हे, कै उनके ऊपर ऐंसी बिपदा पड़ी? 3बिलकुल ना, पर मैं तुमकै कैरओ हौं अगर तुम बी अपने पापौं कै ना छोड़ौगे तौ परमेसर तुम सबई कै बी बैसेई नास कर देगो। 4तुम का समजौ हौ, कै बे अठारै आदमी जो ऐरूसलेम के बाहार सीलोम नाम जघै मै एक ऊँचे गुम्मट के गिन्नै सै दबकै मर गए हे, बे ऐरूसलेम के और सब रैहनै बारौं सै जादा पापी हे? 5बिलकुल ना, पर मैं तुमकै कैरओ हौं अगर तुम बी अपने पापौं कै ना छोड़ौगे तौ, तुम बी ऐंसेई नास हो जाऔगे।”
फल ना दैनै बारे अंजीर के पेड़ की दासतान
6फिर बानै एक दासतान कैई, “किसी के अंगूर के बगीचा मै एक अंजीर को पेड़ लगो पड़ो हो, बौ बामै फल ढूंड़नै आओ, पर बाकै कुछ बी ना मिलो। 7तब बानै बगीचा के माली सै कैई, ‘देख, तीन साल सै मैं इस अंजीर के पेड़ मै फल ढूंड़नै आ रओ हौं, पर इसमै मैंकै एक बी फल ना मिलो, इसकै काट दे, कै जौ जमीन कै बी ना घेरे रैह?’
8 “माली नै जबाब दओ, ‘हे मालिक, इसकै इस साल तक और रैहन देए कै मैं इसके चारौ लंग गड्ढा खोदकै इसमै खात डारौं। 9फिर अगर जौ अगले साल फल दे तौ अच्छो है और अगर ना दे तौ तू इसकै काट सकै है।’”
आराम कन्नै बारे दिन एक कुबड़ी बईयर को ठीक होनो
10किसी पिराथना घर मै आराम कन्नै बारे दिन मै ईसु जब उपदेस देरओ हो। 11तौ बहीं एक बईयर ही जिसमै अठारै साल सै एक कमजोर कन्नै बारी गंदी आत्मा चिपटी पड़ी ही, जिस्सै बौ कुबड़ी हो गई ही, और किसी तरै सै सीदी खड़ी ना हो सकै ही। 12ईसु नै जौ कैते भए बौ अपने धौंरे बुलाई, “जा बेटी, तू अपनी बेमारी सै आजाद हो गई है।” 13तब बानै उसके ऊपर हात रक्खे, और बौ तुरन्त सीदी खड़ी हो गई और परमेसर की बड़ाई करल लगी। 14कैसेकै ईसु नै बौ आराम कन्नै बारे दिन ठीक करी ही, इसताँई पिराथना घर को मुखिया घुस्सा सै भरकै लोगौ सै कैललगो, “काम कन्नै के छै दिन होवै हैं तौ उनई दिनौ मै आकै ठीक हो जाऔ; पर आराम कन्नै बारे दिन मै ना।”
15जौ सुनकै परभु जबाब देते भए बोलो, “हे कपटिऔ, का आराम कन्नै बारे दिन तुम मै सै हर एक आदमी बैल या गधा कै खूँटा सै खोलकै पानी पिबानै ना ले जावै है? 16अब जौ बईयर जो इब्राहिम के बंस की है, जो सैतान नै अठारै साल सै जकड़ खाई ही, का इसकै आराम कन्नै बारे दिन बंधनौ सै आजाद ना करो जानो चँईऐ हो?” 17जब बानै जे बात कैंई, तौ उसके सब बिरोदी सरमिन्दा हो गए। उतै सैरी भीड़ उन अचम्बे कामौ सै जो बौ करै हो, खुसी मनाल लगी।
राई के बीजा और खट्टे चून की दासतान
(मत्ती 13:31,32; मरकुस 4:30–32)
18फिर ईसु नै कैई, “परमेसर को राज किसके जैसो है? और मैं उसकी तुलना किस्सै करौं? 19बौ राई के बीजा जैसो है, जिसकै किसी नै लेकै अपने खेत मै बो दओ। और बौ बड़ो भओ और एक पेड़ बन गओ। फिर आसमान की चिरईयौ नै उसके डुग्गेऔ मै अपने घोस बना लए।”
(मत्ती 13:33)
20उसनै फिर कैई, “परमेसर के राज की तुलना मैं किस्सै करौं?
21 “जौ उस खट्टे चून के हाँई है, जिसकै एक बईयर नै तीन हिस्सा नए चून मै थोड़ो सो मिला लओ और बौ सैरो चून, खट्टो हो गओ।”
कुट्ट मौहड़ो
(मत्ती 7:13,14,21–23)
22ईसु सैहरौं और गामौ सै होकै उपदेस करतो भओ ऐरूसलेम की ओर जा रओ हो। 23तब किसी नै उस्सै पूँछी, “परभु, का थोड़े सेई आदमिऔ की मुक्ति होगी?” बानै उनसै कैई, 24“कुट्ट मौहड़े सै परमेसर के राज मै घुसनै की हर कोसिस करौ, मैं तुमकै बता रओ हौं कै भौस्से लोग भीतर जानै की कोसिस करंगे पर जा ना सकंगे। 25जब घर के मालिक नै उठकै मौहड़ो बंद कर दओ है, और तुम बाहार खड़े होकै किबाड़ खटखटाकै कैललगौ, ‘हे परभु, हमरे ताँई किबाड़ खोल दे, और बौ जबाब दे, मैं तुमकै ना जानौ हौं, तुम कहाँ के हौ? 26तब तुम कैललगौगे, कै हमनै तेरे संग खाओ पिओ, और तैनै हमरी गलिऔं मै हमकै उपदेस दओ। 27पर बौ कैगो, मैं तुमसै कैरओ हौं, मैं तुमकै ना जानौ हौं तुम कहाँ के हौ? हे सब कुकरम कन्नै बारौ, तुम सब मैंसै दूर हो जाऔ।’ 28#मत्ती 22:13; 25:30#मत्ती 8:11,12तुम इब्राहिम, इसहाक, याकूब और दूसरे सबई भबिसबानी कन्नै बारौं कै परमेसर के राज मै देखौगे, पर तुमकै बाहार ढकेल दओ जागो, जहाँ रोनो और दाँत कटकटानोई होगो। 29तब पूरब और पच्छिम; उत्तर और दक्खन सै लोग परमेसर के राज मै आकै परमेसर के राज की दाबत मै सामिल हौंगे। 30#मत्ती 19:30; 20:16; मरकु 10:31पर भौत से लोग जिनकी अबी ऐहमियत है उसकी ऐहमियत खतम हो जागी। पर जिनकी ऐहमियत ना है उनकी ऐहमियत होल लगैगी।”
ऐरूसलेम मै ईसु की मौत
(मत्ती 23:37–39)
31उसई टैम ईसु के धौंरे कुछ फरीसी आए और बासै बोले, “हेरोदेस राजपाल तेकै मार डान्नो चाँह रओ है, इसताँई हिंया सै कहीं और चलो जा।”
32तब बानै उनसै कैई, “तुम जाऔ और उस लौमड़ी हाँई चालाँक हेरोदेस राजपाल कै बतादो, ‘सुन मैं लोगौं मै सै दुसट आत्माऔ कै लिकारंगो, मैं आज बी ठीक करंगो और कल बी। फिर तीसरे दिन तक अपनो काम पूरो करंगो।’ 33फिर बी मैंकै आज, कल और परसौं चलतेई रैहनो होगो। कैसेकै जौ होई ना सकै है कै कोई भबिसबानी कन्नै बारो, ऐरूसलेम के बाहार मारो जाय।
34 “हे ऐरूसलेम मै रैहनै बारौं, हे ऐरूसलेम मै रैहनै बारौं, तुम तौ भबिसबानी कन्नै बारौं कै मार डारौ हौ, जो तुमरे धौंरे भेजे गए उन लोगौं कै मरते टैम तक पत्थर मारौ हौ। कितने फेरी मैंनै जौ चाँहो कै, जैसे मुरगी अपने बच्चौं कै अपने पंखौ के नीचे इखट्टो करै है, बैसेई मैं बी तेरे बालकौ कै इखट्टे करौं, पर तुमनै जौ ना चाँहो। 35देखौ, अब परमेसर तुमरे ताँई तुमरो मन्दर उजड़ो भओ छोड़ रओ है, और मैं तुमसै कैरओ हौं; जब तक तुम ना कैऔगे कै, ‘धन्न है बौ, जो परभु के नाम सै आवै है,’ तब तक तुम मैंकै फिर कबी ना देखौगे।”
Избрани в момента:
लूका 13: TKB
Маркирай стих
Копиране
Сравни
Споделяне
Искате ли вашите акценти да бъдат запазени на всички ваши устройства? Регистрирайте се или влезте
New Life Compute Institute [NLCI] - CC BY-NC-ND 4.0