Kîam 1
1
Kûmbwa kwa indo cionthe
1Kîambîrîriarî Ngai nîwaûmbire îgûrû na nthî. 2Nayo nthî ndîarî ûrîa yekariî, na ndîarî na kîndû. Manjî meengî maakunîkîrîte kûndû kuonthe, nayo nduma yarî kûndû kuonthe. Vinya wa Ngai#1.2 Vinya wa Ngai: Mandîko mamwe maugaga Roho wa Ngai, rûkûngi kuuma kûrî Ngai, Rûkûngi rûnene. nîguo warî îgûrû rîa manjî mau. 3#2Akor 4.6 Nake Ngai nîwaugire atîrî, “Nî kûgîe ûtheri;” nakuo nîkwagîre na ûtheri. 4Ngai nîwonire atî ûtheri nî mwaro; na akîgaania ûtheri na nduma. 5Ngai nîwetire ûtheri “Mûthenya” nayo nduma akîmîta “Ûtukû.” Nakuo nîgwatukire na gûgîcoka gûgîkîa. Ûcio nîguo warî mûthenya wa mbere.
6 #
2Pet 3.5
Ngai nîwacokire akiuga atîrî, “Nî kûgîe mwanya gatagatîrî ka manjî, nîguo wamûranie manjî maita maîrî.” 7Nake Ngai nîwekîrire mwanya naguo ûkîamûrania manjî marîa maarî îgûrû rîaguo na marîa maarî rungu rwaguo. Na gûgîtuîka guo. 8Ngai nîwetire mwanya ûcio “Îgûrû.” Nakuo gûgîtuka na gûgîcoka gûgîkîa. Ûcio nîguo warî mûthenya wa kaîrî.
9Nake Ngai nîwaugire atîrî, “Manjî marîa marî rungu rwa matu nîmacokanîrîre vamwe nîguo nthî nyûmû yumîre.” Na gûgîtuîka guo. 10Ngai nîwetire nthî nyûmû “Nthî” namo manjî mau maacokanîrîrîte vamwe akîmeta “Îria.” Nake Ngai nîwonire ûndû ûcio ûrî mwaro. 11Ngai nîwacokire akiuga atîrî, “Nthî nîîrute mîmera ya mîthemba yonthe; mîmera îrîa îciaraga mvîndî na mîmera îrîa îciaraga matunda marî na mvîndî, na mîthemba yonthe ya mîmera.” Na gûgîtuîka wa guo. 12Nthî nîyarutire mîmera ya mîthemba yonthe. Nake Ngai nîwonire ûcio ûrî ûndû mwaro. 13Nakuo nîgwatukire na gûgîcoka gûgîkîa. Ûcio nîguo warî mûthenya wa kathatû.
14Ngai nîwacokire akiuga atîrî, “Nîkûgîe motheri matuurî îgûrû ma kwamûranagia mûthenya na ûtukû na monanagie mavinda, mîthenya, na mîaka. 15Motheri mau magaakengaga marî matuurî îgûrû, na magaatûmaga nthî kûgîe na ûtheri.” Na gûgîtuîka guo. 16Kwoguo Ngai nîwathondekire motheri maîrî manene. Riûa rîathage mûthenya na mweri wathage ûtukû. Nîwacokire akîthondeka njata. 17Ngai nîwaigire motheri mau kûu îgûrû nîguo matûmage nthî kûgîe na ûtheri, 18mathage mûthenya na ûtukû na mamûranie ûtheri na nduma. Nake Ngai nîwonire atî ûndû ûcio warî mwaro. 19Nakuo nîgwatukire na gûgîkîa. Ûcio nîguo warî mûthenya wa kana.
20Nake Ngai nîwaugire atîrî, “Manjîrî nî gwîcûre ciûmbe irîa irî mwoyo cia mîthemba mîîngî, nakuo rîerarî gwîcûre iconi.” 21Kwoguo Ngai nîwaûmbire nyamû irîa nene mûno cia îriarî, nyamû cionthe irîa ciîkaraga manjîrî, na mîthemba yonthe ya iconi. Nake Ngai nîwonire atî ûndû ûcio warî mwaro. 22Ngai nîwarathimire ciûmbe icio na agîciîra atîrî, “Ciaranani na mwîngîve na mwîcûre îriarî, nacio iconi ciîngîve gûkû nthî.” 23Nakuo nîgwatukire na gûgîcoka gûgîkîa. Ûcio nîguo warî mûthenya wa gatano.
24Ngai nîwacokire akiuga atîrî, “Nthî nîkûgîe ciûmbe cia mîthemba yonthe; nîkûgîe nyamû irîa tûrîthagia mîciî; na nyamû cia kîthaka nene na nini. Na gûgîtuîka guo.” 25Kwoguo Ngai nîwaûmbire indo icio cionthe na agîkenua nî ûguo.
26 #
1Akor 11.7
Ngai nîwacokire akiuga atîrî, “Nîtûmbeni mûndû ûvanene natue na wîkariî tatue. Nake akaathaga nthamaki, iconi, na nyamû cionthe irîa ciîkaraga mîciî na cia kîthaka nini na nene.” 27#Mat 19.4; Mar 10.6 #Kîam 5.1-2 Kwoguo Ngai nîwaûmbire andû mavana take. Aamaûmbire marî mûndû mûrûme na mûndû mûka. 28Ngai nîwamarathimire na akîmera atîrî, “Ciaranani mwîcûre nthî nthî yonthe na mûmîtoorie; mwathage nthamaki, iconi na nyamû cionthe. 29Nînamûva mîtî ya mîthemba yonthe îrîa îciaraga mvîndî, na matunda ma mîthemba yonthe irî irio cienyu cia kûrîa. 30Nwatî nînava nyamû cionthe cia kîthaka, na iconi cionthe nyaki na mîtî îrîa îrî mathangû irîcage.” Na gûgîtuîka guo. 31Ngai nîwaroririe indo cionthe irîa aaûmbire na akîona irî mbaro. Nakuo nîgwatukire na gûgîcoka gûgîkîa. Ûcio nîguo warî mûthenya wa gatandatû.
Избрани в момента:
Kîam 1: KKB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
©Bible Society of Kenya, 2019