1-Каринфвийриз 15
15
Кьейибурал чан хтуникай
1Стхаяр-вахар, за квез муштулух гайи, куьне кьабулай ва вичелди куьн мягькем хьайи Шад Хабар за куь рикӀел хкизва. 2Куьн за квез муштулух яз гайидал кӀевиз акъвазайтӀа, куьн гьадалди хилас жеда, тахьайтӀа куь иман гьаваянди я.
3Жува къачур виридалайни важиб тирди за квев вуганва: Каламра авайвал, Месигь чи гунагьрай кьенай. 4Каламда авайвал Ам кучукнай ва кьейи пуд лагьай юкъуз чан хтанай. 5Ам Кифадиз акунай ва ахпа цӀикьвед тилмиздиз. 6Идалай гуьгъуьниз Ам вад вишелайни гзаф стхайриз-вахариз гьа са вахтунда акунай. Абурукай гзафбурал чан алама, са бязибур рагьметдиз фенва. 7Са кьадар чӀавалай Ам Якьубаз акунай, ахпа гьакӀни вири илчийриз, 8ва геж хьиз куь арадиз атай язух заз Ам виридалай гуьгъуьниз акунай. 9Зун лагьайтӀа, илчийрикай виридалайни гъвечӀиди я ва гьатта илчидин тӀварцӀиз лайихни туш, вучиз лагьайтӀа зун Аллагьдин иманийрин кӀватӀалдин геле къекъвенай. 10Амма Аллагьдин берекатди гайивал зун вуж ятӀа гьам я, Адан берекат зак нагьакьанди хьанач: за амайбурулай гзаф зегьмет чӀугуна, яни за ваъ, захъ галай Аллагьдин берекатди. 11Ни муштулух гузватӀа са гафар я: за ва я абуру. Кьилинди куьн чна муштулух гузвайдан чӀалахъ хьунухь я.
12Лагь кван заз, Месигьдал кьейидалай кьулухъ чан хтана лугьуз муштулух гузватӀа, квекай са бязибуру гьикӀ лагьана кьейибурал чан хтун жедай кар туш лугьузвайди я? 13Кьейибурал чан хтун авай кар туштӀа, Месигьдални чан хтанвач. 14Месигьдал чан хтанвачтӀа, чна муштулух гузвайдахъни чи имандихъ са манани авач. 15Гьа са чӀавуз чакай Аллагьдикай тапан шагьидвал ийизвайбур жезва, вучиз лагьайтӀа чна, кьейибурал чан хкиз тахьайтӀани, Аллагьди чан хкун тавур Месигьдал Ада чан хкана лугьуз шагьидвал авунай. 16ГьикӀ лагьайтӀа, кьейибурал чан хквезвачтӀа, Месигьдални чан хтаначир. 17Месигьдал чан хтанвачтӀа, чи иманни гьаваянди я, куь гунагьарни куь хиве ама. 18АкӀ хьайила, Месигьдихъ ийизвай иман гваз рагьметдиз фейибурни телеф хьана. 19Чна Месигьдик кутазвай умуд анжах са и уьмуьр паталди ятӀа, чун амай инсанрилайни гзаф язух гьалда ава.
20Амма Месигьдал гьакъикъатдани чан хтана! Адал рагьметдиз фейибурун арадай сифтегьанди яз чан хтанва. 21И дуьньядиз ажал са касдалди гьикӀ атанатӀа, гьакӀ са Касдалди кьейидалай кьулухъ чан хтунни атана. 22Вучиз лагьайтӀа Адамаз талукьбур вири гьикӀ рекьизватӀа, Месигьдиз талукь виридал гьакӀ чан хкведа. 23Гьардахъ вичин вяде ава: сифте Месигьдал чан хтана, ахпа, Ам мад пайда хьайила, Адаз талукьбурални чан хкведа. 24Ада, гьар са гьакимвал ва гьукум ва къуват тергна, Пачагьлугъ Аллагь Бубадив вугай чӀавуз эхир заман алукьда. 25Аллагьди вири душманар ярхарна Месигьдин кӀвачерик вегьидай вахт къведалди, Месигьди пачагьвал авуна кӀанда. 26Тергна алуддай эхиримжи душман ажал я. 27Аллагьди Каламда лугьузвайвал, «вири Адан кӀвачерик муьтӀуьгъарна»#Забур 8:7.. «Вири муьтӀуьгъарна», – лугьудай чӀавуз, гьелбетда, «вири» гафуник вири Адаз муьтӀуьгъ авур Аллагь Вич акатзавач. 28Вири Адаз муьтӀуьгъ авур чӀавуз, Аллагьди вирина агъавал авун патал, Хва Вични вири Хциз муьтӀуьгъ Авурдаз табий жеда.
29ИкӀ туширтӀа, вучиз кьейибурун паталай инсанри цик акахьун кьачудай? Кьейибурал чан хкведачтӀа, вучиз абурун паталай инсанри цик акахьун къачузва кьван? 30Вучиз чнани гьар са сятда жуван уьмуьр хатадик кутазва? 31Стхаяр-вахар, зун гьар юкъуз кьиникьин вилик чин-чинал акъваззава. Им за чи Ребби тир Иса Месигьдин вилик квел дамахар ийизвайди хьиз гьакъикъатда авай кар я. 32За, цаварал жедай уьмуьрдик умуд кутун тавуна, Эфесда вагьши гьайванар хьтин инсанрихъ галаз женг чӀугунатӀа, заз идай хьайи вуч хийир ава? Кьейибурал чан хквезвачтӀа, вучда кьван: «Ша нен, хъван, вучиз лагьайтӀа пака чун рекьида?»#Яшай 22:13.
33Килиг, куьн алцур жедайвал тахьуй: «Пис кӀватӀалди хъсан адетар чӀурда». 34Куьн хьун лазим тирвал, кьил кьилел хъша, гунагьар ийимир, гьикӀ лагьайтӀа, квекай бязибуруз Аллагь чизвач, – и гафар за квез регъуь хьун патал лугьузва.
35Мумкин я сада хабар кьун: «Кьейибурал гьикӀ чан хкведа? Абурухъ гьихьтин беден жеда?» 36Ибур терхеба гафар я. Гьар са цил уьмуьрдин цӀир гъун патал кьена кӀанда! 37Вуна тум вегьидай чӀавуз цазвайди набататдин вири беден туш кьван, анжах къуьлуьн ва я са маса твар я. 38Амма Аллагьди Вичиз кӀандайвал адаз беден гузва – гьар са тварциз вичин беден. 39Вири беденар сад хьтинбур туш: инсанрин беденар са жуьрединбур я, гьайванрин беденар са жуьрединбур я, къушарин беденар са жуьрединбур я, гьуьлуьн гъетрен беденар са жуьрединбур я. 40Цаварал алай кӀалубарни, чилерал жедайбурни ава. Цаварин кӀалубрихъ чпин иервал ава, чилинбурухъ – чпин. 41Ракъинихъ вичин парпар ава, вацрахъ – вичин, гъетерихъни – чпин. Гъетерни чпин нубатдай экуьвилел гьалтайла садаз садалай тафават авайбур жезва.
42Кьейибурал чан хкведайлани гьакӀ жеда. Чилик кутур беден ктӀана чкӀида, чан хкведай беден ктӀидач. 43Чилик кутур бедендал баркалла алач, чан хкведай бедендал баркалла жеда. Чилик кутурди зайифвиле жеда, чан хкведайди – къуватда. 44Чилик кутурди беден авай затӀ хьиз чкӀида, чан хкведайди Руьгьдиз хас жуьреда жеда. Тан авай беден аватӀа, Руьгьдиз хас беденни ава. 45Каламди лугьузва хьи, сад лагьай инсан Адамал чан атана, амма эхиримжи Адам – уьмуьр гудай Руьгь я. 46Сифтедай Руьгьдиз хасди ваъ, беден авайди къвезва, анжах ахпа – Руьгьдиз хасди. 47Сад лагьай инсан чилин руквадикай халкь авунай, кьвед лагьай Инсан – им цаварилай тир Инсан я. 48Чилин инсанар чилин сад лагьай инсан хьтинбур я, цаварин инсанар цаварилай атай Инсан хьтинбур я. 49Исятда чал гьикӀ чилин инсандин къамат алатӀа, гьакӀ чун цаварин Инсандизни ухшар жеда.
50За квез лугьузва, стхаяр-вахар, якӀукайни ивидикай Аллагьдин Пачагьлугъдин ирссагьибар хьун мумкин туш; ктӀидай са затӀни ктӀин тийидайдан ирссагьиб жедач. 51Яб це, за квез исятда сир ахъайда: чун вири рагьметдиз фидач, амма вири чун 52садлагьана, вил кӀевна ахъайдалди, эхиримжи къаргъудин ван акъатайла, дегишарда. Къаргъудин ван акъатдайла, кьейибурал члаф тежедайвал чан хкведа, чун лагьайтӀа, дегиш жеда. 53Члаф жедай кьван вири члаф тежедайдаз элкъуьн лазим я, ажал галай кьван вири – рекьин тийидайдаз. 54Члафдакай члаф тежерди, рекьирдакай рекьин тийирди хьайила, гьа чӀавуз и кхьенвай гафар кьилиз акъатда: «Ажал гъалибвили туькьуьнна!»#Яшай 25:8.
55 «Я ажал, ви гъалибвал гьинава?
Я ажал, ви мизмиз гьинава?» #
Гьаши 13:14.
56Ажалдин мизмиз гунагь я, гунагьди къуват Къанундивай къачузва. 57Амма Аллагьдиз шукур хьурай! Ада чи Ребби Иса Месигьдин куьмекдалди чаз гъалибвал гузва!
58Гьавиляй, зи кӀани стхаяр-вахар, кӀевиз акъваз. Са куьнини куь рикӀе шак туна кӀандач. Куьне датӀана Аллагьдиз къуллугъ авунин рекье агалкьунар къачу ва куь зегьмет Ребби патал гьаваянди туширди чир хьухь.
Избрани в момента:
1-Каринфвийриз 15: ЛезПК
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Институт перевода Библии, 2010-2024