1-Каринфвийриз 14
14
Пайгъамбарвал ва течир чӀаларал рахун
1 Муьгьуьббатдин рекье хьухь, Руьгьдин паяр къачуз алахъ, иллаки пайгъамбарвал ийиз хьунин пай. 2Вуж вичиз течир чӀалал рахазватӀа, ам инсанрихъ галаз ваъ, Аллагьдихъ галаз рахазва, вучиз лагьайтӀа, адан гъавурда садни акьазвач, ада руьгьдалди сирер лугьузва. 3Амма пайгъамбарвал ийизвайда инсанриз, абуруз несигьат яз, кӀубанарун яз ва сабур гун яз лугьузва. 4Течир чӀалал рахазвайди анжах са вичиз несигьат гуз рахазва, амма пайгъамбарвал ийизвайди иманийрин кӀватӀалдиз несигьат гуз рахазва. 5Заз куьн вири течир чӀаларал раханайтӀа кӀандай, амма куьне пайгъамбарвал авунайтӀа мадни хъсан жедай. Течир чӀаларал рахазвайда вичин рахунрин мана ачухарзавай ва адалди иманийрин кӀватӀалдиз несигьат гузвай дуьшуьшар квачиз, течир чӀаларал рахазвайдалай пайгъамбар вине я. 6Стхаяр-вахар, зун куь патав атана течир чӀаларал рахаз хьайитӀа, зи гафара я керемат, я чирвал, я пайгъамбарвал, я несигьат авачиз хьайитӀа, за квез вуч хийир гуда? 7Ша чна мисал яз чан алачир ван акъудзавай алатар тир кфил ва я арфа къачун. Абурал, ванер сад садавай чара тежез, макьамар ягъиз хьайитӀа, квез макьам гьа алатралди язавайди гьикӀ чир хьурай? 8Къаргъуди кьил акъатдайвал тайин хабар-ишара ягъ тавуртӀа, женгиниз вуж гьазур жеда? 9Куь арадани гьакӀ я. Куьне мецелди, кьил акъатдайвал, атӀуз-атӀуз течир чӀалал гафар лугьуз тахьайтӀа, куьне вуч лугьузватӀа инсан гьикӀ гъавурда акьурай? Куьне лагьай гафар гару тухуда. 10Дуьньяда жуьреба-жуьре чӀалар гзаф ава, ва абурухъ гьардахъ вичин мана ава. 11Заз лугьузвай гафарин мана чизвачтӀа, зав рахазвайдан гъавурда зун акьадач ва гьамни зи гъавурда акьадач. 12Куь арадани гьакӀ я. Квез квехъ Руьгьдин паяр хьана кӀанзаватӀа, абур квехъ булвилелди жедайвал ая, амма иманийрин кӀватӀалдиз хийир жедайвал хьурай.
13Гьавиляй течир чӀалал рахазвайда вичиз мана ачухарунин пай хьун патал дуьа авурай. 14Зун течир чӀалал рахадай чӀавуз зи руьгьди дуьа ийизва, амма акьул и кардик квач ва идакай масабуруз са хийирни авач. 15ГьакӀ хьайила за вуч ийин? Заз руьгьдалдини дуьа ийиз, акьулдалдини дуьа ийиз кӀанзава. Заз руьгьдалдини мани лугьуз, акьулдалдини мани лугьуз кӀанзава. 16Вуна руьгьдалди Аллагьдиз шукур ийизватӀа, чӀал течирдавай «амин» гьикӀ лугьуз жеда? Вучиз лагьайтӀа, вуна вуч лугьузватӀа ам гъавурда акьадач! 17Вавай Аллагьдиз хъсандаказ шукурар ийиз жеда, амма и карди маса касдиз хийир гъидач.
18За жув течир чӀаларал квелай гзаф рахазва лугьуз Аллагьдиз шукур ийизва. 19Амма иманийрин кӀватӀалда, течир чӀалал цӀуд агъзурралди гафар лугьудалди, масадбуруз несигьат жедай, гъавурда акьадай анжах вад гаф лугьуз кӀанзава заз.
20Стхаяр ва вахар, акьулдалди аялар жемир. Писвилин рекьяй аялар хьиз, амма акьулдалди чӀехибур яз хьухь.
21 Къанунда Реббиди лагьанва:
«Чара чӀаларал рахазвай инсанрин куьмекдалди,
патан чилин эгьлийрин мецералди
Зун рахада и халкьдив,
амма гьа чӀавузни абуру Заз яб гудач» #
Яшай 28:11-12. .
22Гьа икӀ течир чӀалар иманияр паталди ваъ, иман гвачирбур паталди ишараяр я. Пайгъамбарвал авун иман гвачирбур паталди ваъ, иманияр паталди я. 23Гьавиляй, вири иманийрин кӀватӀал кӀватӀ хьана течир чӀаларалди рахаз хьайитӀа, наши ва иман гвачир ксар атайтӀа, абуру куь акьул фенва лугьудачни? 24Амма вирида пайгъамбарвал ийидай чӀавуз иман гвачирди ва я нашиди атайтӀа, адан гунагьар винел акъудда, вирида ам айибда. 25Адан рикӀин вири чинебан ниятар винел акъатда, ва ада, чинихъди ярх хьана, Аллагьдиз икрамда ва ван алаз лугьуда: «Куь арада гьакъикъатдани Аллагь ава!»
Ибадат авунин къайда
26Вучда, стхаяр-вахар? Куьн санал кӀватӀ хьайи чӀавуз, квев гьар садав мани ва я чирвилин гаф, ва я керемат, ва я чӀал, ва я а чӀалал лагьайдан мана гватӀа, къуй им вири иманийрин кӀватӀалдиз несигьат яз хьурай. 27Течир чӀалал рахадайбур аватӀа, къуй кьвед рахурай, гзаф хьайитӀа, пуд рахурай ва чебни нубат-нубатдалди, амма са касди гъавурда турай. 28Куь арада гъавурда твадай кас авачтӀа, иманийрин кӀватӀалда кисрай ва анжах вичизни Аллагьдиз лугьурай.
29Пайгъамбарарни кьвед ва я пуд рахурай, амайбуру чпиз ван хьайидакай веревирдер авурай. 30КӀватӀ хьанвайбурукай са низ ятӀани керемат атайтӀа, къуй сифтедай рахазвайди кис хьурай. 31Квевай виридавай жуваз несигьат ва кӀубанвал къачуз хьун патал, квевай нубатдалди пайгъамбарвал ийиз жеда. 32Пайгъамбарривай чпин руьгь идара ийиз жеда, 33вучиз лагьайтӀа Аллагь къайда тахьунин ваъ, ислягьвилин Аллагь я.
Месигьдиз талукьбурун вири кӀватӀалра хьиз, 34папар ибадатдин вахтунда кис хьурай. Абуруз рахадай ихтияр авач, амма абур, Къанунди тӀалабзавайвал, табий хьурай. 35Абуруз са вуч ятӀани чириз кӀанзаватӀа, и кардикай абуру кӀвале чпин гъуьлеривай хабар кьурай, вучиз лагьайтӀа иманийрин кӀватӀалда папаз рахун кутугнавач.
36Аллагьдин Гаф эвелни-эвел квелай атайди я ва я анжах квев агакьайди я лагьана фикирзавани куьне? 37Ни вич пайгъамбар ва я Руьгьдин инсан яз гьисабзаватӀа, за квез кхьизвайбур Реббидин Вичин тагькимар тирди хиве кьурай. 38Са ни ятӀани и кар кваз кьазвачтӀа, гьам вични кваз кьадач.
39Гьа икӀ, стхаяр-вахар, пайгъамбарвал авунихъ гьереката, амма течир чӀаларал рахунин вилик пад кьамир. 40Амма вири кӀвалахар эдебдалди кьиле фирай ва къайдадив кьадайбур хьурай.
Избрани в момента:
1-Каринфвийриз 14: ЛезПК
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Институт перевода Библии, 2010-2024