मत्ती 16
16
स्वर्गीय चिन्हा री माँग
(मरकुस 8.11-13; लूका 12.54-56)
1फरीसी होर सदूकि यीशु सेटा इच्छी करे तेऊ परेखणे री तणी तेऊबै बोलू, हामे स्वर्गा का एक चिन्ह हेरना चाहंदा। 2तेऊ तयाबे उतर दिंना, ब्याल्के तमे बोला, मोसम ठीक रहंणा, किबेकि सरग लाल साहा, 3होर दोती बे बोला, आज आँधी इहंणी, किबेकि सरग लाल होर धूमिल साहा। तमे सरगा रे चिन्ह हेरी करे तेऊरा फर्क खोजी सका, पर वक्ता रे भेदा किबे नांई खोजी सकते? 4एउ जुगा रे बुरे होर ब्यभिचारी मणश निशाण लोडा किबेकी पर योना छाडी करे त्याह होर कोहे भी निशाण नाँई भेटणे, होर सह त्याह छाडी करे नाठअ।
फरीसी होर सदूकी रा मलेड़ा
(मरकुस 8.14-21)
5चेले गलीला री झिला रे पार पूजी, पर त्याह रोटी आंणनी बिसरी। 6तयाबे यीशु बोलू, हेरा फरीसी होर सदूकि रै मलेड़े का बची करे रहे। 7त्याह आपु में गला करदे लागे, हामें रोटी नांई आणी एतकी तणी यह एडा बोला। 8यह जाणी करे, यीशु तयाबे बोलू, हे अल्पविश्वासीयो, तमे आपु में न्याय किबे करा की हामा सेटा रोटी नांई आंन्धी? 9कैह तमे एबरे तणी नांई समझी? कैह तमा त्याह पांज़ हज़ारा री पांज़ रोटी याद नांई करदे, होर यह कि तमे केतरी टोकरी चुआकी? 10होर त्या चउ हजार लोका री तणी सात रोटी होर तमे केतरी टोकरी कठे करी थी? 11तमे किबे नांई समझदे कि मांई तमाबे रोटी रै वारे में नांई बोलू, पर यह कि तमे फरीसी होर सदूकि रे मलेड़े का बची करे रहे। 12तेबा त्याह समझ आउआ कि तेऊ रोटी रे मलेड़े का नांई, पर फरीसी होर सदूकि री शिक्षा का बची करे रहंणे बै बोलू।
पतरसा रा यीशु मसीह मनणअं
(मरकुस 8.27-30; लूका 9.18-21)
13यीशु कैसरिया फलिप्पी रे प्रदेश आउअ, होर आपणे चेले का पूछतअ लागअ, लोका मणशा रे शोहरू बै कैह बोला? 14त्याहे बोलू, कुछ लोका बोला, यूहन्ना बपतिस्मा दिहंण आल़अ बोला, होर कुछ एलिय्याह, होर कुछ यिर्मयाह या भविष्यद्वक्ता मेज़ा का कोई एक बोला। 15तेऊ तयाबे बोलू, पर तमे महा बै कैह बोला? 16सिमोन पतरसे उतर दिंना, तूह जिऊंद परमेश्वर रअ शोहरू मसीह साहा। 17यीशु तेऊबै उतर दिंना, हे सिमोन, योना रे शोहरू, तूह धन्य साहा; किबेकी शरीर होर लोहू नांई, पर मेरे बापू जोह स्वर्गा में साहा, यह गलअ ताह में प्रगट करी। 18पर हाऊं भी ताहबे बोला की तुह पतरस साहा, होर महा एउ पाथरा पैंदे आपणी कलीसिया बणाउंणी, होर अधोलोका रे फाटक तेता में प्रबल नांई हूँणे । 19महा ताहबे स्वर्गा रे राज्य री कुंजी दीणी : होर जोह कुछ तूह धरती में बानलअ; सह स्वर्गा मे भी बानणा, होर जोह कुछ तूह धरती में खोल्लअ, सह स्वर्ग भी खुलणा। 20तेबा यीशु आपणे चेले बे बड़ी चतैंगी दिनी तेऊ चेले बै बोलू! कि कासी बे नांई खोजे की हाऊं मसीह साहा।
आपणी मऊती रै बारे में यीशु री भविष्यवाणी
(मरकुस 8.31-33; लूका 9.22)
21तेऊ वक्ता का यीशु आपणे चेले बे खोज़दअ लागअ, जरूरी साहा कि हाऊं यरूशलेमा बै नाहूँ होर बडे शास्त्री, होर प्रधान याजका, होर प्राचीना रे हाथा का बहु दुख चुआकू; होर मारी पाए; होर चिउंणी धयाडी जिऊंदअ होए। 22पतरस यीशु ये अलग जागहा होर नीऊ यह बोली करे तेऊ ठाकदअ लागअ, हे प्रभु, परमेश्वर ना कर! कि तांई संघे कधी भी एडा होए। 23तेऊ मुडी करे पतरसा बै बोलू, हे शैतान, मेरे सामने का दूर हो! तूह महा बै ठोकरा रा कारण साहा; किबेकि तूह परमेश्वर री गला में नांई, पर मणशा री गला में मन लाउंदा।
यीशु रै पीछे हंडणे रा मतलब
(मरकुस 8.31; 9.1; लूका 9.22-27)
24तेबा यीशु आपणे चेले बै बोलू, अगर कोई महा पीछे इहंणा चाहे, आपणे आपा बै नांई करे होर आपण क्रुस चुआके, होर महा पीछे इच्छे। 25किबेकी जोह कोई आपणे प्राण बचाऊणा चाहे, तेऊ प्राण खोऊणा; होर जोह कोई मेरी तणी आपणे प्राण खोऊलअ, तेऊ त्याह पाउणे। 26अगर मणश सारे संसारा जीती करे, होर आपणे प्राणा री हानि चुआके, तेबा तेऊ कैह लाभ हूँणा याह मणशा आपणे प्राणा रै बदले कैह दींणा? 27मणशा रअ शोहरू आपणे स्वर्गदूते संघे आपणे बापू री महिमा में इहंणा, होर तेऊ वक्त तेऊ हर एकु बे तेऊरे कामा रे साबे ईनाम दींणा। 28हाऊं तमाबे सच बोला की जोह ज़खे खड़े साहा, त्याह मेज़ा का कुछ एड़े साहा कि जेबरे तणी मणशा रे शोहरू तेऊरे राज्य में इहंदे नांई हेरे, तेबरे तणी मऊती रा स्वाद कधी नांई चखणा।
Избрани в момента:
मत्ती 16: ISJNT
Маркирай стих
Копиране
Сравни
Споделяне
Искате ли вашите акценти да бъдат запазени на всички ваши устройства? Регистрирайте се или влезте
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.