1-Каринфвийриз 7
7
Некягьдикай
1Куьне заз итимди паб тагъун хъсан я лагьана кхьенай. 2Амма явавиликай яргъа хьун патал гьар итимдихъ вичин паб хьун, гьар папахъ вичин гъуьл хьун хъсан я. 3Папахъ галаз алакъада аваз гъуьлуь вичин гъуьлвилин везифаяр, папани гъуьлуьхъ галаз алакъада авай вичин везифаяр тамамарун лазим я. 4Папан беден адаз вичиз ваъ, адан гъуьлуьз талукь я. Гьа саягъда гъуьлуьн беденни адаз вичиз ваъ, папаз талукь я. 5Сад садав агатуникай катмир, анжах са куьруь геренда, а вахт дуьа авуниз бахшун кьведани санал кьетӀна, къакъатайтӀани жеда. Амма идалай гуьгъуьниз квевай жувавай жув кьаз тежез хьайитӀа, иблисди куьн темягьда тун тавун патал, мадни сад садахъ галаз хьухь. 6Гьавиляй за квез и гафар эмир хьиз ваъ, кьезилвал гун яз лугьузва. 7Заз вири, зун хьиз, субай хьанайтӀа кӀандай, амма гьар садаз Аллагьди ганвай вичин пай ава: садаз – сад, муькуьдаз – масад. 8За папар амачир итимризни хендеда папариз лугьузва: абуруз, мехъер тахвуна, за хьиз, уьмуьр тухун хъсан я. 9Амма абурувай чпивай чеб кьаз жезвачтӀа, къуй мехъер авурай, акӀ авун ашервилин цӀай акатна жеридалай хъсан я.
10Папа вичин гъуьл гадарна кӀандач – ихьтин эмир некягьдик квайбуруз гузвайди зун ваъ, Ребби Вич я. 11Ада гьикӀ хьайитӀани гъуьл гадарайтӀа, цӀийи кьилелай мад я гъуьлуьз техъфирай, я вичин гъуьлуьхъ галаз туьхкӀуьрай ва адан патав хъфирай. Вичин патай гъуьлни папахъ галаз чара хьана кӀандач. 12Амайбуруз за лугьузва, ибурни Реббидин Гафар ваъ, зибур я: стхайрикай садаз иман гвачир паб аватӀа ва папаз гъуьлуьхъ галаз уьмуьр тухуз кӀанзаватӀа, итим чара хьун лазим туш. 13И кар иман гвачир гъуьл авай папазни талукь я: гъуьлуьз папахъ галаз уьмуьр тухуз кӀанзаватӀа, паб чара хьун лазим туш. 14ГьикӀ лагьайтӀа, иман гвачир гъуьл – имандал алай папалди ва иман гвачир паб иман гвай гъуьлелди Аллагьдиз талукь жезва. ТахьайтӀа куь аялар михьи жедачир, амма и саягъда абур пак я.
15Иман гвачирдаз чара жез кӀанзаватӀа, къуй чара хьурай. Ихьтин береда стхади ва я ваха чеб кутӀуннавайбур яз гьисс тавурай. Аллагьди чаз ислягьвилелди уьмуьр твах лагьанва. 16Вуна ви гъуьл хилас ийидани-ийидачни ваз гьикӀ чир хьурай, я паб? Вунани ви паб хилас ийидани-ийидачни ваз гьикӀ чир хьурай, я гъуьл?
17Къуй гьар сада Аллагьдиз кӀанзавай саягъда вичин уьмуьр тухурай, Аллагьди вичиз гьихьтинди яз эвернаватӀа гьахьтинди яз амукьрай. И къайда за вири иманийрин кӀватӀалра тун эмирзава. 18Вичиз эверай чӀавуз вуж суьннет авунватӀа, ада и кар чуьнуьхун лазим туш. Низ суьннет тавунмаз эвер ганватӀа, къуй ада вич суьннет ийиз тагурай. 19Суьннет авунихъни тавунихъ са метлебни авач, кьилинди инсанди Аллагьдин эмирар кьилиз акъудун я. 20Къуй гьар сад вичиз Аллагьди эверай вахтунда гьихьтинди тиртӀа гьа саягъда амукьрай. 21Аллагьди ваз эверайла вун лукӀ тиртӀа, къуй и карди вун перт тавурай, амма ваз азадвал къачудай мумкинвал аватӀа, адакай менфят къачу. 22Вучиз лагьайтӀа Аллагьди эвернавай лукӀ – ам Реббиди азаднавайди я, гьа саягъда Аллагьди азад яз эвернавайди Месигьдин лукӀ я. 23Куьн багьа къимет гана къачунва, гьакӀ хьайила квекай инсанрин лукӀар жемир. 24Стхаяр-вахар, къуй гьар сад вичиз Аллагьди эверайла гьи саягъда авайтӀа, гьа саягъда аваз амукьрай.
25Аллагьдин патай мехъер тавунвайбуруз талукь эмирар заз авач, амма, Аллагьдин регьимдалди ихтибар къачур за жуван фикир лугьузва: 26алай четин чӀавуз за куьн субай яз амукьун хъсан яз гьисабзава. 27Вуна паб гъанватӀа, чара жез алахъмир. Вуна паб гъанвачтӀа, папахъ къекъвемир. 28Амма вуна паб гъайитӀани, им гунагь жедач; руш гъуьлуьз фейитӀа, имни гунагь жедач. Анжах мехъер ийизвайбурун уьмуьрда цӀийи четинвилер пайда жеда, заз куьн гьабурукай хуьз кӀандай. 29Маса гафаралди, стхаяр-вахар, заз квез лугьуз кӀанзава хьи, вахт лап тӀимил ама, къуй и вахтунда мехъер авунвайбуру мехъер тавунвайбуру хьиз, 30хажалат чӀугвазвайбуру хажалат чӀугван тийизвайбуру хьиз, шадвалзавайбуру шадвал тийизвайбуру хьиз, шей-шуьй къачузвайбуру чпи затӀни къачун тийизвайбуру хьиз тухурай. 31Са гафуналди, и дуьньядиз хас крарал алахъзавайбур а крарилай гъейри маса кӀвалахар амачир хьиз эгечӀ тавурай. Вучиз лагьайтӀа, гилан шикилда авай дуьнья и мукьвара тахьай мисал жеда.
32Квез са жуьредин къайгъуярни залан тахьана кӀанда заз. Паб тагъанвай касди Реббидин крарин къайгъу чӀугвада, Реббидиз кӀандайвал ийида. 33Паб гъанвайда и дуьньядин крарин къайгъу чӀугвада, папаз кӀандайвал ийида. 34Гъуьл амачир паб ва я субай руш Реббидин крарихъ гелкъведа, абур бедендалди ва руьгьдалди чеб Аллагьдиз бахш ийиз алахъда, амма гъуьлуьк квай папа гьар йикъан крарин къайгъу чӀугвада ва гъуьлуьз кӀандайвал ийиз жеда. 35За и гафар квез са квелди ятӀани кьадар эцигун паталди ваъ, куь хийирдиз лугьузвайди я. Заз кӀанзавайди куьне Реббидиз яргъал тевгьена лайихдаказ датӀана къуллугъ авун я.
36Ни вич вичин лишан кутунвай рушав лайих тушир саягъда эгечӀзаваз гьисабзаватӀа, ва адавай вичин гьашер гьиссер кьаз жезвачтӀа, къуй ада вичиз кӀандайвал авурай. Гунагь жедач, къуй абуру мехъер авурай. 37Амма инсанди паб гъидач лагьана кӀевелай кьетӀнаватӀа, ам садани мажбур ийизвачтӀа, адавай вич кьаз жезватӀа, лишан кутунвай рушак кягъ тавун вичин рикӀяй къетӀ авуналди, ада вич хъсандаказ тухуда. 38Гьа икӀ, ни вичин лишан кутунвай руш гъизватӀа, ада вич хъсандаказ тухузва, паб тегъизвайда вич гьадалайни хъсандиз тухузва.
39Паб уьмуьрлух вичин гъуьлуьхъ галкӀанва, анжах адан гъуьл рагьметдиз фейи чӀавуз адавай азаддаказ вичиз кӀандайдаз гъуьлуьз хъфиз жеда; кьилинди – а кас Реббидиз талукьди хьурай. 40Амма зи фикирдалди гъуьлуьз техъфейтӀа, адаз генани гзаф бахт жеда. Заз чиз, закни Аллагьдин Руьгь ква.
Избрани в момента:
1-Каринфвийриз 7: ЛезПК
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Институт перевода Библии, 2010-2024