Yela 60
60
Lɛɛ wesoŋa
Kooro Devid yel
1N Naa Korowii, he baah
fa di ya nɛɛ dɛ vɛh yaa,
he baah di ya nɛɛ te,
kɛ berɛ lawɛ yaa
ba he be taraken.
2He ɡelɔ harɛ jiɡri, o bini
pere.
Berɛ kwaa tɔɔɡe bɔɔne la,
dɛkalkɛ a dɛ paɡri.
3He ɡelɔ he nɛra
na wahala kohona,
ya valɛ dɛɛ yɛɛɡe kɛŋɔ
yaa nyɔ sen dɛ dɛɛ ken.
4He ir he fraŋkaa dɛ́ kpɔ kah
nɛra baa dɛ ɔmɛ,
ɡɛ aa ɛ ásɛ ba dɔma
bɛ ban kpoo.
5Lɛ yaa he kpeɡri ne,
dɛ́ no ya wesoŋa,
ɡɛ aa ɛ he lɛ
nɛra haa dɛ nyin ba la.#Mma 33:12#Yel 108:6-13
6Korowii bol waa
o Dea bela waa do ɡoroŋ la
dɛ ŋɔ,
“Mɛɛ yo bwɛjen Sɛkem
tenaa, dɛ́ pɔ ba nɛ,
dɛ́ bɔne o ne
Sukot Fɛlembɔjen
bini tɛ n nɛra.
7Gelead harɛ ne Manasɛ dea
harɛ bwa ɛ n kwa.
Efrem harɛ do kɛŋɔ
n laa ɡbɛrɛ,
asɛ Juda harɛ ɡe do kɛŋɔ
n koodaŋɡbala.
8Moab harɛ nɛra ɛ n bonɔɔna,
ba do kɛ loɡ maa dɛ loo
kwaa o bini ken,
mɛɛ kpɔ n naŋɡawaa ta
Edom harɛ ta.#60:8 Mɛɛ kpɔ n naŋɡawaa ta Edom harɛ ta munii Edom harɛ ɛ n kon pi.
N dɛ moo, dɛkalkɛ
n pɔ Filisti tena nɛ.”
9N Naa Korowii,
umee dɛ́ kpɔ mɛ jo bwɛjen
baa ma danjwɛkpeɡ baro
nɔ ta nɔ?
Umee dɛ́ tɔ n sie
kaa Edom ɔ?
10He deno berɛ habɔɔ kpo yaa
kɛɛ?
Haa ya laa tena sie tɔ
ka yo ya dɔma kpa aa?
11Cha yaa yá won pɔ
ya dɔma nɛ,
nɛwɛnyini chae ɡɛ bɛlbwa
naa,
a bwa dɛ ɛ pɛɛpɛɛ.
12Korowii ja ya nɛ aa,
yaa yoo, dɛ́ pɔ ya dɔma nɛ.
Wɛɛ tiɡri ya dɔmaa
do harɛ.
Избрани в момента:
Yela 60: mzw
Маркирай стих
Копиране
Сравни
Споделяне
Искате ли вашите акценти да бъдат запазени на всички ваши устройства? Регистрирайте се или влезте
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.