Mateu 19
19
Jesu u luta ka za telekano
(Mar 10.1-12)
1Jesu ha s'a felize ku bulela manzwi ao, a zwa mwa Galilea, mi a kutela mwa naha ya Judea, mwabuse bwa Nuka ya Jordani. 2Batu ba bañata ba mu latelela, mi a folisa ba ba ne ba kula.
3Bafalisi ba bañwi ba taha ku yena ku t'o mu lika. Ba mu buza, ba li, “Kana Mulao wa luna u lumelela munna ku leleka musal'a hae ka mulatu ufi kamba ufi?”
4 #
Sim 1.27; 5.2 Jesu a alaba, a li, “Kana ha mu si ka bala se si ñozwi, kuli kwa simuluho Mubupi n'a ezize munna ni musali? 5#Sim 2.24 Mi a li, ‘Kabakaleo, munna u ta tuhela ndat'ahe ni m'ahe a kumalele musal'a hae, mi ba babeli bao ba ta ba mutu a li muñwi.’ 6Cwale ha ba sa li ba babeli, kono ba se ba li a li muñwi feela. Hakulicwalo, mutu a si ke a kauhanya se si kopanyizwe ki Mulimu.”
7 #
Mul 24.1-4; Mat 5.31 Cwale Bafalisi ba mu buza, ba li, “Kikabakalañi, Mushe h'a tuhelezi munna ku fa musal'a hae liñolo la ku mu lukulula mi kihona a ka mu leleka?”
8Jesu a alaba, a li, “Mushe u mi lumelezi ku leleka basali ba mina kabakala butata bwa lipilu za mina, kono ne ku si cwalo kwa simuluho. 9#Mat 5.32; 1 Bakor 7.10-11 Ni mi bulelela kuli, mutu kaufela ya leleka musal'a hae wa buka haiba a nyala musali u sili, konji linyalo la bona ha ne li si ka mulao.”
10Balutiwa ba hae ba li ku yena, “Haiba ku cwalo mwahal'a munna ni musali, kanti bunde ki ku sa nyala.”
11Jesu a ba alaba, a li, “Tuto ye ha i ami batu kaufela, kono i ama feela ba ba filwe ki Mulimu maata a ku ya ka yona. 12Kakuli ku na ni mabaka a mañata a paleliswa batu ku nyala. Ba bañwi ba palelwa kakuli ba pepilwe cwalo. Ba bañwi ba palelwa kakuli ba holofalizwe ki batu. Ba bañwi ha ba nyali kabakala Mubuso wa Lihalimu. Ya kona ku amuhela tuto ye, a i amuhele!
Jesu u tohonolofaza banana
(Mar 10.13-16; Luk 18.15-17)
13Batu ba bañwi kiha ba tisa banana ku Jesu kuli a ba beye mazoho ni ku ba lapelela, kono balutiwa ba ba omanya. 14Jesu a li ku bona, “A mu tuhele banana, ba tahe ku na, mi mu si ke mwa ba hanisa kakuli Mubuso wa Lihalimu ki wa ba ba swana ni bona.”
15A ba beya mazoho, mi a funduka.
Mucaha wa mufumi
(Mar 10.17-31; Luk 18.18-30)
16Kwa taha munna ku Jesu mi a mu buza, a li, “Muluti, ni swanezi ku eza bunde bufi kuli ni fumane bupilo bo bu sa feli?”
17Jesu a li ku yena, “Kikabakalañi ha u ni buza ka za bunde? Yo munde ki a li muñwi feela. U buluke milao, ha u bata ku kena mwa bupilo.”
18 #
Mut 20.13-16; Mul 5.17-20 A buza, a li, “Milao ifi?”
Jesu a mu alaba, a li, “U si ke wa bulaya mutu. U si ke wa buka. U si ke wa uzwa. U si ke wa paka za buhata. 19#Mut 20.12; Mul 5.16; Malivi 19.18 U kuteke ndat'aho ni m'aho, mi u late wahenu sina m'o itatela.”
20Mucaha a mu alaba, a li, “Milao yeo, ni i bulukile kaufel'a yona. Ze ñwi hape, ze ni swanezi ku eza, ki lifi?”
21Jesu a li ku yena, “Haiba u bata ku ba ya petehile, zamaya u y'o lekisa z'o na ni zona kaufela, mi mali u a fe babotana, kihona u ta ba ni bufumu mwa lihalimu. Ku zwa fo u tahe, u ni latelele.”
22Kono mucaha yo h'a utwa cwalo, a ya a swabile kakuli n'a fumile hahulu.
23Cwale Jesu a li kwa balutiwa ba hae, “Ni mi bulelela niti. Ku ta ba tata hahulu kuli mutu ya fumile a kene mwa Mubuso wa Lihalimu. 24Mi ni sa ekeza ku mi bulelela kuli, mane ne ku ka ba bunolo kuli kamele i kene mwa liito la ndonga, ku fita kuli mutu ya fumile a kene mwa Mubuso wa Mulimu.”
25Balutiwa ha ba utwa cwalo ba komoka hahulu, mi ba li, “Hakulicwalo, ya ta piliswa ki mañi?”
26Jesu a ba talima, mi a li ku bona, “Kwa batu ha ku konahali, kono ku Mulimu lika kaufela za konahala.”
27Pitrosi kih'a bulela, a li, “Bona, lu siile lika kaufela, mi lu ku latelezi. Lu ta fumana sika mañi?”
28 #
Mat 25.31; Luk 22.30 Jesu a li ku bona, “Ni mi bulelela niti. Nako yeo na, Mwan'a Mutu, ha ni ka ina fa lubona lwa kanya ya ka lika ha li ka ezwa sinca, ni mina ba lishumi ka ba babeli ba ba ni latelezi mu ka ina fa mabona, ku atula masika a lishumi ka a mabeli a Isilaele. 29Haili bao kaufela ba ba siile mandu a bona, kamba banabahabo bona, kamba likaizeli kamba bo m'a bona kamba bo ndat'a bona kamba bana ba bona kamba masimu a bona kabakala ka, ba ta ekelezwa ze mwanda fahalimw'a ze ba siile, mane ba fiwe ni bupilo bo bu sa feli. 30#Mat 20.16; Luk 13.30 Kono ba bañata ba ba li ba pili ka nako ye, ba ta ba ba mafelelezo, mi ba bañata ba ba li ba mafelelezo ka nako ye, ba ta ba bona ba pili.
Цяпер абрана:
Mateu 19: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.