मरकुस 8
8
चऊ हज़ारा लोका वै खाणा खिलाऊणा
(मत्ती 15.32-39)
1त्या धयाडी में जेबा खासे लोका इकठै होई होर त्याह ज़ेह खाणे वे किच्छे नांई थी, तेबा तेऊये आपणे चेले आपु सेटा शदायी करे त्याहवै बोलू, 2महा याह खासे लोका पैंदे दया आई किबेकी या मांई संघे चीई धयाडी ओरी मांई संघे बराबर साहा दे, 3होर या सेटा खाणे बे किछे नांई आंदा जेबा हाऊं याह भोछे घरा बे भेजे तेबा याहा बाता थकणे; किबेकी या दूरा का आएदे आसा।
4तेऊरे चेले तेऊबै उतर दीना, अखे बूणे ऐतरी रोटी कासु कंधा का काहडी कि या सभे रजे? 5यीशु त्याह का पूछा, तमा ज़ेह केतरी रोटी साहा? त्याहये बोलू, सात। 6तेबा तेयूए लोका वै जमीना पैंदे वैशणे री आज्ञा दिनी, होर त्याहे सात रोटी आणी होर धनयवाद करी करे चोडी, होर आपणे चेले फेरे दिनी कि त्याहवै देया होर चेले लोका वै दिनी। 7त्याहे तेऊ सेटा थोड़ी माच्छी भी दीनी, तेयूए त्याह रा भी धन्यवाद करी करे त्याह भी लोका सेटा जेह आडने री आज्ञा दिनी। 8त्याह सभे लोका खाई करे रज़ी होर चेले बची दी रोटी रे टुकड़े रै सात टोकरी में भरी करे चुआकी। 9होर लोका लगभग चार हज़ार; तेबा यीशु त्याह लोका बे आपणे-आपणे घरा बे नाहणे बे बोलू। 10होर यीशु तेवरी तखा का आपणे चेले संघे किस्ती पैंदे नाशी करे दलमनूता देशा वै नाठअ।
फरीसीयो रे जरिये स्वर्गा रअ चिन्ह माँगणअं
11तेऊकी फरीसी तेऊ संघे गला बाता करदे लागे, होर तेऊ परेखणे वै तेऊका स्वर्ग रअ चिन्ह मांगू। 12तेऊ आपणी आत्मा का बोलू, एउ वक्ता रे लोका तमे चिन्ह किवै लोडा? हाऊं तमावै सची बोला कि एउ वक्ता रे लोका वै किछे चिन्ह नांई दीणअं। 13होर सह त्याह छाडी करे किस्ती पैंदे वैशी करे पारा वै नाठअ।
फरीसियो होर हरोदसा रा खमीर
(मत्ती 16.1-4)
14चेले रोटी आंणनी बिसरी, किस्ती में त्याह सेटा एक रोटी थी। 15तेऊए त्याह वै बोलू, हेरा फरीसी रे मलेडे का होर हेरोदेस रे खमीरा का बचदे रहे। 16त्याह आपु में गला करदे लागे, एतकी यह एडा बोला 17ऐता जाणी करे यीशु त्याह वै बोलू, तमे आपु मेंजे किबे ऐउ विचारा करदे लागेदे कि हामा सेटा रोटी नांई आन्धी? कैह तमे एबरे तणी तमे नांई जाणदे होर नांई समझदे? कैह थारा मना काठा होऊ? 18कैह आछी हूदे भी नांई हेरू, होर कनेट हुंदे भी नांई शुणु? होर कै तमा याद नांई। 19कि जेबरे मांई पांजा हज़ारा लोका वै पांज रोटी चोडी, तेवरे तमे टुकड़े री भरी दी केतरी टोकरी चुआकी? त्याहे तेऊवै बोलू, बारहा टोकरी। 20होर जेबरे चारा हज़ारा वै सात रोटी, तेबा तमे केतरी टोकरी चुआकी? त्याहे तेऊका बोलू, सात टोकरे। 21तेऊ त्याह का बोलू, कैह ऐवरे तणी भी तमे नांई समझदे?
बैत्सैदा में एक काणअ ठीक करन
22त्या तेऊकी बैतसैदा ग्रा वै आउए; होर लोके एक काणअ यीशु सेटा वै आणु होर तेऊका अर्ज करी कि तेऊ छूहे 23तेयूये तेऊ काणे रअ हाथ ढाकी करे सह ग्रा बागे निऊ होर तेऊरी आछी में थुकी करे तेऊ पैंदे हाथ डाहू, होर तेऊका पुछु, ताह हेरदा लागा? 24तेऊ हेरी करे बोलू, महा लागे मणश हेरदे त्या हाँडदे बूटे साही लागे हेरदे। 25तेहुकी तेऊ भिआ का तेऊरी आछी पैंदे हाथ डाही। होर कांणे ढंगे संघे हेरु। सह रामडअ होऊ होर तेऊ रामडा हेरदा लागा 26तेऊए सह यह बोली करे घरा वै भेजू, एउ ग्राए मीतर टांग भी नांई डाहे।
पतरस रा यीशु को मसीह मनणा
(मत्ती 16.13-20; लूका 9.18-21)
27यीशु होर तेऊरे चेले कैसरिया फलिप्पी रे ग्रा वै नाठे। बाता तेऊए आपणे चेले का पुछु, लोका महा वै कैह बोला? 28त्याहे उतर दिना, यूहन्ना बपतिस्मा दिंण आल़अ; पर कोई एलिय्याह होर कोई भविष्यद्वक्त में एक जोह बोला। 29तेऊ त्याहा का पुछु, पर तमे महावै केह बोला? पतरसे तेऊवै बोलू, तूह मसीह साहा। 30तेबा यीशु आपणे चेले बे बड़ी चतैनगी दिनी मेरे बारे में ऐता कासी जेंह नांई खोजे।
आपणी माऊता रे बारे में भविष्यवाणी
(मत्ती 16.21-23; लूका 9.22)
31तेबा सह त्याह सिखउंदअ लागअ कि मणशा रे शोहरू वै जरुरी साहा कि सह बहु दुख चुआके, होर पुरनिए बडे प्रधान याजक होर शास्त्री तेऊ नीच समज़ी करे मारी पाए, होर सह चीउणे धियाडे ज़िउंदअ हूणअ। 32तेऊये याह गला तेऊ संघे पाकी करी। ऐता गला पैंदे पतरस यीशुये अलग जागहा होर नीऊ यह बोली करे तेऊ ठाकदअ लागअ 33पर तेऊए पीछे फिरी करे आपणे चेले फेरा वे हेरु, होर पतरसा बे डांटी करे बोलू, हे शैतान मेरे मुँहा का दूर नाहा; किवकि तूह परमेश्वरा री गला पर नांई, पर मणशा री गला पैंदे मन लाऊदा।
यीशु रे पीछे हाडणे रा मतलब
(मत्ती 16.24-28; लूका 9.23-28)
34तेऊए खासे लोका होर आपणे चेले आपु सेटा शादी करे तयाबे बोलू, जोह कोई मेरे पीछे ईहणा चाहदा, पहिले आपणे आपू का नांई करे होर आपणे क्रुस चूआकी करे महा पीछे चले 35किबेकी जोह कोई आपणा प्राण बचाऊणा चाहंदा सह तेऊ नाश करना, पर जोह कोई महा वे होर सुसमाचारा रे पीछे आपणे प्राण खोउल, तया बचाऊणे। 36अगर मणश सारे संसारा प्राप्त करे होर आपणे प्राणा रा नाश करे तो तेऊरा कैह फायदा? 37मणश आपणे प्राणा रे बदले कैह देई सका? 38जोह कोई एसा ब्यभिचारी होर पापी जाति मेंज़ा का होर मेरी गल्ला री शर्म करले, तो मणशा रअ शोहरू भी जेबरे सह पवित्र दूता संघे आपणे पिता री महिमा संघे ईहलअ , तेवरे सह भी शरमाऊण।
Избрани в момента:
मरकुस 8: ISJNT
Маркирай стих
Копиране
Сравни
Споделяне
Искате ли вашите акценти да бъдат запазени на всички ваши устройства? Регистрирайте се или влезте
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.