Mateu 20
20
Nguli ya babeleki
1“Mubuso wa Lihalimu u swana ni muñ'a simu ya veine, ya pakelezi ku y'o bata batu ba ba ka beleka mwa simu ya hae. 2A lumelelana ni bona ku ba holisa mali a likana muholelo wa lizazi li li liñwi, mi a ba lumela ku y'o beleka mwa simu ya hae. 3Kih'a ya hape kwa musika, ka hola ya busupa ka ze peli, mi kwateñi a bona banna ba ba ne ba itulezi feela. 4A li ku bona, ‘Ni mina, mu ye mu y'o beleka mwa simu ya ka ya veine, mi ni ta mi holisa ka swanelo.’ 5Mi ba ya. A kuta hape musihali-tuna mi hape kasamulaho wa lihola ze talu, a eza cwalo. 6Kwa mafelelezo a kutela kwa musika ha ku siyezwi feela hola i liñwi ya ku sebeza. Kih'a bona banna ba bañwi ba nze ba yemi feela, mi a ba buza, a li, ‘Kiñi ha mu yemi feela mu si na se mu eza lizazi kaufela?’ 7Ba alaba, ba li, ‘Kakuli ha ku na ya lu file musebezi.’ A li ku bona, ‘Hakulicwalo, ni mina, mu ye mu y'o beleka mwa simu ya ka ya veine.’
8 #
Malivi 19.13; Mul 24.15 “Ka nako ya manzibwana, muñ'a simu a bulelela muzamaisi wa misebezi ya hae, a li, ‘Biza babeleki kaufela, u ba holise mali a bona, u kale ka ba mafelelezo, mi u feleleze ka ba ba keni pili.’ 9Babeleki ba ba ne ba kalile musebezi kwa mafelelezo, ba lifwa mali a lizazi mutumbi, mutu ni mutu. 10Cwale babeleki ba ba ne ba keni pili ha ba taha kwa ku hola, ba hupula kuli mwendi ba ta fumana ku fita ba ba ne ba keni mwamulaho, kono ni bona ba fiwa mali a likana ni a ba bañwi. 11Ba nga mali a bona, mi ba kala ku bilaela ku muñ'a simu. 12Ba li, ‘Babeleki bao, ba mafelelezo, ba belekile nako i liñwi feela, kanti luna lu belekile lizazi kaufela, ku nze ku cisa, kono nihakulicwalo u ba lifile sina luna!’
13Muñ'a simu a alaba yo muñwi wa ku bona, a li, ‘Utwa, mulikani. Ha ni si ka ku puma, kakuli ne lu lumelelani kuli u ka sebeleza mali a lizazi li li liñwi. 14U nge mali a hao, mi u ikele kwa hae. Ni lata ku fa mubeleki wa mafelelezo mali a likana ni ao o ni ku file. 15Kana ha ni lukeli ku eza mo ni latela ka mali a ka, nji? Kamba u shwa muna kabakala bufani bwa ka?’ ”
16 #
Mat 19.30; Mar 10.31; Luk 13.30 Mi Jesu a ekeza, a li, “Kamukwaocwalo, ba mafelelezo ba ta ba ba pili, mi ba pili ba ta ba ba mafelelezo.”
Jesu u sa bulela hape ka za lifu ni zuho ya hae
(Mar 10.32-34; Luk 18.31-34)
17Jesu h'a li mwa nzila ye kambamela kwa Jerusalema, a bizeza balutiwa ba hae ba lishumi ka ba babeli kwatuko, mi a ba bulelela ba nze ba zamaya. 18A li, ‘A mu utwe! Lu kambamela kwa Jerusalema, koo na, Mwan'a Mutu, ni ta fiwa baprisita ba bahulu ni Baluti ba Mulao. Ba ta ni atulela lifu. 19Ba ta ni fa mwa mazoho a balicaba, ba ba ta ni sheununa, ba ni nate, ba ni kokotele fa sifapahano, kono ni ta zuha kwa bafu mwamulaho a mazazi a malalu.”
Kupo ya m'ahe Jakobo ni Joani
(Mar 10.35-45)
20Cwale m'a bana ba Zebedea a taha ku Jesu ni bana ba hae. A inama fapil'a hae, mi a kupa tuso.
21Jesu a mu buza, a li, “U batañi?”
Yena a mu alaba, a li, “A ku ni sepise kuli bana ba ka ba, mwa bubeli bwa bona, u ta ba inisa yo muñwi ku la bulyo ni yo muñwi ku la nzohoto la hao ha u ta ba mulena.”
22Jesu a alaba, a li, “Ha mu zibi se mu kupa. Kana kikuli mwa kona ku nwela mwa sinwelo se ni ka tuha ni nwela ku sona?”
Ba mu alaba, ba li, “Lwa kona.”
23Jesu a ba bulelela, a li, “Ki niti, mu ka nwela mwa sinwelo sa ka luli, kono na, ha ni na swanelo ya ku keta ba ba ta ina ku la bulyo kamba ku la nzohoto la ka. Libaka zeo ki za ba ba lukiselizwe cwalo ki Ndate.”
24Balutiwa ba lishumi ha ba utwa cwalo ba nyemela Jakobo ni munyan'a hae Joani. 25#Luk 22.25-26 Jesu kih'a ba kopanya kaufela, mi a li ku bona, “Mwa ziba kuli babusi ba batu ba na ni maata fahalimw'a bona, ni kuli ba litulo ze tuna ba ba busa ka tata. 26#Mat 23.11; Mar 9.35; Luk 22.26 Kono ku si ke kwa ba cwalo mwahal'a mina. Haiba yo muñwi wa mina a bata ku ba yo muhulu, u swanezi ku ba sikombwa sa mina. 27Haiba yo muñwi a lata ku ba wa pili, a be mutanga wa mina. 28Sina na, Mwan'a Mutu, ha ni si ka taha ku t'o sebelezwa, kono ni til'o sebeleza batu ni ku itombola bupilo bwa ka kuli ku liululwe batu kaufela.”
Jesu u folisa libofu ze peli
(Mar 10.46-52; Luk 18.35-43)
29Ha ba zwa mwa Jeriko, batu ba bañata hahulu ba latelela Jesu. 30Mi libofu ze peli ne li inzi kwatukw'a nzila. Mi ba utwa kuli i ne li Jesu ya n'a fita, kiha ba kala ku huwa, ba li, “Mulena, Mwan'a Davida, u lu utwele butuku!”
31Nyangela ya ba omanya ni ku ba bulelela kuli ba kuze. Kono ba huwa ku fita pili, ba li, “Mulena, Mwan'a Davida, u lu utwele butuku!”
32Jesu a yema, a ba biza, mi a ba buza, a li, “Mu bata kuli ni mi ezeze sika mañi?”
33Ba mu alaba, ba li, “Mulena, lu kupa kuli u kwalule meeto a luna!”
34Jesu a ba shwela makeke, mi a ba swala fa meeto. Honafo ba bona, mi ba mu latelela.
Цяпер абрана:
Mateu 20: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.